អ្នកជំនាញ៖ ក្រុងកំពង់សោម នឹងក្លាយជាក្រុងមានសក្តានុពលមួយទៀត សម្រាប់សេដ្ឋកិច្ចកម្ពុជា

អ្នកជំនាញវិស័យអចលនទ្រព្យ មើលឃើញអំពីសក្តានុពលនៃការបង្កើតក្រុងកំពង់សោមថ្មី, នឹង​អាច​ទាក់​ទាញ​វិនិយោគិនបរទេស មកវិនិយោគបន្ថែម ជាពិសេសលើវិស័យអចលនទ្រព្យ ដែល​អាច​ធ្វើ​ឱ្យ​ទីក្រុង​មួយនេះ ក្លាយទៅជាទីក្រុងទំនើប និងទាក់ទាញនាពេល អនាគត់។

លោក សន សៀប ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លើក​ឡើង​ក្នុង​កិច្ច​សម្ភាសន៍​ជា​មួយ​សារព័ត៌មាន ស្តីពីការបង្កើតទីក្រុងកំពង់សោម នៃខេត្តព្រះសីហនុរបស់​រាជ​រដ្ឋាភិបាលនេះថា ជុំវិញសេដ្ឋកិច្ចខេត្តព្រះសីហនុ គឺជាខេត្តមាន សក្តានុពលយ៉ាងខ្លាំង និងស្រូប​យក​វិនិយោគិនមកវិនិយោគជាបន្តបន្ទាប់ ខណៈខេត្ត​មួយ​នេះ​មាន​ហេដ្ឋា​រចនា​សម្ព័ន្ធ​គ្រប់​ដណ្តប់​គ្រប់ផ្នែកដូចជា៖ មានផ្លូវល្បឿនលឿន, ផ្លូវដែក, ព្រលានយន្តហោះ, កំពង់ផែទឹកជ្រៅ, តំបន់​សេដ្ឋកិច្ច​ពិសេស, មានឆ្នេរ, មានកោះ និង មានអគារពាណិជ្ជកម្មជាដើម។

លោក បន្តថា ចំណែកទីក្រុងបង្កើតថ្មីនេះ បច្ចុប្បន្ន​មាន​ហេដ្ឋា​រចនា​សម្ព័ន្ធ​គ្រប​ដណ្តប់​បាន​ល្អ​ប្រសើរ​ជា​បណ្តើរៗមកហើយ ដូចជា រាជរដ្ឋាភិបាលបានស្ថាបនាផ្លូវធំៗ និងទូលាយ សម្រាប់បម្រើ​ដល់​ការ​ធ្វើដំណើរ និងការដឹកជញ្ជូនផ្សេងៗ, ក្រៅពីនេះតំបន់ ទីក្រុងថ្មីនេះ ក៏សម្បូរដីធំៗ​បម្រើ​ដល់​ការ​ធ្វើអាជីវកម្មផ្សេងៗផងដែរ ជាពិសេសការស្រូបយកវិស័យអចលនទ្រព្យ និងសំណង់ ពោល​គឺ នៅក្នុងរយៈពេលវែង ទីក្រុងកំពង់សោម នឹងក្លាយទៅជាទីក្រុងពាណិជ្ជកម្មទំនើប និង​ទាក់ទាញថ្មីមួយទៀត លើទឹកដីខេត្តព្រះសីហនុ ជាពិសេស​ស្រូប​យក​ដល់​ការ​រីក​លូត​លាស់​ក្នុង​វិស័យ​អចលនទ្រព្យបន្ថែម។

សូមបញ្ជាក់ថា នាពេលថ្មីៗនេះ, រាជរដ្ឋាភិបាលចេញអនុក្រឹត្យ ស្តីពីការបង្កើតក្រុងកំពង់សោម នៃ​ខេត្ត​ព្រះសីហនុ ដែលមានទីតាំងរដ្ឋ បាល ក្រុងកំពង់សោម ស្ថិតនៅក្នុងសង្កាត់រាម ដោយ​មាន​សង្កាត់​ចំនួន៥ កាត់ចេញពីស្រុកព្រៃនប់រួមមាន៖ ឃុំរាម ឃុំបិតត្រាំង ឃុំអូរឧកញ៉ាហេង ឃុំ​បឹង​តា​ព្រហ្ម និងឃុំអូរជ្រៅ។ មកដល់បច្ចុប្បន្ន ខេត្តព្រះសីហនុមានក្រុងចំនួនបីគឺ ក្រុងព្រះសីហនុ, ក្រុង​កោះរ៉ុង និងក្រុងកំពង់សោម ដែលរាជរដ្ឋាភិបាលទើបបង្កើតថ្មីៗនេះ៕ អត្ថបទ៖ សុន រ៉ាឌី