ឯកឧត្តម ឌិត ទីណា ចូលរួមកិច្ចប្រជុំថ្នាក់រដ្ឋមន្រ្តីកសិកម្ម និងព្រៃឈើអាស៊ាន តាមប្រព័ន្ធវីដេអូ

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមកិច្ច​ប្រជុំ​រដ្ឋមន្រ្តី​កសិកម្មនិងព្រៃឈើអាស៊ានលើកទី៤៦ (46th AMAF) កិច្ចប្រជុំរដ្ឋមន្រ្តី​កសិកម្ម និង​ព្រៃឈើ​អាស៊ានបូកបីលើកទី២៤ (24th AMAF Plus Three) និងកិច្ចប្រជុំរដ្ឋមន្រ្តីកសិកម្ម និងព្រៃឈើអាស៊ាន-ឥណ្ឌាលើកទី៨ (8th AIMMAF) ដែលកិច្ចប្រជុំនេះធ្វើឡើង តាមរយៈ​ប្រព័ន្ធវីដេអូពីចម្ងាយ (Video Conference) នៅព្រឹកថ្ងៃទី២៤ ខែតុលា ឆ្នាំ២០២៤។

នៅក្រោយចប់កិច្ចប្រជុំនេះ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា អង្គប្រជុំ​បាន​ផ្តោតការពិភាក្សាជាសំខាន់លើការងារសន្តិសុខស្បៀង កសិកម្ម និងព្រៃឈើអាស៊ាន ដែល​ទាមទារ​ឱ្យមានកិច្ចប្រឹងប្រែងរួមគ្នាជាអន្តរជាតិ និងការថ្លែងរបាយការណ៍កម្មវិធីកិច្ចប្រជុំ​ពីសំណាក់​រដ្ឋមន្រ្តីកសិកម្មតាមបណ្តាប្រទេសក្នុងតំបន់អាស៊ាន។

ឆ្លៀតក្នុងឱកាសនេះដែរ ឯកឧត្តមរដ្ឋមន្រ្តី ឌិត ទីណា បានបង្ហាញនូវជំហរគាំទ្រ និងការប្តេជ្ញាចិត្តអនុវត្តផែនការសកម្មភាពការអភិវឌ្ឍវិស័យកសិកម្ម និងព្រៃឈើរួមគ្នា ព្រមទាំងបណ្តាគម្រោងកម្មវិធីនានាឆ្នាំ២០២៦-២០០ ជាមួយបណ្តាសមាជិកក្នុងតំបន់អាស៊ាន ដើម្បីសន្តិសុខស្បៀង អាហារូបត្ថម្ភ និងនិរន្តរភាពវិស័យកសិកម្មនៃប្រជាជាតិអាស៊ានទាំងមូល៕