ពិព័រណ៍ការងារ និងផលិតភាពជាតិចុងខែតុលានេះរំពឹងទាក់ទាញ​អ្នកចូលរួម​ទស្សនា​ប្រមាណ ៤ម៉ឺននាក់

ខណៈនៅសប្តាហ៍ខាងមុខនេះ “ពិព័រណ៍ការងារ និងផលិតភាពជាតិឆ្នាំ២០២៤” នឹង​ត្រូវ​រៀប​ចំ​ឡើង​។ ក្រសួងការងារ និងបណ្តុះបណ្តាលវិជ្ជាជីវៈ រួមជាមួយបណ្តាក្រុមហ៊ុននានា បានអំពាវនាវ​ដល់​សិស្សានុសិស្ស និស្សិត និងអ្នកស្វែងរកការងារ ចូលរួមឲ្យបានច្រើនកុះករ ដើម្បីស្វែង​យល់​ស្ថានភាព​ទីផ្សារ​ការងារ ក៏ដូចជាការវិវត្តបច្ចេកវិទ្យាថ្មីៗដែលប្រទេសជឿនលឿន និងប្រទេសកំពុង​អភិវឌ្ឍ​មួយ​ចំនួនបានកំពុងប្រើប្រាស់។

ក្នុងសន្និសីទសារព័ត៌មាន នាព្រឹកថ្ងៃទី១៧ ខែតុលានេះ ឯកឧត្តម កត្តា អ៊ន រដ្ឋលេខាធិការ និងជា​អ្នក​នាំពាក្យរបស់ក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ពិព័រណ៍​ការងារ និងផលិតភាពជាតិឆ្នាំ២០២៤នេះ មានការចូលរួមពីសំណាក់ក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ១៥០ ហើយមានស្តង់សរុបជាង ១៨០ ដែលនឹងដាក់តាំងបង្ហាញពីឱកាសការងារយ៉ាងច្រើនសំបូរបែប ដែលនឹង​ផ្តល់​ឱកាស​ការងារ​រហូត​ដល់ជាង ៣ម៉ឺនកន្លែង ដែលនឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៦-២៧ ខែ​តុលា ឆ្នាំ២០២៤ នៅអាគារពិព័រណ៍កោះពេជ្រ ចាប់ពីម៉ោង ៨ព្រឹក ដល់ម៉ោង ៨យប់ ក្នុង​គោល​បំណង​ដើម្បី​បន្ត​រក្សា​តុល្យភាព​ក្នុង​ទីផ្សារ​ការងារ​ តាមរយៈ​ការ​ជួយ​ជ្រោម​ជ្រែង​និយោជក​ដែល​មាន​តម្រូវ​ការ​ជ្រើសរើសកម្លាំងពលកម្ម និងអ្នកស្វែងរកការងារធ្វើ, បង្កើតឱ្យមានកន្លែងជួបជុំគ្នាដ៏ធំ និ​ង​ងាយស្រួលរវាងអ្នកស្វែងរកការងារ និយោជក អ្នកផ្តល់ការអប់រំបណ្ដុះបណ្ដាល និងដៃគូ​ពាក់​ព័ន្ធ​នានា ដើម្បីធ្វើការផ្លាស់ប្ដូរ និងចែករំលែកព័ត៌មានទីផ្សារការងារ ហើយក៏មាន​ការ​រៀបចំ​ផង​ដែល​នូវ​សិក្ខាសាលាផលិតភាព ដើម្បីលើកកម្ពស់ការយល់ដឹងស្តីពី ការបង្កើន​ផលិត​ភាព​ការងារ​ដោយ​មាន​ការចែករំលែកចំណេះដឹង និងបទពិសោធន៍ពីវាគ្មិនជំនាញជាច្រើន។

លោក សន ប៊ុនមាន ប្រធានលេខាធិការដ្ឋាន ស.ស.យ.ក រាជធានីភ្នំពេញ បានចាត់ទុក​ពិព័រណ៍​ការងារ​នេះ គឺជាឱកាសដ៏ល្អសម្រាប់យុវជនទៅស្វែងរកការងារ និងស្វែងយល់​ពី​តម្រូវ​ការ​ជំនាញ​ក្នុង​ទីផ្សារ​ការងារ ហើយលោកក៏បានអំពាវនាដល់យុវជនទាំងអស់ឲ្យរៀបចំ CV ឲ្យបានច្រើន​ដើម្បី​ដាក់​ពាក្យ និងសម្ភាសការងារភ្លាមៗនៅក្នុងព្រឹត្តការណ៍នេះផងដែរ។

លោក កាំង ម៉ូនីកា អគ្គលេខាធិការរងនៃសមាគម TAFTAC បាន​សង្កត់​ធ្ងន់​លើ​សារៈ​សំខាន់នៃ​ផលិត​ភាព​ការងារនៅក្នុងទីផ្សារការងារនាពេលបច្ចុប្បន្នផងដែរ ដោយលោកបញ្ជាក់ថា ការរៀប​ចំ​ពិព័រណ៍​ការងារ និងផលិតភាពជាតិនេះ គឺមិនអាចមិនគិតពីប្រធានបទផលិតភាពការងារបានទេ ព្រោះ​ក្រុមហ៊ុន រោចក្រ សហគ្រាសដែលជ្រើសរើសបុគ្គលិកមកធ្វើការ គឺតែង​តែ​យក​ចិត្ត​ទុក​ដាក់​លើ​ផលិតភាពការងាររបស់បុគ្គលិកខ្លួន។

ពិព័រណ៍ការងារ និងផលិតភាពជាតិ ឆ្នាំ២០២៤ ក្រៅពីការរៀបចំដោយផ្ទាល់នៅអគារកោះពេជ្រ កម្មវិធីនេះ ក៏នឹងត្រូវរៀបចំតាមប្រព័ន្ធអនឡាញផងដែរ ដែលអ្នកស្វែង​រក​ការងារ​ធ្វើ​នៅ​ទូទាំង​ប្រទេស អាចដាក់ពាក្យស្វែងរកការងារធ្វើតាមប្រព័ន្ធអនឡាញបានតាមរយៈ គេហទំព័រ​ពិព័រណ៍​ការងារ​។

សូមបញ្ជាក់បន្ថែមថា ព្រឹត្តិការណ៍ដ៏ធំមួយនេះ រៀបចំឡើងក្រោមកិច្ចសហការ រវាងទីភ្នាក់​ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ , សហភាពសហព័ន្ធយុវជនកម្ពុជារាជធានីភ្នំពេញ , សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា, មូលនិធិអភិវឌ្ឍន៍ជំនាញ (SDF) និងមានការគាំទ្រដោយអង្គការអន្តរជាតិខាងការងារ (ILO) រួមនិងដៃគូពាក់ព័ន្ធជាច្រើនទៀត៕

អត្ថបទ៖ ឈិត បូរ៉ាវី