កម្ពុជាអនុម័តគម្រោងវិនិយោគចំនួន ២៦ មានទុនសរុបប្រមាណ ៤៤៣ លានដុល្លារអាម៉េរិក

ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា ក្នុងខែ កញ្ញា ឆ្នាំ២០២៤ នេះ, បានអនុម័តគម្រោងថ្មីចំនួន ២៦ គម្រោង និងគម្រោងពង្រីកផលិតកម្ម ចំនួន ២ គម្រោង មានទុនវិនិយោគសរុបប្រមាណ ៤៤៣ លានដុល្លារអាម៉េរិក អាចបង្កើតការងារបានប្រមាណជិត ២៥ ពាន់កន្លែង។

យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ដែលអនុម័តដោយក្រុមប្រឹក្សាអភិវឌ្ឍន៍កម្ពុជា ក្នុងខែ កញ្ញា ឆ្នាំ២០២៤ នេះ មានចំនួនសរុប ២៨ គម្រោង ក្នុងនោះអនុម័តគម្រោងថ្មីចំនួន ២៦ គម្រោង និងគម្រោងពង្រីកផលិតកម្ម ចំនួន ២ គម្រោង មានទុនវិនិយោគសរុបប្រមាណ ៤៤៣ លានដុល្លារអាម៉េរិក ដោយនៅក្នុងចំណោមគម្រោងវិនិយោគសរុបនេះ ចំពោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ៦ គម្រោង និងគម្រោងវិនិយោគដែលមាន ទីតាំងស្ថិតនៅក្នុងតំបន់សេដ្ឋកិច្ចពិសេស មានចំនួន ២២ គម្រោង។

ជុំវិញការវិនិយោគនេះ ចំពោះគម្រោងដែលមានភាពលេចធ្លោជាងគេប្រចាំខែ កញ្ញា នៅក្រៅតំបន់សេដ្ឋកិច្ចពិសេសរួមមាន៖ គម្រោងពង្រីកផលិតកម្ម របស់គម្រោងវិនិយោគបង្កើតរោងចក្រកាត់ដេរសម្លៀកបំពាក់ ដែលមានទីតាំងស្ថិតនៅភូមិព្រៃកីខ និងភូមិ ព្រៃកីគ សង្កាត់ពងទឹក ខណ្ឌដង្កោ រាជធានីភ្នំពេញ ក្នុងទុនវិនិយោគបន្ថែម ១២,៥ លានដុល្លារអាម៉េរិក។

ចំណែកនៅក្នុងតំបន់សេដ្ឋកិច្ចពិសេសរួមមាន៖ គម្រោងបង្កើតតំបន់សេដ្ឋកិច្ចពិសេសពោធិ៍សាត់ ស្ថិតក្នុងស្រុកក្រគរ ខេត្ត ពោធិ៍សាត់ មានទុនវិនិយោគប្រមាណជាង ០ លានដុល្លារអាម៉េរិក។ គម្រោងបង្កើតតំបន់សេដ្ឋកិច្ចពិសេស ហ្វុងហ្វូ អ៊ិនធើណេសិន ណល មានទីតាំងស្ថិតស្រុកកំពង់រោទិ៍ ខេត្តស្វាយរៀង ក្នុងទុនវិនិយោគចំនួន ៥៥ លានដុល្លារអាម៉េរិក។ គម្រោងវិនិយោគបង្កើតរោង ចក្រផលិតដំឡើង និងបង្គុំសមាសធាតុជាក់លាក់គ្រឿងម៉ាស៊ីន និងមេកានិច ស្ថិតនៅក្នុងតំបន់សេដ្ឋកិច្ចពិសេសពោធិ៍សាត់ ក្នុងទុន វិនិយោគប្រមាណជាង ៣៨ លានដុល្លារអាម៉េរិក ។ គម្រោងវិនិយោគបង្កើតរោងចក្រកែច្នៃផលិតផលពីទឹកដោះគោ ភេសជ្ជៈគ្រប់ ប្រភេទគ្មានជាតិអាល់កុល និងអាហារគ្រប់ប្រភេទ មានទីតាំងស្ថិតនៅក្នុងតំបន់សេដ្ឋកិច្ចពិសេសសុវណ្ណភូមិ ក្នុងទុនវិនិយោគប្រមាណ ជាង ៣៧ លានដុល្លារអាម៉េរិក និងគម្រោងវិនិយោគបង្កើតរោងចក្រកែច្នៃអាលុយមីញ៉ូម ស្ថិតនៅក្នុងតំបន់សេដ្ឋកិច្ចពិសេស មេនហាត ធេន ក្នុងទុនវិនិយោគប្រមាណជាង ២០ លានដុល្លារអាម៉េរិក ។

សូមបញ្ជាក់ថា ក្នុងខែ កញ្ញា ឆ្នាំ២០២៤ នេះ ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដោយបានរួមចំណែកជាង ៣៨ ភាគរយ នៃទុនវិនិយោគសរុប ខណៈពេលដែលការវិនិយោគក្នុងស្រុក គ្របដណ្តប់ជិត ៣៣ ភាគរយ នៃទុនវិនិយោគសរុប៕

អត្ថបទ៖ សុន រ៉ាឌី