ក្រសួងអប់រំ ជ្រើសរើសយុវជន ៥ក្រុម ដើម្បីឡើងទៅវគ្គផ្ដាច់ព្រ័ត្រ​ក្នុងការប្រកួត​ប្រជែងផែនការអាជីវកម្ម

ក្រសួងអប់រំ យុវជន និងកីឡា បានរៀបចំការប្រកួតប្រជែងផែនការអាជីវកម្ម ដែលមានឈ្មោះថា «អាជីវកម្មខ្ញុំ» វគ្គពាក់កណ្ដាលព្រ័ត នៅថ្ងៃទី ១៥ ខែកញ្ញា ឆ្នាំ ២០២៤នេះ។ ការប្រកួត​ប្រជែង​នេះ មានការចូលរួមពីយុវជនថ្នាក់ទី ១០ និងថ្នាក់ទី ១១ចំនួន ១៥ក្រុម ដែលលទ្ធផលចុងក្រោយ នឹង​សម្រេចយក ៥ក្រុមប៉ុណ្ណោះ ដើម្បីឡើងទៅប្រកួតវគ្គផ្ដាច់ព្រ័ត្រ ដែលនឹងធ្វើឡើងនៅខែ វិច្ឆិកា ខាងមុខ។

កម្មវិ​ធី​ប្រកួតប្រជែងផែនការអាជីវកម្ម ដែលមានឈ្មោះថា «អាជីវកម្មខ្ញុំ» ជាកម្មវិធី​ដែល​នាយកដ្ឋាន​អភិវឌ្ឍកម្មវិធីយុវជន នៃក្រសួងអប់រំ យុវជន និងកីឡា រៀបចំឡើងជារៀងរាល់ឆ្នាំ។ សម្រាប់ឆ្នាំ២០២៤ កម្មវិធីមួយនេះ បានឈានដល់វគ្គពាក់កណ្ដាលព្រ័ត្រ ដោយ​បាន​អញ្ជើញ​យុវជនទាំង ១៥ក្រុម ធ្វើដំណើរមករាជធានីភ្នំពេញ ដើម្បីធ្វើបទបង្ហាញ​ពីផែនការ​អាជីវកម្ម​របស់​ខ្លួន​ នៅពីមុខគណៈកម្មការដាក់ពិន្ទុ។ នេះជាការលើកឡើងរបស់ លោក តាំង សុផាណារ័ត្ន ប្រធាន​នាយកដ្ឋានអភិវឌ្ឍកម្មវិធីយុវជន។

លោកប្រធាននាយកដ្ឋាន លើកឡើងថា ១៥ក្រុម ដែលប្រកួតនៅថ្ងៃនេះ ជាក្រុមដែលត្រូវ​បាន​ជ្រើស​រើស​ចេញពីក្រុមចូលរួមប្រកួតសរុប ៥៥ក្រុម។ ពួកគេទាំង ១៥ក្រុម ត្រូវធ្វើបទបង្ហាញ​ពីផែន​ការ​អាជីវកម្ម ឆ្លើយសំណួររបស់គណៈកម្មការដាក់ពិន្ទុ ដើម្បីអាចជាប់ទៅវគ្គផ្ដាច់ព្រ័ត្រ ដែល​ក្រសួងនឹងរៀបចំឡើងនៅថ្ងៃទី ៥ ខែវិច្ឆិកា ឆ្នាំ វ២០២៤។

លោកលើក​ឡើងឱ្យដឹងដែរថា ការចូលរួមប្រកួតប្រជែងក្នុងកម្មវិធីនេះ ផ្ដល់ជាអត្ថប្រយោជន៍ លើស​ពី​ប្រាក់រង្វាន់។ អត្ថប្រយោជន៍ រាប់បញ្ចូលទាំងបទពិសោធន៍ ចំណេះដឹង ទំនាក់ទំនង និង​ឱកាស​សហការដើម្បីធ្វើឱ្យអាជីវកម្មមួយនោះ កើតចេញជារូបរាងពិតប្រាកដ។

ការប្រកួត​ប្រជែងវគ្គពាក់កណ្ដាលផ្ដាច់ព្រ័តនេះ ជាការប្រកួតរបស់ យុវជន ១៥ក្រុម មកពី ១៥​រាជ​ធានី-ខេត្តផ្សេងគ្នា។ ពួកគេមានគម្រោងផែនការ អាជីវកម្មផ្សេងគ្នា និងភាពជឿជាក់រៀងខ្លួន។ ក្រុមខ្លះ ពុំទាន់បានបង្កើតជាផលិតផលគំរូ នោះទេ សម្រាប់អាជីវកម្មរបស់ខ្លួន រីឯក្រុមខ្លះ បាន​បង្កើត​ចេញ​ជាផលិតផលគំរូ ក៏ដូចជាផលិតផលលក់នៅលើទីផ្សារផងដែររួចទៅហើយ។

សម្រាប់​ក្រុម​ប្រពៃ មកពីខេត្ត បន្ទាយមានជ័យ បាននាំយកផលិតផលជាដុំសាប៊ូ ផលិត​ចេញ​ពី​ស្លឹក ដង្ហិត មកធ្វើបទបង្ហាញដោយផ្ទាល់ សម្រាប់ការប្រកួតវគ្គផ្ដាច់ព្រ័ត្រនេះ។ យុវតី ណែន សុផៃ ជា​តំណាងក្រុម លើកឡើងជាភាពជឿជាក់ថា ក្រុមរបស់ខ្លួននឹងឡើងទៅវគ្គផ្ដាច់ព្រ័ត។

កម្មវិធីប្រកួតប្រជែងផែនការអាជីវកម្ម ដែលមានឈ្មោះថា «អាជីវកម្មខ្ញុំ» នៅក្នុងឆ្នាំ ២០២៤នេះ មាន​ការ​កំណត់លក្ខណ្ឌបេក្ខជនចូលរួមខុសពីរាល់ឆ្នាំ។ កន្លងទៅកម្មវិធីនេះ បើកទូលាយ​សម្រាប់​សិស្ស​វិទ្យាល័យ សិស្សសាកលវិទ្យាល័យ សុទ្ធតែអាចចូលរួមបាន។ តែឆ្នាំនេះ កម្មវិធីកំណត់​សម្រាប់​តែ​សិស្សថ្នាក់ទី ១០ និងថ្នាក់ទី ១១ ប៉ុណ្ណោះ៕ អត្ថបទ៖ គឹមហុក