រដ្ឋបាលខេត្តកណ្តាលនឹងរៀបចំកម្មវិធីសប្បាយរីករាយជាច្រើន សម្រាប់ពិធីប្រណាំងទូក​សប្តាហ៍នេះ

នៅថ្ងៃទី១៧ ខែតុលានេះ ព្រឹត្តិការណ៍ប្រណាំងទូក ខេត្តកណ្តាល រយៈពេល២ថ្ងៃ នឹ​ង​ឈាន​មកដល់។ នៅថ្ងៃទី១៤ ខែតុលានេះដែរ នៅគ្រប់ទីតាំងរៀបចំពិធីប្រណាំងទូក ស្តង់តាំង​ពិព័រណ៍​ផលិត​ផល វប្បធម៌ សេវាកម្ម ខេត្តកណ្តាល ឆាកប្រគំតន្ត្រី និងទីតាំង​កម្សាន្ត​សប្បាយ​នានា​បាន​និង​កំពុង​ពន្លឿនការរៀបចំឲ្យហើយមុនថ្ងៃពិធីប្រណាំងទូកឈានមកដល់។

លោក ឌឹម បូរ៉ា អភិបាលរង និងជាអ្នកនាំពាក្យសាលាខេត្តកណ្តាល ថ្លែងប្រាប់ BTV នៅថ្ងៃទី១៤ ខែ​តុលានេះថា នៅក្នុងព្រឹត្តិការណ៍ប្រណាំងទូកខេត្តកណ្តាល អបអរសាទរ ព្រះរា​ជ​ពិធី​បុណ្យ​អុំទូក បណ្តែតប្រទីប អកអំបុក និងសំពះព្រះខែ ឆ្នាំ២០២៤នេះ រដ្ឋបាលខេត្ត​បាន​រៀបចំ​កម្ម​វិធី​អបអរ​សាទរជាច្រើន ហើយរំពឹងថា ព្រឹត្តិការណ៍អុំទូកនេះ នឹងទាក់ទាញពលរដ្ឋ និងភ្ញៀវ​ទេសចរ​ជាតិ អន្តរជាតិ ចូលរួមដើរទស្សនាកម្សាន្តសប្បាយ នៅសួនច្បារមាត់ទន្លេក្រុងតាខ្មៅ ខេត្ត​កណ្តាល កើនលើសឆ្នាំកន្លងទៅ។

លោកបញ្ជាក់ថា នៅក្នុងព្រឹត្តិការណ៍ប្រណាំងទូកនេះ ក្រៅពីមានរៀបចំការប្រគំតន្ត្រីខ្នាតធំ រដ្ឋបាល​ខេត្តក៏បានរៀបចំស្តង់ពិព័រណ៌ភូមិមួយផលិតផលមួយ និងពិព័រណ៌ម្ហូបអាហារ ផលិតផល សេវាកម្មផ្សេងៗទៀតយ ប្រមាណជាង១១០ស្តង់ និងមានបណ្តែតប្រទីប បាញ់កំាជ្រួចហ្វូងជាច្រើនទៀត។

នៅក្នុងពិធីប្រណាំងទូកខេត្តកណ្តាល មានកីឡាករ កីឡាការនី​ចូល​រួម​ប្រកួត​ប្រមាណ​ជិត​៤០០០​នាក់ បើតាមក្រុមកីឡាករ ដែលបានហ្វឹកហាត់ត្រៀមចូលរួមប្រណាំងទូកនៅក្រុងតាខ្មៅ បាន​ថ្លែង​បញ្ជាក់​ថា អស់រយៈជាងមួយសប្តាហ៍ដែលក្រុមកីឡាអុំទូក បានខំប្រឹងហ្វឹកហាត់ ដើម្បីយកឈ្នះ ក្នុងកម្មវិធីប្រណាំងទូកនោះឲ្យបាន ហើយព្រមជាមួយគ្នានេះ ក្រុមកីឡាក៏បានអំពាវនាវពលរដ្ឋ និងភ្ញៀវទេសចរជិតឆ្ងាយនានាចូលរួមទស្សនាការប្រណាំងទូកនេះឲ្យបានច្រើន។

សូមបញ្ជាក់ថា ពិធីប្រណាំងទូក ខេត្តកណ្តាល ដែលប្រារព្ធ​នៅសួ​នច្បារមាត់​ទន្លេ​បាសាក់​នៅ​ក្រុង​តាខ្មៅ រយៈពេល២ថ្ងៃ ពីថ្ងៃទី១៧ដល់ថ្ងៃទី១៨ ខែតុលា ក្នុងសប្តាហ៍នេះ ទិន្នន័យបឋម មានទូក​ចូលរួម​ប្រកួតចំនួន ៦៥ទូក ក្នុងនោះមាន៖ ទូកខ្នាតអន្តរជាតិបុរស ចំនួន ២៥ទូក និងទូកអុំបុរស ៣៤ ទូកចែវ ៦ទូក និងកីឡាករសរុប ៣៩៩៤នាក់ បានចុះឈ្មោះចូលរួមប្រកួត ហើយបច្ចុប្បន្ន ក្រុមការងារអនុគណៈកម្មការរៀបចំបាននិងកំពុងបន្តទទួលចុះឈ្មោះចូលរួមប្រកួតបន្តទៀត៕ អត្ថបទ ស៊ុម សុខជា