តម្លៃប្រេងបន្តកើនឡើងជុំវិញហានិភ័យនៃការផ្គត់ផ្គង់ពីមជ្ឈិមបូព៌ា ខណៈភាពតានតឹងមិនអន់ថយ

តម្លៃប្រេងបានកើនឡើងកាន់តែខ្ពស់នៅថ្ងៃចន្ទ (៣០ កញ្ញា) នេះជុំវិញកំណើនក្តីបារម្ភនៃការរំខានដែលអាចកើតមានដល់ការផ្គត់ផ្គង់ពីតំបន់ផលិតនៅមជ្ឈិមបូព៌ា បន្ទាប់ពីអ៊ីស្រាអែល បានបង្កើនការវាយប្រហារលើបណ្ដាកងកម្លាំងដែលគាំទ្រដោយអ៊ីរ៉ង់។

ភាគហ៊ុនប្រេងឆៅ ប្រេនត៍ (Brent) សម្រាប់ការចែកចាយខែវិច្ឆិកា បានកើនឡើង ១៦សេន ឬ ០,២២% ដល់តម្លៃ ៧២,១៤ដុល្លារ ក្នុងមួយបារ៉ែលគិតត្រឹមម៉ោងសកល ០០:៤៣។

កិច្ចសន្យានោះផុតកំណត់នៅថ្ងៃចន្ទនេះ ហើយកិច្ចសន្យាដែលកាន់តែសកម្មជាងមុនសម្រាប់ការចែកចាយខែធ្នូ បានកើនឡើង ១០សេន ឬ ០,១៤% ដល់តួលេខ ៧១,៦៤ដុល្លារ។ ភាគហ៊ុនប្រេងឆៅរបស់អាមេរិក WTI បានបន្ថែម ៨សេន ឬ ០,១២% ដល់ ៦៨,២៦ដុល្លារ ក្នុងមួយបារ៉ែល។

កាលពីសប្តាហ៍មុន ប្រេងឆៅ Brent បានធ្លាក់ចុះប្រហែល ៣% ខណៈពេលដែល WTI បានធ្លាក់ចុះប្រហែល ៥% ដយសារកំណើនការព្រួយបារម្ភពីតម្រូវការ បន្ទាប់ពីការជំរុញសារពើពន្ធពីប្រទេសចិន ដែលជាសេដ្ឋកិច្ចធំទីពីររបស់ពិភពលោក និងអ្នកនាំចូលប្រេងនាំមុខគេ បានបរាជ័យក្នុងការធានានូវទំនុកចិត្តទីផ្សារឡើងវិញ។

ទោះជាយ៉ាងណាក៏ដោយ តម្លៃប្រេងដ៏ខ្ពស់នៅថ្ងៃចន្ទនេះត្រូវបានជំរុញដោយលទ្ធភាពនៃជម្លោះមជ្ឈិមបូព៌ាដែលកាន់តែរីកធំឡើងពាក់ព័ន្ធនឹងអ៊ីរ៉ង់ ដែលជាអ្នកផលិតដ៏សំខាន់ និងជាសមាជិកអង្គការនៃប្រទេសនាំចេញប្រេង (OPEC) បន្ទាប់ពីអ៊ីស្រាអែល បានបង្កើនការវាយប្រហាររបស់ខ្លួនលើក្រុមសកម្មប្រយុទ្ធ ហេសបូឡា និង ហ៊ូទី ដែល អ៊ីរ៉ង់គាំទ្រ៕