ព្រឹតិ្តការណ៍ប្រណាំងទូកខេត្តកណ្តាលបង្ហាញអត្តសញ្ញាណវប្បធម៌ខ្មែរជាច្រើនជូនមហាជនទស្សនា

នៅថ្ងៃទី១៧ ខែតុលានេះ ជាថ្ងៃទី១ ព្រឹត្តិការណ៍អុំទូកខេត្តកណ្តាល អបអរសាទរ​ពិធី​បុណ្យ​ចេញ​វស្សា និងអបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ។ ក្នុង​ព្រឹត្តិការណ៍​ប្រណាំងទូកនេះ បណ្តាក្រុមកីឡាប្រណាំង​ទូក​បាន​រៀបចំ​កម្ម​វិធី​អបអរ​បែប​ប្រពៃណី​ជា​ច្រើន បង្ហាញអត្តសញ្ញាណវប្បធម៌ខែ្មរជាច្រើន ជូនមហាជនទស្សនា និងការបង្កើន​ឱកាស​សប្បាយ​រីករាយ ក្រោមម្លប់សន្តិភាពកម្ពុជា។

បណ្តាក្រុមកីឡាប្រណាំងទូកខេត្តកណ្តាល បានថ្លែងប្រាប់ BTV ថា នៅថ្ងៃទី១ កម្មវិធី​ប្រណាំង​ទូក​នេះ ក្រុមកីឡាករ មានការសប្បាយរីកជាខ្លាំង ដោយសារកម្មវិ​ធីប្រណាំង​នេះ​មាន​មហា​ជន​ច្រើន​កុះករ​ចូលរួមទស្សនាគាំទ្រផ្តល់កម្លាំងចិត្តបើទោះផ្ទៃមេឃមានភ្លៀងធ្លាក់ក៏ដោយ ហើយ​បន្ថែម​លើ​នេះ​មាន​អ្នកគាំទ្រខ្លះទៀត បានលេងឆៃយ៉ាំគាំទ្រអបអរ​ទូក​មក​ស្រុក​កំណើត​របស់ខ្លួ​ន​ដែល​បានប្រកួតឈ្នះនៅថ្ងៃនេះ។

ពលរដ្ឋទស្សនាគាំទ្រទូកមកពីឃុំសូភី ក៏ពលរដ្ឋនានាទៀត បានស្រែកអបអរទូក និងលេង​ឆៃយ៉ាំ​អបអរ​សាទរ​ទូកមកពីស្រុករបស់ខ្លួន ប្រកួតយកឈ្នះលើគូប្រកួតរបស់ខ្លួន ក្នុងទិដ្ឋភាព​សប្បាយ​រីករាយ។​

សូមបញ្ជាក់ថា ព្រឹត្តិការណ៍ប្រណាំងទូកនៅខេត្តកណ្តាល ប្រារព្វរយៈពេល២ថ្ងៃ ចាប់ពីថ្ងៃទី១៧ ដល់​ថ្ងៃ​ទី១៨ ខែតុលានេះ ដោយឡែកនៅព្រឹកថ្ងៃនេះដែរ ទូកទាំង៦៦ទូក សរុបកីឡាករ កីឡាការិនី​ប្រមាណជិត៤០០០នាក់ ក្នុងព្រឹត្តិការណ៍នេះ មានរៀបចំកម្មវិធី​អបអរ​សាទរ​ជា​ច្រើន​រួម​មាន​៖ ការតាំងពិព័រណ៍បង្ហាញផលិតផល អត្តសញ្ញាណខេត្តកណ្តាល ការប្រគំតន្ត្រីខ្នាតធំ បាញ់កាំជ្រួចចម្រុះព័រណ៌ជាច្រើនទៀត៕ អត្ថបទ ស៊ុម សុខជា