បេក្ខជនចំនួន៩៣នាក់ ចូលរួមប្រកួតប្រជែងជំនាញថ្នាក់ជាតិកម្ពុជា លើកទី៩

ភ្នំពេញ៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃនេះ បាន​អញ្ជើញ​ចូលរួមជាអធិបតីក្នុងពិធីបើកកម្មវិធី «ការប្រកួតប្រជែងជំនាញថ្នាក់ជាតិកម្ពុជា លើកទី៩ ឆ្នាំ២០២៤» ដែលប្រព្រឹត្តទៅ ចាប់ពីថ្ងៃទី២១ ដល់ ២៥ ខែតុលា ឆ្នាំ២០២៤ នៅ​ក្នុង​សួន​អប់រំ​បណ្តុះ​បណ្តាល​បច្ចេកទេស និងវិជ្ជាជីវៈ រាជធានីភ្នំពេញ។

នៅក្នុងពិធីបើកកម្មវិធីនេះ ឯកឧត្តមរដ្ឋមន្រ្តី បានមានប្រសាសន៍ថា ការប្រកួតប្រជែង​ជំនាញ​ថ្នាក់​ជាតិ​កម្ពុជាមួយនេះ មានគោលបំណងបំផុសបំផុលឧត្តមភាពជំនាញ និងណែនាំ​ដល់​យុវជន​អំពី​ជំនាញ​ផ្សេងៗដែលមានមូលដ្ឋានលើវិជ្ជាជីវៈអាជីព ព្រមទាំងបំពាក់នូវមធ្យោបាយ និងធនធាន​ដែល​ត្រូវ​ការដើម្បីកសាងអនាគត ថែមទាំងបំផុស និងទាក់ទាញអ្នកជំនាន់ក្រោយ​ឱ្យស្វែងយល់​ពី​ភាព​ពាក់ព័ន្ធ និងសារៈសំខាន់នៃជំនាញ។

ឯកឧត្តមរដ្ឋមន្រ្តី បានលើកឡើងបន្តថា ការប្រកួតប្រជែងជំនាញនេះ ធ្វើឡើងជា​រៀង​រាល់​ពីរ​ឆ្នាំ​ម្តង ដែលជាព្រឹត្តិការណ៍សម្រាប់សិស្ស និស្សិតឆ្នើម និងអ្នកជំនាញ​វ័យក្មេងមកពីបណ្តា​សហគ្រាស​គ្រឹះស្ថាន ដើម្បីបង្ហាញពីទេពកោសល្យ ភាពច្នៃប្រឌិត និងចំណង់ចំណូល​ចិត្ត​ក្នុង​អាជីព​រៀងៗខ្លួន។ ការប្រកួតប្រជែងជំនាញនេះ បានផ្តល់ឱកាសដល់យុវជន គ្រូបណ្តុះបណ្តាល ស្ថាប័ន​បណ្តុះបណ្តាល ឧស្សាហកម្ម និងរាជរដ្ឋាភិបាលបានជួបប្រាស្រ័យទាក់ទង និង​រៀន​សូត្រ​ពី​គ្នា​ទៅ​វិញ​ទៅមក ស្វែងយល់នូវបច្ចេកវិទ្យា និងវិធីសាស្ត្រថ្មីៗ​ប្រកបទៅ​ដោយ​ភាព​ច្នៃ​ប្រឌិត​សម្រាប់​ការរៀន ការបង្រៀន និងការបណ្តុះបណ្តាលកម្លាំងពលកម្មនាពេលអនាគត ដើម្បី​ទទួល​បាន​ជំនាញ​តាមតម្រូវការក៏ដូចជាធ្វើឱ្យប្រសើរឡើងនូវភាពទាក់ទាញនៃជំនាញ។

ឯកឧត្តម ហេង សួរ បានរលើកទឹកចិត្តដល់បេក្ខជន ខិតខំប្រឹងប្រែងប្រើប្រាស់​ឱ្យ​អស់​នូវ​សមត្ថភាព ចំណេះដឹង ជំនាញ ទេពកោសល្យ និងភាពប៉ិនប្រសប់របស់ខ្លួន ក្នុង​ការ​ប្រកួត​ប្រជែង​ដណ្តើម​ជ័យលាភី ដោយត្រូវគោរព និងអនុវត្តទៅតាមលក្ខន្តិកៈ និងការណែនាំ​របស់​គណៈកម្មការ​សម្រាប់ការប្រកួតប្រជែង។ ឯកឧត្តម សង្ឃឹមយ៉ាងមុតមាំថា ការប្រកួត​ប្រជែង​ជំនាញ​ថ្នាក់ជាតិនេះ នឹងរកឃើញម្ចាស់ជ័យលាភីដែលមានទេពកោសល្យ និងសមត្ថភាពខ្ពស់ ដើម្បី​ជាបេក្ខជនតំណាងប្រទេសកម្ពុជាទៅចូលរួមប្រកួតប្រជែងជំនាញអាស៊ាន លើកទី១៤ ឆ្នាំ​២០២៥ នៅប្រទេសហ្វីលីពីន និងអន្តរជាតិផ្សេងៗនាពេលខាងមុខ ដើម្បីជាកិត្តិយសខ្លួនឯង គ្រួសារ និងប្រទេសជាតិទាំងមូល។

សូមបញ្ជាក់ថា កម្មវិធីប្រកួតប្រជែងជំនាញថ្នាក់ជាតិកម្ពុជា លើកទី៩ ឆ្នាំ២០២៤ មាន​បេក្ខជន​សរុប​ចំនួន ៩៣រូប (ស្រី ១២រូប) មកពីគ្រឹះស្ថានសិក្សាចំនួន១៦ ចូលរួមប្រកួត​ប្រជែង​លើ​ ជំនាញ​តបណ្តាញអគ្គិសនី ជំនាញរៀបឥដ្ឋ, ជំនាញផ្សារ, ជំនាញសរសេរកម្មវិធីកុំព្យូទ័រធុរកិច្ច, ជំនាញ​រចនាគេហទំព័រ, ជំនាញរចនាក្រាហ្វិក, ជំនាញរៀបការ៉ូ, ជំនាញម៉ាស៊ីនស្វ័យប្រវត្តិកម្ម, ជំនាញ Information Network Cabling (Demo)។ ក្នុងនោះបេក្ខជន ដែលជាប់​ចំណាត់​ថ្នាក់​ទទួល​បាន​មេដាយនឹងត្រូវទទួលបានរង្វាន់លើកទឹកចិត្តពីរាជរដ្ឋាភិបាលដូចជា មេដាយមាស ទទួល​បានប្រាក់រង្វាន់ចំនួន៣លានរៀល, មេដាយប្រាក់ ទទួលបានប្រាក់រង្វាន់២លានរៀល និង​មេដាយសំរឹទ្ធិ ទទួលបានរង្វាន់១លានរៀល៕