ប៊ូយ៉ុងថោនបើកសម្ពោធលក់ជាផ្លូវការ ជាលំនៅដ្ឋានប្រកបដោយគុណភាព ដល់សហគមន៍កម្ពុជា

ភ្នំពេញ ៖ ក្រុមហ៊ុនប៊ូយ៉ុងគ្រុប បើកសម្ពោធលក់ជាផ្លូវការ ប៊ូយ៉ុងថោន នៃគម្រោងទីក្រុងថ្មីខ្នាតតូច ដោយផ្តល់លំនៅដ្ឋានប្រកបដោយគុណភាព ដល់សហគមន៍កម្ពុជា ដើម្បីការធ្វើឲ្យប្រសើរឡើងនូវស្តង់ដាលំនៅឋាន និងចូលរួមដល់ការអភិវឌ្ឍន៍សេដ្ឋកិច្ច និងសង្គមកម្ពុជា តាមរយៈការ ប្រើប្រាស់លំនៅដ្ឋាន តាមបែបបទរបស់ប្រទេសកូរ៉េ។

​លោកបណ្ឌិត លី ជុងគឿន ប្រធានក្រុមប្រឹក្សាអភិបាលក្រុមហ៊ុនប៊ូយ៉ុងគ្រុប លើកឡើងក្នុងពិធីសម្ពោធជាផ្លូវការរបស់ប៊ូយ៉ុងថោន នៅថ្ងៃទី៨ ខែតុលា ឆ្នាំ២០២៤ នេះថា គម្រោងប៊ូយ៉ុងថោនគឺជាគម្រោងទីក្រុងថ្មីខ្នាតូច ដែលកំពុងត្រូវបានអនុវត្តតាមចក្ខុវិស័យដ៏ធំ របស់ ប្រធានប៊ូយ៉ុងគ្រុប ក្នុងគោលបំណងធ្វើឲ្យប្រសើរឡើងនៅស្តង់ដាលំនៅឋានរបស់ប្រទេសកម្ពុជា និងចូលរួមដល់ការអភិវឌ្ឍន៍សេដ្ឋកិច្ច និងសង្គម ដោយប្រើប្រាស់ការសាងសង់លំនៅដ្ឋានតាមបែបបទរបស់ប្រទេសកូរ៉េ។ តាមរយៈគម្រោងនេះដែរ គឺមានគោលបំណងលើក កម្ពស់ និងអភិវឌ្ឍន៍ទំនាក់ទំនងរវាងកូរ៉េនិងកម្ពុជា និងរួមចំណែកបន្ថែមទៀត ដល់ការអភិវឌ្ឍសេដ្ឋកិច្ចរបស់កម្ពុជា។

លោកបណ្ឌិត បន្ថែមថា ជុំវិញទីផ្សារអចលនទ្រព្យនេះ បច្ចុប្បន្នកំពុងមានការកើនឡើងជាបន្តបន្ទាប់ ជាពិសេសនៅទីក្រុងភ្នំពេញ លំនៅដ្ឋានខុនដូ និងវីឡាប្រណិត កំពុងត្រូវបានសាងសង់នៅក្នុងតំបន់ជុំវិញក្រុង ហើយការវិនិយោគពីជនបរទេស ក៏កំពុងកើនឡើង ផងដែរ។ បញ្ហានេះ ក្រុមហ៊ុនប៊ូយ៉ុងគ្រុប មានគោលបំណងផ្គត់ផ្គង់លំនៅដ្ឋានខុនដូបែបកូរ៉េ ដែលមានរចនាសម្ព័ន្ធរឹងមាំ មានចំនួន ២ ម៉ឺន យូនីត និងជាកន្លែងរស់នៅងាយស្រួល ស្របពេលដែលផ្សព្វផ្សាយបង្ហាញអំពីវប្បធម៌កូរ៉េ និងលើកកម្ពស់គុណភាពជីវិតរបស់ប្រជាជន កម្ពុជា តាមរយៈការអភិវឌ្ឍន៍ប្រកបដោយនិរន្តរភាព, ក្រៅពីនេះក៏មានការសាងសង់ សាលាចំណេះទូទៅ វ៉ូជុងកម្ពុជា, ផ្សារទំនើប, មជ្ឈមណ្ឌលកីឡា, អគារខុនដូ, និងបរិក្ខារផ្សេងៗទៀត ដើម្បីផ្តល់ជីវិតរស់នៅឱ្យកាន់តែប្រសើរ។

ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លើកឡើងផងដែរថា ជុំវិញ សំណង់បែបប៊ូយ៉ុងថោននេះ គឺជាអ្វីដែលរាជរដ្ឋាភិបាលកម្ពុជាចង់បានសម្រាប់ប្រជាជនកម្ពុជា ដើម្បីប្រែក្លាយពីផ្ទះល្វែងបែបសាមញ្ញ មក លំនៅឋានប្រមូលផ្តុំបែបទំនើប និងជាការផ្លាស់ប្តូរនូវផ្នត់គំនិតរបស់ប្រជាជនកម្ពុជា និងចង់ឃើញប្រជាជនកម្ពុជាទៅថ្ងៃអនាគត់ មាន វប្បធម៌ អរិយធម៌ ទំនៀបទម្លាប់ ប្រពៃណី ឈ្លៀសវៃ និងមានសមត្ថភាពខ្ពស់ ហើយនេះក៏ជាការចូលរួម ឆ្លើយតបទៅនិងទស្សនៈវិស័យ វែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា៕

អត្ថបទ៖ សុន រ៉ាឌី