តម្រូវការត្រីកែច្នៃក្នុងស្រុកកើនឡើង ជំរុញការផលិតឈានទៅរកស្តង់ដារ និងគុណភាពខ្ពស់

ភ្នំពេញ៖ តម្រូវការផលិតផលត្រីកែច្នៃនៅលើទីផ្សារកម្ពុជាកំពុងបន្តកើនឡើង ដោយសារអ្នកប្រើប្រាស់មានការគាំទ្រផលិតផលក្នុងស្រុកកាន់តែច្រើន និងផ្តល់ទំនុកចិត្តលើគុណភាព។ កត្តានេះបានជំរុញឱ្យសិប្បកម្មផលិតត្រីកែច្នៃជាច្រើន បន្តអភិវឌ្ឍខ្លួនពីការផលិតបែបប្រពៃណី និងមិនផ្លូវការ ទៅជាការផលិតតាមស្តង់ដារ ដែលផ្តោតលើគុណភាព សុវត្ថិភាពម្ហូបអាហារ និងការពង្រីកឱកាសប្រកួតប្រជែងនៅលើទីផ្សារ។

កញ្ញា ផល ចរិយា នាយកប្រតិបត្តិ (CEO) សិប្បកម្មស្នាដៃម៉ែ (Sna Dai Me) ដែលជាសិប្បកម្មកែច្នៃប្រភេទអាហារក្រៀម ត្រូវបានបង្កើតឡើងកាលពីឆ្នាំ២០១៨​។ សិប្បកម្មបានប្រើប្រាស់​វត្ថុធាតុដើមទាំងស្រុង ដែលបានទិញត្រីធម្មជាតិ​ពីអ្នកនេសាទមកពីខេត្តកំពង់ឆ្នាំង និងខេត្តសៀមរាប និងមួយចំនួនទៀតផ្គត់ផ្គង់ពីអ្នកចិញ្ចឹមត្រីក្នុងស្រុក ដើម្បីយកមកកែច្នៃចែកទាំងទីផ្សារក្នុងស្រុក និងក្រៅស្រុក។​ សិប្បកម្មនេះ មានសមត្ថភាពផលិតបានចំនួន ៥០០គីឡូក្រាម​ ក្នុងមួយថ្ងៃ។

កញ្ញា បន្តថា ក្នុងអំឡុងពេលបិទព្រំដែនគោកកម្ពុជា-ថៃ គឺផលិតរបស់សិប្បកម្មស្នាដៃម៉ែសន្ទុះកើនឡើងខ្លាំងដែលនាំឱ្យប្រាក់ចំណូលកើនឡើងចន្លោះពី ៨ ទៅ ១៥% ក្នុងមួយខែៗ។​ ផលិតផលរបស់​សិប្បកម្មស្នាដៃម៉ែ មានលក់នៅតាម​ផ្សារទំនើបធំៗ ​ដូចជា ផ្សារទំនើបអ៊ីអន, ផ្សារទំនើប ឡាក់ គី, និ​ងផ្សារទំនើប ជីប ម៉ុង​ ជាដើម។ ក្រៅពីផ្គត់ផ្គង់ក្នុងស្រុក ផលិតផលរបស់សិប្បកម្មនេះ ក៏បាននាំចេញមួយចំនួន​ទៅកាន់សាធារណៈរដ្ឋកូរ៉េ និងសហរដ្ឋអាមេរិក​ ផងដែរ។

កញ្ញា បញ្ជាក់ទៀតថា ដោយមានការយកចិត្តទុកដាក់ពីរាជរដ្ឋាភិបាល សិប្បកម្មនេះ ទទួលបានវិញ្ញាបនបត្រស្តង់ដារអនាម័យ CQS ដែល​ជានិមិត្តសញ្ញាគុណភាព ផលិតផល ជលផលកម្ពុជា។ ជាមួយគ្នានេះ រាជរដ្ឋាភិបាលក៏បានផ្តល់វគ្គបណ្តុះបណ្តុះ បច្ចេកទេស និងជួយសម្រួលដល់​បំពេញបែបបទឯកសារ ដើម្បីចុះបញ្ជីនានា​ ជាពិសេស ការផ្តល់ភាពអនុគ្រោះផ្នែកពន្ធដល់សហគ្រាសធុនតូច និងមធ្យម​ ថែមទៀតផង។

របាយការណ៍របស់ក្រសួងកិសកម្ម រុក្ខាប្រមាញ់ និងនេសាទ បញ្ជាក់ថា កម្ពុជាអាច ផលិត ផលជលផល សម្រេចបានចំនួន ៩៦៥ ៧៥៨តោន កើនឡើងចំនួន ៣៨ ៨២៤តោន ស្មើនឹង​ ៤,១៩% ធៀបនឹងឆ្នាំ២០២៤។ ក្នុងនោះផលនេសាទទឹកសាបទទួលបានចំនួន ៥១៤ ៨៣០តោន, ផលនេសាទសមុទ្រទទួលបានចំនួន ១៤០ ១៦៣តោន និងផលវារីវប្បកម្មសម្រេចបានចំនួន ៣១០ ៧៦៥តោន។ ជាមួយគ្នានេះ ផលិតផល ជលផល មានតម្លៃសរុបចំនួន ២ ១២៣ លានដុលារអាម៉េរិក ក្នុងឆ្នាំ២០២៥ និងការនាំចេញ ផលិតផលជលផលបាន​ចំនួន ១ ៥៦៦ តោន គិតជាប្រាក់ស្មើនឹង ៣,១៥លានដុល្លារអាម៉េរិក៕ អត្ថបទ៖ ធូ វិរៈ