ភាគីជម្លោះស៊ូដង់និយាយថា ពួកគេបើកចំហសម្រាប់ដំណោះស្រាយសង្រ្គាមដោយសន្តិវិធី

កងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) បាននិយាយថា ពួកគេបើកចំហសម្រាប់ដំណោះស្រាយដោយសន្តិវិធីចំពោះសង្គ្រាមដែលកំពុងបន្តអស់ពេលជាង ១៧ខែ ដើម្បីឆ្លើយតបទៅនឹងការអំពាវនាវរបស់ប្រធានាធិបតីអាមេរិក លោក Joe Biden ឱ្យភាគីសង្រ្គាមចូលរួមការចរចាឡើងវិញ។

ប្រមុខកងទ័ពស៊ូដង់ លោក Abdel Fattah al-Burhan បាននិយាយកាលពីថ្ងៃពុធ (១៨ កញ្ញា) ថា រដ្ឋាភិបាលស៊ូដង់ នៅតែបើកចំហចំពោះកិច្ចខិតខំប្រឹងប្រែងស្ថាបនាទាំងអស់ដែលមានគោលបំណងបញ្ចប់សង្រ្គាម ក្រោយមកមេដឹកនាំកងកម្លាំង RSF លោក Mohamed Hamdan Dagalo បានបង្ហើបជំហរចរចាស្រដៀងគ្នានៅព្រឹកថ្ងៃព្រហស្បតិ៍ (១៩ កញ្ញា) នេះ។

ទោះជាយ៉ាងណាក៏ដោយ ប្រមុខភាគីជម្លោះទាំងពីរបានស្តីបន្ទោសគ្នាទៅមកចំពោះការបរាជ័យក្នុងការបញ្ចប់ជម្លោះដែលបានសម្លាប់មនុស្សជាង ១២.០០០នាក់ចាប់តាំងពីបានចាប់ផ្តើមនៅក្នុងខែមេសា ឆ្នាំ២០២៣មក ដោយចោទប្រកាន់គ្នាទៅវិញទៅមកពីបទរំលោភបំពាន។ ពួកគេមិនបានគូសបញ្ជាក់ពីជំហានជាក់លាក់ឆ្ពោះទៅរកដំណោះស្រាយដោយសន្តិវិធីទេ។

ជម្លោះបានចាប់ផ្តើមនៅពេលដែលការប្រកួតប្រជែងរវាងកងទ័ពស៊ូដង់ និងកងកម្លាំង RSF ដែលធ្លាប់ចែករំលែកអំណាចគ្នាបន្ទាប់ពីធ្វើរដ្ឋប្រហារ បានផ្ទុះឡើងជាសង្រ្គាមបើកចំហ។ ក្រុមសម្រុះសម្រួលដែលដឹកនាំដោយអាមេរិក បាននិយាយកាលពីខែមុនថា ពួកគេទទួលបានការធានាពីភាគីទាំងពីរនៅក្នុងកិច្ចពិភាក្សានៅប្រទេសស្វីស ដើម្បីកែលម្អលទ្ធភាពទទួលបានជំនួយមនុស្សធម៌ ប៉ុន្តែអវត្តមានរបស់កងទ័ពស៊ូដង់ពីការពិភាក្សា បានរារាំងវឌ្ឍនភាពនៅពេលនោះ៕