លោក Trump វាយប្រហារជនអន្តោប្រវេសន៍នៅអាមេរិក ដោយចោទអ្នកទាំងនោះថាជាឃាតករ

បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump កាលពីថ្ងៃចន្ទ (០៧ តុលា) បានប្រើវោហារសាស្រ្តវាយប្រហារជនអន្តោប្រវេសន៍នៅក្នុងសហរដ្ឋអាមេរិក ដោយនិយាយថា ពួកគេមាន “ហ្សែនអាក្រក់ជាច្រើន” និងចោទប្រកាន់អ្នកទាំងនោះថាជាឃាតករ ក្នុងពេលពិភាក្សាពីឃាតកម្មជាច្រើនករណីដែលត្រូវបានចោទប្រកាន់ថាប្រព្រឹត្តដោយជនអន្តោប្រវេសន៍ ដែលរស់នៅដោយខុសច្បាប់នៅក្នុងសហរដ្ឋអាមេរិក។

លោក Trump បាននិយាយនៅក្នុងបទសម្ភាសន៍មួយថា “ដោយសារតែការអនុញ្ញាតឱ្យជនអន្តោប្រវេសន៍ចូលមកព្រំដែនដោយបើកចំហរ មានមនុស្ស ១៣.០០០នាក់ជាឃាតករ” ខណៈពេលដែលពិភាក្សាពីគោលនយោបាយអន្តោប្រវេសន៍របស់គូប្រជែងប្រជាធិបតេយ្យរបស់លោកនៅក្នុងការបោះឆ្នោតថ្ងៃទី០៥ ខែវិច្ឆិកា គឺអនុប្រធានាធិបតី លោកស្រី Kamala Harris។

លោក Trump បន្តថា “ពួកគេជាច្រើនបានសម្លាប់មនុស្សច្រើនជាងម្នាក់ ហើយឥឡូវនេះពួកគេកំពុងរស់នៅក្នុងសហរដ្ឋអាមេរិកដោយសប្បាយរីករាយ។ អ្នកទាំងនោះមានហ្សែនអាក្រក់ជាច្រើនក្នុងខ្លួន ហើយកំពុងស្ថិតនៅក្នុងសហរដ្ឋអាមេរិកនាពេលនេះ»។

អតីតប្រធានាធិបតីរូបនេះបានវាយប្រហារជាញឹកញាប់លើជនអន្តោប្រវេសន៍នៅក្នុងដំណើរយុទ្ធនាការរបស់ខ្លួន ជាពិសេសអ្នកដែលជាប់ពាក់ព័ន្ធក្នុងឧក្រិដ្ឋកម្ម។ ពេលខ្លះលោកបានប្រើភាសាប្រមាថមើលងាយ ហើយបានពិពណ៌នាពីរូបភាពឧក្រិដ្ឋកម្មយ៉ាងឃោរឃៅ ទោះបីជាមានការសិក្សាស្រាវជ្រាវជាច្រើនបង្ហាញថា ជនអន្តោប្រវេសន៍មិនប្រព្រឹត្តបទឧក្រិដ្ឋក្នុងអត្រាខ្ពស់ជាងអ្នកមានដើមកំណើតជាជនជាតិអាមេរិកក៏ដោយ៕