ព័ត៌មាន

កម្ពុជាលើកទឹកចិត្តវិនិយោគិនចិនមកបណ្តាក់ទុនលើវិស័យស្បែកជើងនៅកម្ពុជា

មន្រ្តីជាន់ខ្ពស់នៃរាជរដ្ឋាភិបាលកម្ពុជា បានលើកទឹកចិត្តដល់វិនិយោគិនចិន ឲ្យមកវិនិយោគលើវិស័យស្បែកជើងនៅកម្ពុជា ដើម្បីទទួលបានឱកាសពាណិជ្ជកម្ម និងវិនិយោគនៅកម្ពុជា ខណៈក្នុងឆ្នាំ២០២៣ ការវិនិយោគផ្ទាល់ពីបរទេសនៅកម្ពុជា សម្រេចបានក្នុងទំហំទឹកប្រាក់ចំនួន ៤៨,៤ប៊ីលានដុល្លារអាមេរិក ដោយបានកើនឡើងជិត ៨% ធៀបទៅនឹងឆ្នាំ២០២២។

នៅក្នុងពិធី ពិសាអាហារសាមគ្គីមហាគ្រួសាររបស់សមាជិកសមាគមស្បែកជើងកម្ពុជា កាលពីល្ងាចថ្ងៃទី១៩ ខែតុលា ឆ្នាំ២០២៤នេះ នៅទីក្រុងភ្នំពេញ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា ទោះបីជានារយៈពេលប៉ុន្មានឆ្នាំចុងក្រោយនេះ វិស័យសេដ្ឋកិច្ច-សង្គមនៅតាមបណ្តាលប្រទេសនានានៅទូទាំងពិភពលោក បានជួបប្រទះនឹងវិបត្តិធ្ងន់ធ្ងរដែលបង្កឡើងដោយសារជំងឺរាតត្បាតកូវីដ-១៩ ភាពមិនប្រកដប្រជា នៃសេដ្ឋកិច្ចសកលបង្កឡើងដោយនយោបាយគាំពារនិយម រវាងប្រទេសមហាអំណាច និងសង្រ្គាមនៅតំបន់មួយចំនួន ក៏សេដ្ឋកិច្ចកម្ពុជានៅតែបន្តងើបឡើងប្រកបដោយថាមវន្ត ដោយសារកត្តាសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច និងភាពជោគជ័យក្នុងការប្រយុទ្ធប្រឆាំងជំងឺកូវីដ-១៩ ដែលបានមកដោយសារកិច្ចខិតខំប្រឹងប្រែង និងការប្រកាន់នយោបាយត្រូវរបស់រាជរដ្ឋាភិបាលកម្ពុជា។

ដោយឡែក ក្នុងបទសម្ភាសន៍ជាមួយ អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា លោកបានឲ្យ ប៊ីធីវី ដឹងថា គិតក្នុងរយៈពេល ៩ខែ ឆ្នាំ២០២៤នេះ ការនាំចេញផលិតផលស្បែកជើងរបស់កម្ពុជាទៅកាន់ទីផ្សារអន្តរជាតិ មានកំណើនប្រមាណជាង ២៣% ក្នុងនោះក៏មាននាំចេញទៅកាន់ទីផ្សារប្រទេសចិនផងដែរ ដោយសារការដឹកនាំរបស់ប្រមុខរាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការ បានចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន ដើម្បីពង្រីកទីផ្សារនាំចេញ។

អ្នកឧកញ៉ា បានលើកឡើងបន្តថា នៅសល់រយៈពេលជាង ២ខែទៀត នឹងឈានដល់ឆ្នាំថ្មី ការនាំចេញផលិតផលស្បែកជើង នឹងមានទំហំកើនឡើងបន្ថែមទៀតថា ដោយសារការដឹកនាំដ៏ល្អ និងគតិបណ្ឌិតរបស់សម្តេចនាយករដ្ឋមន្រ្តី ហ៊ុន ម៉ាណែត ធ្វើឲ្យអ្នកវិនិយោគទាំងក្នុងតំបន់ និងនៅបណ្តាប្រទេសផ្សេងៗមានជំជឿទុកចិត្ត ម្ល៉ោះហើយជំរុញឲ្យកំណើននៃការនាំចេញក៏កាន់តែច្រើនឡើង។

សូមបញ្ជាក់ថា ការសម្រេចបាននូវកំណើនពាណិជ្ជកម្ម និងវិនិយោគរបស់កម្ពុជាចំនួនជិត ៨% គិតជាទឹកប្រាក់ចំនួន ៤៨,៤ប៊ីលានដុល្លារ ដោយសារបរិយាកាសអំណោយផលនៃការវិនិយោគ គោលនយោបាយរបស់រាជរដ្ឋាភិបាលកម្ពុជា ក្នុងការលើកទឹកចិត្តដល់ការវិនិយោគថ្មីៗ ក៏ដូចជាកិច្ចព្រមព្រៀងពាណិជ្ជកម្មសេរីខ្នាតធំរវាងកម្ពុជា និងដៃគូពាណិជ្ជកម្មជាយុទ្ធសាស្រ្តជាច្រើន ដូចជា៖ កិច្ចព្រមព្រៀងពាណិជ្ជកម្មសេរីកម្ពុជា-ចិន , កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ , កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម។ សូមជម្រាបជូនបន្ថែមថា កម្ពុជាស្ថិតនៅចំណាត់ថ្នាក់ទី១ ក្នុងឆ្នាំ២០២៤ សម្រាប់ប្រទេសមានកំណើនផលិតផលក្នុងស្រុកខ្លាំង និងថេរ អត្រាអតិផរណាទាប និងកំណើនយ៉ាងឆាប់រហ័សក្នុងវិស័យវិនិយោគផ្ទាល់ពីបរទេស៕ អត្ថបទ៖ ឈិត បូរ៉ាវី