តាមរយៈប្រអប់បណ្តឹងអនាមិក ក្រសួងការងារទទួលបានបណ្តឹងចំនួន១២ ខណៈទើបដាក់ឲ្យ​ដំណើរការ​ថ្មីៗនេះ

បន្ទាប់ពីក្រសួងការងារ និងបណ្តុះបណ្តាលវិជ្ជាជីវៈ បានដាក់ឱ្យដំណើរ​ការ​នូវ​ប្រអប់​បណ្តឹង​អនាមិក កាលពីថ្ងៃទី៩ ខែតុលាកន្លងទៅ ដែលសាធារណជនអាចដាក់ពាក្យបណ្តឹងអនាមិក។ គិត​មកដល់ពេលនេះ ក្រសួងការងារទទួលពាក្យបណ្តឹងរហូតចំនួន ១២បណ្តឹង ពីជនអនាមិក។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​មាន​ប្រសាសន៍ប្រាប់ព័ត៌មាន ប៊ីធីវី ឲ្យដឹងនាល្ងាចថ្ងៃទី១១ ខែតុលា ថា គោលបំណង​ការ​ដាក់​ឱ្យ​ដំណើរការនូវប្រអប់បណ្តឹងអនាមិកនេះ គឺដើម្បីឲ្យសាធារណជនធានានូវគណនេយ្យភាព តម្លាភាព និងសុចរិតភាពនៃការផ្តល់សេវាសាធារណៈរបស់ក្រសួង ក៏ដូចជាដើម្បីបង្ការ ការឆបោក ឬការមិនទទួលខុសត្រូវរបស់បុគ្គលណាមួយ ក៏ដូចជាដើម្បី​ទទួល​បាន​ការ​ឆ្លើយ​តប​ពី​ក្រសួង​នូវ​រាល់​មតិ ឬសំណើរនានា ព្រមទាំងឆ្លើយតបទៅនឹងចម្ងល់ ឬភាពមិនពេញចិត្ត ឬភាពមន្ទិល​សង្ស័យ ឬចង់ប្តឹងបុគ្គលណាមួយ ដោយពុំមាន​តម្រូវ​ឲ្យ​បង្ហាញ​អត្ត​សញ្ញាណ​របស់​ម្ចាស់​បណ្តឹង​នោះ​ឡើយ​។

ពាក់ព័ន្ធការដាក់ឱ្យដំណើរការនូវប្រអប់បណ្តឹងអនាមិកខាងលើនេះ លោក ហ្វា សាលី ប្រធាន​សម្ព័ន្ធ​សហជីពជាតិ បានលើកឡើងពីការគាំទ្រ និងមានសុទិដ្ឋិនិយមថា ចំពោះ​អ្វី​ដែល​ចំណាត់​ការ​របស់​ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ដែលបាន​យក​ចិត្ត​ទុក​ដាក់​ទៅលើបញ្ហាបណ្តឹងអនាមិកនេះ ពីព្រោះកន្លងទៅ រាល់ពាក្យបណ្តឹងផ្សេងៗ គឺប្រជា​ពលរដ្ឋ ពិបាកក្នុងការប្តឹងនូវការព្រួយបារម្ភ ជាពិសេសកម្មករនិយោជិតដែលបារម្ភថា នៅពេល​ដែល​បង្ហាញអត្តសញ្ញាណ ធ្វើឲ្យពួកគាត់ ឬនិយោជក ឬក៏ធ្វើឲ្យភាគីណាមួយដឹង អាចនឹង​បញ្ឈប់​ពី​ការងារ ឬជាការគុំគួនជាដើម។

កាលពីថ្ងៃ​ទី៩ ខែតុលា ឆ្នាំ២០២៤កន្លងទៅ ក្រសួងការងារ និងបណ្តុះបណ្តាលវិជ្ជាជីវៈ បាន​ចេញ​សេចក្តីជូនដំណឹងស្តីពី ការដាក់ឱ្យដំណើរការនូវប្រអប់បណ្តឹងអនាមិក ដើម្បី​ធានា​នូវ​គណនេយ្យភាព តម្លាភាព និងសុចរិតភាពនៃការផ្តល់សេវាសាធារណៈរបស់ក្រសួងការងារ និងបណ្តុះ​បណ្តាលវិជ្ជាជីវៈ ដែលសាធារណជនអាចដាក់ពាក្យបណ្តឹងអនាមិក តាមរយៈ​គេហទំព័រ​របស់ក្រសួង ឬអាចភ្ជាប់តាមរយៈការស្កេន QR Code ដែលភ្ជាប់ជូនក្នុងឯកសារ។

ជាមួយនេះ ក្រសួងការងារ ក៏បានលើកទឹកិត្តដល់សាធារណជន កម្មករនិយោជិត និងនិយោជក ប្រើប្រាស់នូវប្រអប់បណ្តឹងអនាមិកនេះ ដើម្បីទទួលបានការឆ្លើយតបពីក្រសួងនូវរាល់មតិ ឬសំណើរនានា ព្រមទាំងឆ្លើយតបទៅនឹងចម្ងល់ ឬភាពមិនពេញចិត្ត ឬភាពមន្ទិលសង្ស័យ ឬចង់ប្តឹងបុគ្គលណាមួយ ដោយពុំមានតម្រូវឲ្យបង្ហាញអត្តសញ្ញាណរបស់ម្ចាស់បណ្តឹងនោះឡើយ៕ អត្ថបទ៖ ឈិត បូរ៉ាវី