FBI ស៊ើបអង្កេតការបែកធ្លាយឯកសារសម្ងាត់បំផុត ស្តីពីផែនការរបស់អ៊ីស្រាអែល វាយប្រហារអ៊ីរ៉ង់

ការិយាល័យស៊ើបអង្កេតសហព័ន្ធ(FBI) បានប្រកាសកាលពីថ្ងៃអង្គារថា ខ្លួនកំពុងស៊ើបអង្កេតការបែកធ្លាយឯកសារស៊ើបការណ៍សម្ងាត់បំផុតរបស់អាមេរិក អំពីផែនការរបស់អ៊ីស្រាអែល សម្រាប់ការវាយប្រហារសងសឹកលើប្រទេសអ៊ីរ៉ង់។

អ៊ីរ៉ង់ បានត្រៀមខ្លួនទប់ទល់សម្រាប់ការឆ្លើយតប ចាប់តាំងពីខ្លួនបានបាញ់មីស៊ីលបាលីស្ទិកជិត២០០គ្រាប់ ទៅលើទឹកដីប្រទេសអ៊ីស្រាអែល កាលពីថ្ងៃទី ១ ខែតុលា ជាការសងសឹកចំពោះការសម្លាប់មន្ត្រីជាន់ខ្ពស់ដែលគាំទ្រដោយទីក្រុងតេអេរ៉ង់ នៅក្នុងក្រុមហាម៉ាសនិងក្រុមហេសបូឡា។

ឯកសារសម្ងាត់បំផុត ដែលត្រូវបានផ្សព្វផ្សាយនៅលើបណ្តាញកម្មវិធី Telegram កាលពីសប្តាហ៍មុនដោយគណនីមួយមានឈ្មោះថា អ្នកតាមដានតំបន់មជ្ឈឹមបូព៌ា(Middle East Spectator) ពិពណ៌នាអំពីការត្រៀមលក្ខណៈរបស់អ៊ីស្រាអែលសម្រាប់ការវាយលុកដែលអាចកើតមាន ប៉ុន្តែពុំបានកំណត់គោលដៅពិតប្រាកដ ណាមួយនៅឡើយ។

ការិយាល័យស៊ើបអង្កេតសហព័ន្ធ(FBI) បាននិយាយនៅក្នុងសេចក្តីថ្លែងការណ៍ថា FBI កំពុងស៊ើបអង្កេតការបែកធ្លាយឯកសារសម្ងាត់បំផុតនេះ និងកំពុងធ្វើការយ៉ាងជិតស្និទ្ធជាមួយដៃគូរបស់យើងនៅក្នុងក្រសួងការពារជាតិ និងសហគមន៍ស៊ើបអង្កេត។

អ្នកនាំពាក្យសន្តិសុខជាតិសេតវិមាន លោក John Kirby បាននិយាយទៅកាន់អ្នកសារព័ត៌មានថា អាជ្ញាធរសហរដ្ឋអាមេរិក មិនបានដឹងថាតើឯកសារទាំងនោះត្រូវបានធ្វើឲ្យបែកធ្លាយ ឬត្រូវបានគេចូលលួចទិន្នន័យ យ៉ាងណានោះទេ។