ក្រសួងការងារអំពាវនាវពលរដ្ឋឲ្យប្រុងប្រយ័ត្នខ្ពស់ពីការឆបោករបស់មេខ្យល់អូសទាញទៅធ្វើការខុសច្បាប់នៅប្រទេសថៃ

ខណៈមានការអូសទាញពីមេខ្យល់ និងក្រុមហ៊ុនមួយចំនួន ធ្វើការ​អូសទាញ​ឲ្យ​ចូល​ទៅ​ប្រទេស​ថៃ​ដោយ​ខុស​ច្បាប់។ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តី​ជូន​ដំណឹង​ដល់​ប្រជាពលរដ្ឋ ពិសេសពលករ ត្រូវប្រុងប្រយ័ត្នខ្ពស់ ជៀសវាងការ​ចាញ់​បោក​តាមរយៈ​ការ​ផ្សព្វ​ផ្សាយ​​ព័ត៌មានមិនពិត។

ក្រសួងការងារ និងបណ្តុះបណ្តាលវិជ្ជាជីវៈ នៅក្នុងសេចក្តីជូនដំណឹង ចុះថ្ងៃទី១៤ ខែតុលានេះ បាន​ជូនដំណឹងដល់សាធារណជន ជាពិសេសពលករកម្ពុជា ដែលកំពុងស្នាក់នៅ និងធ្វើការ​នៅ​ប្រទេស​ថៃ និងប្រជាពលរដ្ឋកម្ពុជាដែលមានបំណងស្វែងរកការងារធ្វើនៅប្រទេសថៃថា ថ្មីៗ​នេះ​មាន​ការ​អូសទាញបងប្អូនពីមេខ្យល់ និងក្រុមហ៊ុនមួយចំនួនឱ្យចូលទៅ ប្រទេស​ថៃ​តាម​ទិដ្ឋាការ​ទេសចរណ៍ និងពុំមានឯកសារគ្រប់គ្រាន់ ដើម្បីរង់ចាំ​ចុះ​ឈ្មោះធ្វើកា​រ​តាម​សេចក្តីសម្រេច​រប​ស់​គណៈ​រដ្ឋ​មន្ត្រីថៃ កាលពីថ្ងៃទី២៤ ខែកញ្ញា ឆ្នាំ២០២៤។ ក្រសួងបានបញ្ជាក់ថា ការចុះឈ្មោះនេះ នឹងអនុវត្តសម្រាប់តែពលករកំពុងស្នាក់នៅ និងធ្វើការនៅប្រទេសថៃស្រាប់ជាមយនិយោជក (ថៅកែ) ប៉ុន្តែមិនមានឯកសារគ្រប់គ្រាន់ប៉ុណ្ណោះ ដោយមិនរាប់បញ្ចូលពលករដែលទើបឆ្លងដែនចូលប្រទេសថៃថ្មីៗនេះទេ។

ក្នុងលិខិតដដែលនេះ ក្រសួងការងារ និងបណ្តុះបណ្តាលវិជ្ជាជីវៈ បានរម្លឹកឲ្យពលករប្រុងប្រយ័ត្នខ្ពស់ ជៀសវាងការចាញ់បោកមេខ្យល់ តាមរយៈការផ្សព្វផ្សាយព័ត៌មានមិនពិតក្នុងន័យអូសទាញអោយឆ្លងដែនទៅធ្វើការ នៅប្រទេសថៃដោយគ្មានឯកសារស្របច្បាប់ ដែលអាចបណ្តាលឱ្យខាតបង់ពេលវេលា ប្រាក់កាស និងអាចធ្លាក់ខ្លួន ជាជនរងគ្រោះ នៃអំពើជួញដូរមនុស្ស និងការកេងប្រវ័ញ្ចកម្លាំងពលកម្ម ព្រមទាំងប្រឈមមុខនឹងវិធានការច្បាប់របស់ប្រទេសថៃ។ សម្រាប់ព័ត៌មានបន្ថែមអំពីការងារនៅប្រទេសថៃដោយស្របច្បាប់ សាធារណជន ក៏ដូចអ្នកមានបំណងស្វែងរកការងារធ្វើនៅប្រទេសថៃ សូមទំនាក់ទំនងទៅកាន់ក្រសួងការងារ ឬតាមរយៈប្រព័ន្ធនានាដែលក្រសួងភ្ជាប់ជូនក្នុងសេចក្តីជូនដំណឹងនេះ៕ អត្ថបទ ឈិត បូរ៉ាវី