ការងារជាង ៣ម៉ឺនកន្លែងត្រៀមបង្ហាញក្នុងពិព័រណ៍ការងារ និងផលិតភាពជាតិឆ្នាំ២០២៤ សប្តាហ៍ក្រោយ

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹង​រៀបចំ “ពិព័រណ៍ការងារ និងផលិតភាពជាតិឆ្នាំ២០២៤” នៅថ្ងៃទី២៦ និង២៧ ខែតុលា នៅ​សាល​ពិព័រណ៍​កោះពេជ្រជាមួយឱកាសការងារចំនួនជាង ៣០,០០០ កន្លែងពីក្រុមហ៊ុន រោងចក្រ និង​សហគ្រាស​ចំនួន១៥០ នៅក្នុងប្រទេសកម្ពុជា។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ក្នុងសន្និសីទសារព័ត៌មានស្តីពី ពិព័រណ៍ការងារ និងផលិតភាពជាតិ នៅព្រឹកថ្ងៃទី១៧ ខែ​តុលា​នេះ បានមានប្រសាសន៍ឲ្យដឹងថា ព្រឹត្តិការណ៍ការងារនាពេលខាងមុខនេះ នឹងប្រមូល​ផ្តុំ​និយោជក​ធំៗ​គ្រប់​វិស័យប្រមាណ១៥០ ដែលរំពឹងថា បើកឱកាសការងារថ្មីៗថែមទៀតចំនួនជាង ៣ម៉ឺន​កន្លែង ដើម្បីប្រកាសជ្រើសរើសបេក្ខជនគ្រប់មុខតំណែង ស្របតាមចំណេះ ជំនាញ និង​សមត្ថភាព។ ក្នុងនោះវិស័យនាំមុខគេរួមមាន៖ ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង , សេវា​កម្មលក់ដុំ និងរាយ, ទេសចរណ៍ និងបដិសណ្ឋារកិច្ច, ម្ហូបអាហារនិងភេសជ្ជៈ , អចលន​ទ្រព្យ , សេវាកម្ម និងវិស័យឧស្សាហកម្ម និងកម្មន្តសាលជាដើម។

ឯកឧត្តមបានបញ្ជាក់ថា គិតត្រឹមឆ្នាំ២០២៤នេះ គឺជាឆ្នាំទី១៤ ដែលក្រសួង​រៀបចំ​​ពិព័​រណ៍កា​រងារ​ថ្នាក់​ជាតិ​នេះឡើង ក្នុងគោលបំណង ដើម្បីបន្ត​រក្សាតុល្យភាពក្នុងទីផ្សារការងារ តាមរយៈការជួយ​ជ្រោមជ្រែង​និយោជក ដែលមានតម្រូវការជ្រើសរើសកម្លាំងពលកម្ម និងអ្នកស្វែងរកការងារធ្វើ ក៏​ដូច​ជា បង្កើតឱ្យមានវេទិកាការងារជួបជុំគ្នានៅមួយកន្លែង ដោយងាយស្រួល រវាងអ្នក​ស្វែង​រក​ការងារ និយោជក អ្នកផ្តល់ការអប់រំបណ្ដុះបណ្ដាល និងដៃគូពាក់ព័ន្ធនានា ដើម្បីធ្វើការផ្លាស់ប្ដូរ និង​ចែករំលែកព័ត៌មានទីផ្សារការងារ។

សូមបញ្ជាក់ថា ក្រៅពីកម្មវិធីពិព័រណ៍ការងារ ក៏នឹងមានរួមបញ្ចូលសិក្ខាសាលាស្តីពីផលិតភាព​ថ្នាក់​ជាតិ ដើម្បីលើកកម្ពស់ការយល់ដឹង និងបំផុសគំនិតទាក់ទងនឹង ផលិតភាព តាមរយៈ​ការ​ចែក​រំលែក​ចំណេះដឹង បទពិសោធន៍ល្អៗ និងគន្លឹះសំខាន់ៗ ពីសំណាក់វាគ្មិនជំនាញៗ និងផ្សព្វផ្សាយ លើក​កម្ពស់ការយល់ដឹងពីសារៈសំខាន់នៃការបង្កើនផលិតភាពការងារ និងបង្ហាញ​ពី​ការ​វិវត្ត​បច្ចេក​វិទ្យាថ្មីៗ​ដែល​ប្រទេសជឿនលឿន និងប្រទេសកំពុងអភិវឌ្ឍ​មួយ​ចំនួ​ន​ប្រើប្រា​ស់​ដើម្បី​គ្រប់​គ្រង​ការងារ និងខ្សែសង្វាក់ផលិតកម្ម ជាពិសេសបំផុសស្មារតី និងពង្រីក​ប្រសិទ្ធ​ភាព​ការងារ​ក្នុង​បរិបទ​ការងារ​តាម​គន្លងប្រក្រតីថ្មី៕ អត្ថបទ៖ ឈិត បូរ៉ាវី