សមត្ថកិច្ចបង្ក្រាប​ទីតាំង​សង្ស័យលួចលាក់ប្រព្រឹត្តបទល្មើស Online Scams នៅនៅក្នុងក្រុងបាវិតឃាត់ខ្លួនមនុដ្ស៣៨នាក់

លោក​វរសេនីយ៍ឯក​ គឹម​ ឡៃ​ ស្នងស្នងការរងនគរបាលខេត្តស្វាយរៀង កាលពីថ្ងៃទី៣១ ខែ​កក្កដា​​ ឆ្នាំ​២០២៦​ បាន​ដឹកនាំ​កម្លាំង​នគរបាល​ជំនាញ សហការ​ជាមួយ​កម្លាំង​នាយកដ្ឋាន​ព្រហ្ម​ទណ្ឌ​ ដឹកនាំ​ដោយ​លោក​ឧត្ដមសេនីយ៍​ទោ​ ប៉ុល​ រតនា​ អនុប្រធាន​នាយកដ្ឋាន​ព្រហ្ម​ទណ្ឌ​ និងកម្លាំងគណៈបញ្ជាការឯកភាពរដ្ឋបាលក្រុងបាវិត​ដឹកនាំ​ដោយ​លោក​ ម៉ែន​ ចាន់​រ៉ា អភិបាល​ក្រុង​បាវិត ដោយមានការសម្របសម្រួលនីតិវិធីពី​ ឯកឧត្ដម​ ខាំ​ សុផារី​ ព្រះរាជអាជ្ញា នៃ​អយ្យការ​អមសាលាដំបូងខេត្ត បានបន្តចុះ​ធ្វើ​ការ​ស្រាវជ្រាវ​ បង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)​ នៅ​ចំណុច​ផ្ទះ​ជួល​ ចំនួន​ ០៤ទីតាំង​ ស្ថិត​នៅ​ភូមិ​បាវិត​កណ្តាល​ និង​ភូមិ​បាវិតលេី​ សង្កាត់​បាវិត​ ក្រុង​បាវិត​ ដោយ​ឃាត់​ខ្លួន​មនុស្ស​ក្នុង​រង្វង់​ប្រតិបត្តិការ​ចំនួន ៣៨នាក់ ស្រី ០៧នាក់ (ជនជាតិ​វៀតណាម​ ៣៤នាក់​ ស្រី​ ០៧នាក់,ជនជាតិ​បង់ក្លាដេស​ ០៤នាក់​ ប្រុស)​ ព្រមទាំងបានចាប់យកសម្ភារពាក់ព័ន្ធនឹងបទល្មើសរួមមាន÷កំព្យូទ័រលើតុ All-In-One,​ កុំព្យូទ័រ​យួរដៃ​ ,​ទូរស័ព្ទដៃ និងសម្ភារប្រើប្រាស់មួយចំនួនទៀត។

បច្ចុប្បន្ន ជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត​ ដើម្បីចាត់ការតាមនីតិវិធីច្បាប់ រីឯ​ទីតាំង​ប្រព្រឹត្តិ​បទ​ល្មើស​ ក្រុមការ​ងារបានបិទ​ទីតាំង​បណ្ដោះអាសន្ន​(Seal Off)៕