សហរដ្ឋអាមេរិកអនុម័តលក់អាវុធ ២ពាន់លានដុល្លារទៅឲ្យកោះតៃវ៉ាន់ ១សប្តាហ៍ក្រោយ​ចិនធ្វើសមយុទ្ធ

មន្ទីរបញ្ចកោណ កាលពីថ្ងៃសុក្រ (ទី២៥ ខែតុលា) បានប្រាប់ឲ្យដឹងថា សហរដ្ឋអាមេរិកបានអនុម័តកញ្ចប់លក់អាវុធនាពេលខាងមុខតម្លៃ ២ពាន់លានដុល្លារទៅឲ្យកោះតៃវ៉ាន់ ដោយក្នុងនោះរួមទាំងការបញ្ជូនជាលើកដំបូងទៅកាន់កោះនេះនូវប្រព័ន្ធមីស៊ីលការពារដែនអាកាសកម្រិតខ្ពស់ ដែលត្រូវបានប្រយុទ្ធសាកល្បងនៅក្នុងប្រទេសអ៊ុយក្រែន។

សហរដ្ឋអាមេរិកត្រូវបានចងដោយច្បាប់ ដើម្បីផ្តល់មធ្យោបាយការពារខ្លួនរបស់កោះតៃវ៉ាន់ដែលត្រូវទាមទារដោយប្រទេសចិន ទោះបីជាមិនមានទំនាក់ទំនងការទូតផ្លូវការក៏ដោយ ដែលការធ្វើបែបនេះនាំឲ្យមានការខឹងសម្បាពីទីក្រុងប៉េកាំង។

សម្រាប់ចិន ប្រទេសមហាសេដ្ឋកិច្ចទី២ របស់ពិភពលោកមួយនេះ បាននិងកំពុងបង្កើនសម្ពាធផ្នែកយោធាប្រឆាំងនឹងកោះតៃវ៉ាន់ ក្នុងនោះរួមទាំងការរៀបចំសមយុទ្ធជុំថ្មី ជុំវិញកោះនេះ កាលពីសប្តាហ៍មុន ដែលាការធ្វើលើកទី២ របស់ខ្លួន គិតចាប់តាំងពីលោក Lai Ching-te ឡើងកាន់តំណែងជាមេដឹកនាំរបស់កោះតៃវ៉ាន់ កាលពីខែឧសភា។

ពាក់ព័ន្ធនឹងការព្រមព្រៀងលក់គ្រឿងយុទ្ធោបករណ៍នេះ ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ បាននិយាយថា ការលក់ថ្មីនេះ មានប្រព័ន្ធមីស៊ីលតម្លៃ ១,១៦ពាន់លានដុល្លារអាមេរិក និងប្រព័ន្ធរ៉ាដាតម្លៃប្រមាណ ៨២៨លានដុល្លារ។ មន្ទីរបញ្ចកោណបានបប្រាប់បន្ថែមថា អ្នកម៉ៅការសំខាន់ សម្រាប់ប្រព័ន្ធមីស៊ីលនេះ នឹងជាក្រុមហ៊ុន RTX Corp។

គួរបញ្ជាក់ថា យោធារបស់កោះតៃវ៉ាន់កំពុងពង្រឹងគ្រឿងសព្វាវុធរបស់ខ្លួន ដើម្បីអាចប្រឈមទល់ជាមួយការវាយប្រហារណាមួយពីប្រទេសចិន ក្នុងនោះរួមមានទាំងការសាងសង់នាវាមុជទឹកផ្ទាល់ខ្លួន ដើម្បីការពារខ្សែផ្គត់ផ្គង់ដែនសមុទ្រដ៏សំខាន់ផងដែរ៕