អុំទូកខេត្តបាត់ដំបងរយៈពេល២ថ្ងៃ ទទួលបានភ្ញៀវទេសចរ មកលេងកម្សាន្ដជាង ១លាននាក់

បាត់ដំបង៖ ក្នុងពិធីបុណ្យអុំទូក និងបណ្តែតប្រទីប នៃថ្ងៃចេញព្រះវស្សា នាស្ទឹងសង្កែ កណ្តាលក្រុងបាត់ដំបង មានរយៈពេល ០២ថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែតុលា ឆ្នាំ២០២៤នេះ ខេត្តបាត់ដំបងទទួលបានភ្ញៀវទេសចរជាតិ និងអន្តរជាតិដែលចូលមកលេងកម្សាន្តសរុបចំនួន ១,១៧៣,៣៨៦នាក់ កើនឡើងចំនួន ៧.១១% ធៀបឆ្នាំ២០២៣ មានត្រឹមចំនួន ១,០៩៥,៤៦២នាក់។ នេះបើតាមលោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង ចេញផ្សាយនៅយប់ថ្ងៃទី ១៧ ខែតុលា ឆ្នាំ​២០២៤នេះ។

លោក អ៊ុច អ៊ុភីនីស្សារ៉ា បានបន្ថែមថា ក្នុងចំណោមភ្ញៀវទេសចរទាំងអស់ នៅថ្ងៃដំបូងត្រូវ​និងថ្ងៃទី១៦ ខែតុលា ភ្ញៀវមានចំនួន ៤៦១,៧៩១នាក់ កើនឡើង ៩.៥១% ក្នុងនោះ មាន​ភ្ញៀវអន្តរជាតិចំនួន ២២៣នាក់ ។ ដោយឡែកសម្រាប់ភ្ញៀវទេសចរសម្រុកចូលលេង នៅថ្ងៃទី១៧ ខែតុលាវិញ មានចំនួន ៧១១,៥៩៥នាក់ កើនឡើង ៥.៦២% ក្នុងនោះភ្ញៀវទេសចរអន្តរជាតិមាន ចំនួន២៦៧នាក់។

មន្ត្រីជំនាញដដែល បានបញ្ជាក់បន្ថែមថា ចំនួនភ្ញៀវទេសចរដែលកើនឡើង​យ៉ាងគំហុក​រហូតជាង ១លាននាក់​បានចូលមកលេងក្នុងពិធីបុណ្យអុំទូក បណ្តែតប្រទីបក្នុងថ្ងៃ​ចេញព្រះវស្សាឆ្នាំេះ ដោយ​សារកត្តារួមផ្សំជាច្រើនរួមមាន៖ ការរៀបចំកែលំអសួនច្បារ ​សួនកម្សាន្ត លើកកម្ពស់​សម្រស់​ដងស្ទឹងសង្កែ ប្រកបដោយភាពបៃតង ​កត្តា​សន្តិសុខសណ្តាប់ធ្នាប់​ និង​អនាម័យ មាន​កងកម្លាំង​ប្រដាប់​អាវុធ ប្រជាការពារ ​នៅប្រចាំការដើម្បីជួយថែរក្សាសណ្តាប់ធ្នាប់ ​និងសន្តិសុខជូនភ្ញៀវ ,ការតុបតែងភ្លើងពណ៌តាមកំណាត់ផ្លូវសំខាន់ៗ ​មានបែងចែកមណ្ឌលកម្សាន្ត និងស្តង់តាំងពិព័រណ៍ផងដែរ៕