មេដឹកនាំកូរ៉េខាងជើង រៀបចំកិច្ចប្រជុំផ្នែកសន្តិសុខ ខណៈភាពតានតឹងជាមួយទីក្រុងសេអ៊ូល កើនឡើង

ប្រព័ន្ធផ្សព្វផ្សាយរដ្ឋកូរ៉េខាងជើង បានរាយការណ៍ថា មេដឹកនាំរបស់ខ្លួនលោក Kim Jong Un បានកោះប្រជុំផ្នែកសន្តិសុខជាតិកម្រិតខ្ពស់មួយកាលពីថ្ងៃចន្ទ១៤តុលាដើមសប្ដាហ៍នេះ ដោយដឹកនាំផែនការនៃសកម្មភាពយោធាភ្លាមៗ ស្របពេលមានភាពតានតឹងកើនឡើងជាមួយកូរ៉េខាងត្បូង។

កិច្ចប្រជុំនៅទីក្រុងព្យុងយ៉ាង មានការចូលរួមពីមន្ត្រីសន្តិសុខកំពូលៗរបស់ប្រទេសនេះ រួមទាំងមេទ័ព និងមន្ត្រីយោធាផ្សេងទៀត ព្រមទាំងរដ្ឋមន្ត្រីក្រសួងសន្តិសុខ និងការពារជាតិផងដែរ។

ទីភ្នាក់ងារសារព័ត៌មានកណ្ដាលកូរ៉េខាងជើង KCNA បានរាយការណ៍ថា មេដឹកនាំកំពូលរបស់ខ្លួនបានដាក់ចេញទិសដៅនៃសកម្មភាពយោធាភ្លាមៗ ហើយបានបង្ហាញពីការងារសំខាន់ៗដែលត្រូវបំពេញក្នុងប្រតិបត្តិការរារាំងសង្គ្រាម និងការអនុវត្តសិទ្ធិការពារខ្លួន ។

កិច្ចប្រជុំនេះ ធ្វើឡើង ខណៈប្រទេសមានអាវុធនុយក្លេអែរកូរ៉េខាងជើងនេះ បានចោទប្រកាន់ទីក្រុងសេអ៊ូល ពីបទបង្ហោះយានដ្រូនពីលើរដ្ឋធានីរបស់ខ្លួន និងការពង្រាយកងទ័ពទៅកាន់ព្រំដែនរបស់ខ្លួន ដោយកូរ៉េខាងត្បូងបាននិយាយកាលពីថ្ងៃចន្ទថា ខ្លួនបានត្រៀមខ្លួនរួចរាល់ហើយ ដើម្បីឆ្លើយតបប្រសិនបើមានការបាញ់ប្រហារណាមួយនោះ។

ទីភ្នាក់ងារសារព័ត៌មាន KCNA បានរាយការណ៍ដោយសំដៅដល់ការបង្ហោះយានដ្រូនពីសំណាក់កូរ៉េខាងត្បូងថា មន្ត្រីនៅក្នុងកិច្ចប្រជុំនៅទីក្រុងព្យុងយ៉ាងបានស្តាប់របាយការណ៍មួយស្តីពីការបង្កហេតុដ៏ធ្ងន់ធ្ងររបស់សត្រូវ។ កាលពីថ្ងៃចន្ទ១៤តុលាដដែលនោះកូរ៉េខាងត្បូង បានបង្ហើបឲ្យដឹងថា កូរ៉េខាងជើងកំពុងត្រៀមបំផ្ទុះផ្លូវឆ្លងកាត់ព្រំដែន ដែលមានការប្រឈមដាក់គ្នាផ្នែកយោធាខ្លាំងបំផុត ជាមួយកូរ៉េខាងត្បូង ស្របពេលកម្ដៅសង្គ្រាមពាក្យសម្តីកាន់តែកញ្ជ្រោលឡើងខ្លាំងជុំការចោទប្រកាន់ក្រុងសេអ៊ូលពីបទបង្ហោះយានដ្រូនលើក្រុងព្យុងយ៉ាង៕