CAMBODIA SPORT+ ឧបត្ថម្ភដល់សិស្សនិទ្ទេស A ២រូប រហូត​បញ្ចប់​ដំណើរ​សិក្សា​ថ្នាក់​បរិញ្ញា​បត្រ

ក្រោយតស៊ូឆ្លងកាត់ឧបសគ្គ រហូតសម្រេចបាន និទ្ទេស A ក្នុងការប្រឡងបាក់ឌុបឆ្នាំ២០២៦ CAMBODIA SPORT+ ប្រកាសគាំទ្រដំណើរសិក្សាបន្តរយៈពេល ៤ ឆ្នាំពេញដល់យុវសិស្ស អ៊ួង រស្មី និង វ៉ាន សែនវ៉ា រហូតបញ្ចប់ដំណើរសិក្សាថ្នាក់បរិញ្ញាបត្រ។

ដំណើរការប្រឡងសញ្ញាបត្រមធ្យមសិក្សាទុតិយភូមិ នៅតែបន្តអនុវត្តក្រោមគោលការណ៍ «អ្នក​ចេះ ​គឺជាប់» ដែលធ្វើឱ្យនិទ្ទេស A ក្លាយជាសមិទ្ធផលមួយបង្ហាញពីសមត្ថភាព និង​ការ​ខិត​ខំ​ប្រឹង​ប្រែង​ពិត​ប្រាកដរបស់សិស្ស។

ជាក់ស្តែង នៅពីក្រោយភាពជោគជ័យរបស់យុវសិស្ស អ៊ួង រស្មី គឺ​ជា​​ដំណើរ​តស៊ូ​មួយ​តាំង​ពី​វ័យ​ក្មេង ​ដោយប្អូនបានបាត់បង់ម្តាយតាំងពីតូច រស់នៅក្រោមការមើលថែរបស់អ៊ុំជាស្ត្រីមេម៉ាយ ក្នុង​ខេត្ត​កំពង់ស្ពឺ។ ទោះជីវភាពមិនសូវធូរធារ ក៏ប្អូនមិនបោះបង់ការសិក្សា រហូតប្រឡងបាននិទ្ទេស A។

ចំណែក វ៉ាន សែនវ៉ា ធ្លាប់មិនទទួលបានជោគជ័យក្នុងការប្រឡងកាលពីឆ្នាំមុន ប៉ុន្តែ​មិន​បោះ​បង់​ក្តី​ស្រមៃ បានបន្តរៀន អត់ធ្មត់ និងត្រឡប់មកប្រឡងម្តងទៀត រហូតសម្រេចបាននិទ្ទេស A នៅ​ឆ្នាំ​២០២៦​។

សម្រាប់យុវសិស្សទាំង ២រូប និទ្ទេស A គឺជាចំណុចចាប់ផ្តើមនៃដំណើរថ្មីរបស់ពួកគេ ហើយ​ការ​គាំទ្រ​ដំណើរ​សិក្សាបន្តពី Cambodia Sport+ គឺជាការផ្តល់កម្លាំងចិត្តដល់យុវជន ដែល​មាន​ការ​តាំង​ចិត្ត​ឱ្យបន្តអភិវឌ្ឍសមត្ថភាព និងឈានទៅរកអនាគតដែលខ្លួនចង់បាន ព្រោះ​ការ​ផ្តល់​ឱកាស​ឱ្យ​យុវជន​ម្នាក់បន្តការសិក្សា គឺជាការបន្ថែមធនធានមនុស្សមួយរូបសម្រាប់អនាគតកម្ពុជា៕