ការគំរាមដោយគ្រាប់បែកក្លែងក្លាយជាប់ពាក់ព័ន្ធជាមួយរុស្ស៊ី បានបិទទីតាំងបោះឆ្នោតនៅរដ្ឋចចា

ទីតាំងបោះឆ្នោតយ៉ាងហោចណាស់ចំនួនពីរកន្លែងនៅក្នុងរដ្ឋដែលមានការប្រកួតប្រជែងខ្លាំងនៃការបោះឆ្នោតនៅសហរដ្ឋអាមេរិកក្នុងរដ្ឋចចា មនុស្សត្រូវបានជម្លៀសចេញភ្លាមៗកាលពីថ្ងៃអង្គារ ទី៥ ខែវិច្ឆិកា បន្ទាប់ពីការគំរាមកំហែងគ្រាប់បែកក្លែងក្លាយ ដែលមន្ត្រីបោះឆ្នោតនៅក្នុងរដ្ឋនេះ បានដាក់កំហុសទៅលើភ្នាក់ងាររុស្ស៊ី។

ការគំរាមកំហែង ដែលត្រូវបានគេគិតថាមិនគួរឱ្យទុកចិត្ត បានបណ្តាលឱ្យទីតាំងបោះឆ្នោតចំនួនពីរកន្លែងនៅតំបន់ Fulton County រដ្ឋចចា ត្រូវបានជម្លៀសមនុស្សចេញភ្លាមៗ។ មន្ត្រីបាននិយាយថា ទីតាំងទាំងពីរ បានបើកឡើងវិញបន្ទាប់ពីរយៈពេលប្រហែល៣០នាទីក្រោយមក ហើយតំបន់នេះបានស្វែងរកសេចក្តីបង្គាប់របស់តុលាការ ដើម្បីពន្យារពេលម៉ោងបោះឆ្នោតនៅទូទាំងរដ្ឋ ដែលម៉ោងកំណត់នៅត្រឹមម៉ោង៧:០០យប់។

រដ្ឋមន្ត្រីការបរទេសរដ្ឋចចា លោក Brad Raffensperger បាននិយាយថា ការជ្រៀតជ្រែករបស់ុស្ស៊ី គឺនៅពីក្រោយការបោកបញ្ឆោតដោយគ្រាប់បែក នៅថ្ងៃបោះឆ្នោត។

លោក បាននិយាយទៅកាន់អ្នកសារព័ត៌មានថា «វាជាអំពើទុច្ចរិត» វាហាក់ដូចជា ពួកគេមិនចង់ឱ្យយើងមានការបោះឆ្នោតដោយរលូន យុត្តិធម៌ និងត្រឹមត្រូវនោះទេ។

ស្ថានទូតរុស្ស៊ី នៅក្នុងទីក្រុងវ៉ាស៊ីនតោន ពុំបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។ នៅក្នុងសេចក្តីថ្លែងការណ៍មួយ ទីភ្នាក់ងារ FBI បាននិយាយថា ទីភ្នាក់ងារបានដឹងពីការគំរាមកំហែងដោយគ្រាប់បែកក្លែងក្លាយនៅទីតាំងបោះឆ្នោតក្នុងរដ្ឋមួយចំនួន ដោយភាគច្រើនមានប្រភពមកពីដែនអ៊ីមែលរបស់រុស្ស៊ី។