សម្តេចធិបតី ប្រាប់ក្រសួងសាធារណការពន្លឿនឲ្យចប់ ការចុះ​អនុស្សរណៈក្នុងការកសាងផ្លូវដែកឲ្យ បានឆាប់

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ណែនាំឲ្យរដ្ឋមន្រ្តីក្រសួង​សាធារណការ និងដឹកជញ្ជូន ពន្លឿនឲ្យឆាប់ចប់ក្នុងការចុះអនុស្សរណៈ (MOU) ជាមួយក្រុមហ៊ុន ឬភាគីពាក់ព័ន្ធក្នុងការកសាងផ្លូវដែក ដើម្បីជំរុញការដឹក​ជញ្ជូន​នៅប្រទេសកម្ពុជា​ឲ្យកាន់តែល្អ​ប្រសើរបន្ថែមទៀត។

ក្នុងឱកាសអញ្ជើញជាអធិបតីចូលរួមអបអរសាទរខួប ២០ឆ្នាំ នៃកម្ពុជាចូលជាសមាជិកអង្គការ​ពាណិជ្ជកម្មពិភពលោក (WTO) នៅថ្ងៃទី១៤ខែតុលា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ធ្វើយ៉ាងណា​ចចារ​ឲ្យចប់សព្វគ្រប់ក្នុងដំណាច់ឆ្នាំនេះ ចំពោះផ្លូវដែកនេះ ខណៈផ្លូវដែកនេះ គឺមានសារៈសំខាន់ខ្លាំងណាស់ ក្នុងការដឹកជញ្ជូន មិនត្រឹមតែដឹក​ជញ្ជូនមនុស្សតែមួយប៉ុណ្ណោះទេ គឺធ្វើការដឹកបានទំនិញគ្រប់បែបយ៉ាងទាំងអស់ ដោយវាបានកាត់បន្ថយទាំងេលវេលា ​និងការចំណាយជាដើម។

សម្តេចធិបតី នាយករដ្ឋមន្រ្តីនៃកម្ពុជា បានលើកឡើងផងដែរថា ដរាបណា​យើងនិយាយអំពីវិស័យ​ពាណិជ្ជកម្ម ​យើងត្រូវតែនិយាយអំពីវិស័យដឹកជញ្ជូន និងឡូជីស្ទីកផងដែរ ដូច្នេះហើយ​បានរាជរដ្ឋាភិបាលខិតខំពង្រឹង ការកសាងនូវហេដ្ឋារចនាសម្ព័ន្ធបន្ថែមទៀត ​ទាំងផ្លូវគោក ទឹក និងអាកាសនោះ។

សម្តេច បានបន្ថែមថា រាជរដ្ឋាភិបាលនឹងពង្រឹង​ និងធ្វើនូវមជ្ឈមណ្ឌល​ភស្តុភារកម្ម ដោយបានរៀបចំ​នូវឡូជីស្ទីកហិប ដើម្បី​សមស្របជាប្រទេស​ដែល​មាន​សក្ដានុពល​តភ្ជាប់ មាន​ដំណើរការល្អ និង​មានភាព​ទាក់ទាញ ​និងក៏ដើម្បីកាត់បន្ថយតម្លៃនៃការឆ្លងកាត់ជាដើម។

សម្តេចធិបតី លើកឡើងទៀតថា គម្រោងទាំងអស់នេះហើយដែលបានជួយច្រើនដល់ការពង្រឹង និងជំរុញវិស័យ​ពាណិជ្ជកម្ម ​និងការទាក់ទាញអ្នក​វិនិយោគនៅ​ ក្រៅប្រទេសឲ្យ​មក​ប្រទេសកម្ពុជា កាន់តែច្រើនបន្ថែមទៀតនោះ៕អត្ថបទបាន ចក់