តំបន់រមណីយដ្ឋានប្រាសាទតាមាន់ កំពុងបង្ហាញភាពទាក់ទាញចំពោះភ្ញៀវទេសចរ ក្នុងស្រុកមកទស្សនាកម្សាន្ត

តំបន់រមណីយដ្ឋានទេសចរប្រវត្តិសាស្រ្តប្រាសាទតាមាន់ មានទីតាំងស្ថិតនៅចំណុចភូមិតាមាន់សែនជ័យ ឃុំអំពឹលស្រុកបន្ទាយអំពឹល ខេត្តឧត្តរមានជ័យ លើជួរភ្នំដងរែក ជាប់ព្រំដែនកម្ពុជា-ថៃ បច្ចុប្បន្នកំពុងបង្ហាញសម្រស់គួរឲ្យមានការទាក់ទាញ​យ៉ាងខ្លាំង​លើវិស័យទេសចរក្នុងស្រុក និងមានភ្ញៀវទេសជាតិ មកលេងកម្សាន្តរាល់ថ្ងៃ នៅថ្ងៃចុងសប្តាហ៍។

បើតាមការបញ្ជាក់ពីកងកម្លាំងយោធាដែលឈរជើងប្រចាំការនៅលើទិសតំបន់ប្រាសាទតាមាន់ លើជួរភ្នំដងរែក បានឲ្យដឹងថា បច្ចុប្បន្ននេះ តំបន់រមណីយដ្ឋានប្រាសាទតាមាន់ ដែលមានទីតាំងជាប់ព្រំដែនកម្ពុជា-ថៃ ស្ថិតនៅចំណុចភូមិតាមាន់សែនជ័យ ឃុំអំពឹល ស្រុកបន្ទាយអំពឹល ខេត្តឧត្តរមានជ័យ ដែលជាតំបន់រមណីយដ្ឋានទេសចរប្រវត្តិសាស្រ្ត​មួយស្ថិតនៅលើជួរភ្នំដងរែក ដែលគ្រប់គ្រង់ការពារដោយកងទ័ព នៃកងពលតូចថ្មើរជើងលេខ៤២ បច្ចុប្បន្នបន្ទាប់ពីយើងទទួលសុខសន្តិភាពហើយនោះ យើងសង្កេតឃើញថា មានបងប្អូនប្រជាពលរដ្ឋជាច្រើននាក់ មកពីគ្រប់ទិសទីបានធ្វើដំណើរមកទស្សនា ប្រាសាទតាមាន់ រៀងរាល់ថ្ងៃចុងសប្តាហ៍ ។

កងទ័ពដែលឈរជើងនៅតំបន់ប្រាសាទតាមាន់ បានបន្តថា រាល់ថ្ងៃមានប្រជាពលរដ្ឋរាប់រយនាក់ ធ្វើដំណើរមកទស្សនាកម្សាន្តនៅរមណីយដ្ឋានប្រាសាទតាមាន់នេះ ភាគច្រើនប្រជាពលរដ្ឋ​អ្នក​ស្រុកជាប់ព្រំដែនតែម្តង ដែលបានធ្វើដំណើរមកលេងកម្សាន្តតំបន់នេះ ដើម្បីបានសិក្សាស្វែងយល់ពីប្រវត្តិសាស្រ្ត និងផ្តិតយករូបភាព​តាម​ប្រាង្គប្រាសាទនានាផងដែរ៕