ក្រុមបាតុករប្រឆាំងសង្គ្រាមប៉ះទង្គិចជាមួយកងកម្លាំងនគរបាលនៅឯពិព័រណ៍ការពារជាតិអូស្ត្រាលី

ក្រុមបាតុករប្រឆាំងសង្រ្គាម និងកងកម្លាំងនគរបាល បានប៉ះទង្គិចគ្នានៅខាងក្រៅពិព័រណ៍ការពារជាតិនៅទីក្រុងមែលប៊ន (Melbourne) នៅថ្ងៃពុធ ១១កញ្ញានេះ ដោយបង្ខំឱ្យនគរបាលបិទផ្លូវ និងជំរុញអ្នកបើកបរឱ្យជៀសវាងផ្នែកខ្លះនៃទីក្រុងរបស់អូស្ត្រាលីមួយនេះ។

គេបានមើលឃើញមនុស្សរាប់រយនាក់ ប្រមូលផ្តុំគ្នានៅខាងក្រៅទីតាំងរៀបចំការតាំងពិព័រណ៌ការពារអន្តរជាតិរបស់កងកម្លាំងការពារជាតិ ដោយស្រែកពាក្យស្លោកគាំទ្រពលរដ្ឋប៉ាឡេស្ទីន តាមរយៈឧបករណ៍បំពងសំឡេង។

ក្រុមបាតុករមួយចំនួនដែលព្យាយាមឆ្លងកាត់រនាំងនគរបាល ត្រូវបានរារាំងដោយក្រុមមន្ត្រីកងកម្លាំងទប់ស្កាត់កុបកម្ម ខណៈបាតុករម្នាក់បានឡើងលើរថយន្តដឹកទំនិញ ចតអំឡុងភ្លើងចរាចរណ៍។

គេក៏បានឃើញនគរបាលបាញ់ម្សៅម្រិចលើហ្វូងមនុស្សផងដែរ ស្របពេលក្រុមអ្នកតវ៉ាជាច្រើនបានស្រែក ដាក់គណៈប្រតិភូដែលចូលរួមក្នុងសន្និសីទនោះ។

លោកនាយករដ្ឋមន្ត្រី Anthony Albanese បាននិយាយថា ប្រជាជនមានសិទ្ធិតវ៉ា ប៉ុន្តែត្រូវធ្វើដោយស្ងៀមស្ងាត់៕