ហាងថតចម្លង និងអាជីវកម្មមួយចំនួនក្បែរមណ្ឌលប្រឡងនឹងផ្អាកដំណើរការក្នុងថ្ងៃប្រឡង

ហាងថតចម្លងឯកសារ និងអាជីវកម្មមួយចំនួនទៀតក្បែរមណ្ឌលប្រឡង ស្ថិតនៅរាជធានីភ្នំពេញ នឹងផ្អាកអាជីកម្មក្នុងថ្ងៃប្រឡងសញ្ញាបត្រមធ្យសិក្សាទុតិយភូមិ ឬ (បាក់ឌុប) ដោយគោរពតាម​សេចក្តីជូនដំណឹងរបស់រដ្ឋបាលរាជធានីភ្នំពេញ។ ជាក់ស្តែងដូចជាអាជីវកម្មនៅក្បែរមណ្ឌល​ប្រឡងវិទ្យាល័យបាក់ទូកជាដើម ។

ម្ចាស់ហាងថតចម្លងឯកសារ និងម្ចាស់អាជីវកម្មមួយទៀតនៅក្បែរមណ្ឌលប្រឡងបាក់ឌុប វិទ្យា ល័យបាក់ទូករាជធានីភ្នំពេញ នាថ្ងៃទី០៧ ខែតុលា នេះ បានប្រាប់ BTVថា ស្របទៅតាម​សេចក្តីជូន​ដំណឹងរបស់រដ្ឋបាលរាជធានីភ្នំពេញ​ អាជីវកម្មរបស់ពួកគេ នឹងផ្អាកចំនួនពីរថ្ងៃ គឺនៅ​ថ្ងៃទី០៨ និងទី៩ខែតុលានេះ ដើម្បីចូលរួមចំណែករក្សាសន្តិសុខ​សណ្តាប់ធ្នាប់ របៀបរៀបរយ​ ឱ្យដំណើរការ​ប្រឡងបាក់ឌុបប្រព្រឹត្តទៅដោយរលូន និងជោគជ័យ ។ ការផ្អាកអាជីវកម្មនេះ គឺធ្វើឡើងដោយ​ស្ម័គ្រចិត្ត ។

លោក គង់ សារ៉ាវុធ ស្មៀន និងតំណាងចៅសង្កាត់អូរឫស្សីទី២ ខណ្ឌ៧មករា រាជធានីភ្នំពេញ បាន ឱ្យដឹងដែរថា មុនការប្រឡងមកដល់ អាជ្ញាធរបានផ្សព្វផ្យាយដល់អាជីករនៅក្បែរមណ្ឌលប្រឡង​បាក់ឌុប នៅវិទ្យាល័យបាក់ទូក សូមផ្អាកអាជីវកម្មចំនួនពីរថ្ងៃ។ ​ហើយក្នុងពេលផ្សព្វផ្សាយនោះ អាជីករក៏បានយល់ ព្រមតាមការណែរបស់អាជ្ញាធរ។ យ៉ាងណាក្តី ប្រសិនបើដល់ថ្ងៃប្រឡងស្អែកនេះ អាជីវករណាមួយមិនបាន គោរពតាមការណែនាំទេ នោះអាជ្ញាធរនឹងមានវិធានការរដ្ឋបាល ។

ដើម្បីចូលរួមចំណែកឱ្យដំណើរការប្រឡង សញ្ញាបត្រមធ្យមសិក្សាទុតិយភូមិ ប្រព្រឹត្តទៅដោយ រលូន និងជោគជ័យ ជាពិសេស ធានារក្សាបាននូវសន្តិសុខ សុវត្ថិភាព សណ្តាប់ធ្នាប់ តម្លាភាព និងរបៀប រៀបរយសាធារណៈនៅជុំវិញមណ្ឌលប្រឡងទាំង៣២មណ្ឌលក្នុងរាជធានី គឺរដ្ឋបាល​រាជធានីភ្នំពេញ បានណែនាំឱ្យផ្អាកជាបណ្តោះអាសន្នចំពោះទីតាំងអាជីវកម្មថតចម្លង​ឯកសារ អ៊ិនធឺណិត និងអាជីវកម្មលក់ សម្ភារសិក្សាគ្រប់ប្រភេទ។

អាជីវកម្មភោជនីយដ្ឋាន ​អាហារដ្ឋាន ការដ្ឋានសំណង់នានា។ ​ហាមបង្កសំឡេង រំខាន ឬសកម្មភាព​នានាដែលធ្វើឱ្យប៉ះពាល់ដល់ដំណើរការនៃការប្រឡង និងការផ្ញើកង់-ម៉ូតូ នៅតាម មណ្ឌលប្រឡង មិនត្រូវតម្រូងឱ្យបង់ប្រាក់ឡើយ៕ អត្ថបទ៖ សោភ័ណ