ថ្នាក់ដឹកនាំ និងកីឡាករ-កីឡាការិនីឃីកបុកស៊ីង ស្ម័គ្រចិត្តបន្ដបរិច្ចាគឈាម ក្រោមស្មារតី «ខ្មែរជួយខ្មែរ»

ថ្នាក់ដឹកនាំ និងកីឡាករ-កីឡាការិនីជាច្រើន នៃសហព័ន្ធកីឡាប្រដាល់ឃីកបុកស៊ីងកម្ពុជា ដឹក​នាំ​ដោយ​ឯកឧត្តម ហេង សុខឃន ប្រធានសហព័ន្ធ បានស្ម័គ្រចិត្តបន្ដចូលរួមបរិច្ចាគឈាមជាថ្មី ក្រោម​ស្មារតី «ខ្មែរជួយខ្មែរ» ក្នុងកម្មវិធី បរិច្ចាគឈាមសង្គ្រោះជីវិត លើកទី២ ដែលក្រុមហ៊ុន ជីប ម៉ុង បានរៀបចំកាលពីថ្ងៃទី២៧ ខែកក្កដា ឆ្នាំ២០២៦ កន្លងទៅ។

ឯកឧត្តម ហេង សុខឃន បានគូសបញ្ជាក់ថា ការស្ម័គ្រចិត្តបរិច្ចាគឈាមនេះ ពិតជា​មាន​តម្លៃ​ណាស់ ​ក្នុងការផ្ដល់នូវក្ដីសង្ឃឹម ក្ដីស្រម៉ៃ ពិសេសគឺការជួយសង្គ្រោះជីវិតមនុស្ស ដែលកំពុង​មាន​តម្រូវ​ការ​គ្រប់​រូបភាព។ ទាំងអស់នេះហើយ ទើបជំរុញឲ្យសហព័ន្ធ និងកីឡាករ-កីឡាការិនី​ឯកភាព​គ្នា​បន្ដចូលរួមសកម្មភាពមនុស្សធម៌មួយនេះ ដ្បិតកន្លងមក​សហព័ន្ធ​ក៏​ធ្លាប់​បាន​ចូល​រួម​បរិច្ចាគ​ផង​ដែរ។

ជាមួយគ្នាកីឡាករ ម៉ុន ម៉ិល ក៏បានសម្ដែងនូវសេចក្ដីរីករាយ ដែលបានចូលរួម​សកម្មភាព​បរិច្ចាគ​ឈា​ម ដ្បិតរូបគេយល់ថា ការបរិច្ចាគនេះ មិនត្រឹមតែ​អាច​រួម​ចំណែក​ជួយ​សង្គ្រោះ​ជីវិ​ត​មនុស្ស​ប៉ុណ្ណោះ​ទេ តែក៏អាចផលិតនូវឈាមថ្មី ធ្វើឲ្យសុខភាពខ្លួនកាន់តែល្អប្រសើរទៀតផង។

គួរដឹងថា ក្រោមការដឹកនាំរបស់ឯកឧត្តម ហេង សុខឃន ក្រៅពីជំរុញការបណ្ដុះបណ្ដាល និង​អភិវឌ្ឍក្លិប ពិសេសធនធានកីឡាករ-កីឡាការិនី សហព័ន្ធកីឡាប្រដាល់ឃីកបុកស៊ីង ក៏តែង​ចូល​រួម​សកម្មភាពសប្បុរសធម៌ជាច្រើន សម្ដៅរួមចំណែកជួយដល់ការងារសង្គមផងដែរ ជាក់ស្ដែង​សកម្ម​ភាព​បរិច្ចាគឈាម ដែលថ្នាក់ដឹកនាំ និងកីឡាករ-កីឡាការិនី តែងចូលរួមជារឿយៗ ហើយ​នឹង​បន្ដ​ចូល​រួមបន្ថែមទៀតនាថ្ងៃខាងមុខ៕ អត្ថបទ លី ឈុនឡា