កោះម៉ាយ៉ត់ របស់បារាំង កំពុងស្ដារឡើងវិញក្រោយព្យុះស៊ីក្លូន ខណៈអ្នកស្លាប់សរុបនៅមិនទាន់ដឹង

អាជ្ញាធរនៅក្នុងទឹកដីក្រៅប្រទេសរបស់បារាំង គឺកោះ ម៉ាយ៉ត់ (Mayotte) កំពុងចាប់ផ្ដើមប្រតិបត្តិការស្ដារឡើងវិញ ហើយនៅតែអាចបញ្ជាក់បានថាមានមនុស្សស្លាប់តែ ៣១នាក់ប៉ុណ្ណោះ គិតត្រឹមថ្ងៃពុធ (១៨ ធ្នូ) ពីព្យុះស៊ីក្លូន ឈីដូ (Chido) ដ៏កាចសាហាវ ដោយសារតួលេខពិតប្រាកដមិនទាន់មាននៅឡើយទេ ប៉ុន្មានថ្ងៃបន្ទាប់ពីបានវាយប្រហារប្រជុំកោះមហាសមុទ្រឥណ្ឌា ដែលបង្កការបំផ្លិចបំផ្លាញយ៉ាងទូលំទូលាយ និងអាចសម្លាប់មនុស្សរាប់ពាន់នាក់។

កោះ Mayotte ទឹកដីក្រៅប្រទេសដ៏ក្រីក្របំផុតរបស់បារាំង គឺជាជម្រកសម្រាប់ជនអន្តោប្រវេសន៍គ្មានឯកសារមួយចំនួនធំ ខណៈតំបន់តូចៗជាច្រើនដែលពួកគេរស់នៅត្រូវបានបំផ្លិចបំផ្លាញដោយព្យុះ ហើយទីតាំងរងគ្រោះជាច្រើននៅតែមិនអាចចូលទៅដល់បាន ដែលធ្វើឱ្យស្មុគស្មាញបន្ថែមទត់កិច្ចការដ៏លំបាករួចទៅហើយក្នុងការគណនាទំហំនៃការស្លាប់ និងខូចខាត។

មន្ត្រីក្នុងតំបន់ និងបុគ្គលិកសុខាភិបាលនិយាយថា មនុស្សរាប់រយ ឬរាប់ពាន់នាក់អាចស្លាប់ដោយសារខ្យល់ព្យុះដ៏អាក្រក់បំផុត ដែលបានវាយប្រហារប្រជុំកោះនេះក្នុងពេល ៩០ឆ្នាំ។ បន្ថែមពីលើការស្លាប់ដែលបានបញ្ជាក់ចំនួន ៣១នាក់នោះ មន្រ្តីក្នុងតំបន់និយាយថា មនុស្សជិត ១.៤០០ នាក់រងរបួសស្រាល ហើយចំនួនអ្នកស្លាប់ និងរបួសសរុបពិតប្រាកដ នឹងត្រូវចំណាយពេលខ្លះដើម្បីគណនា។

ជនរងគ្រោះមួយចំនួនត្រូវបានបញ្ចុះភ្លាមៗតាមទំនៀមទម្លាប់ជនជាតិមូស្លីម មុនពេលការស្លាប់របស់ពួកគេអាចត្រូវបានរាប់បញ្ចូល។ ស្ថានការណ៍នេះធ្វើឱ្យកាន់តែលំបាកដោយសារភាពមិនច្បាស់លាស់ ជុំវិញចំនួនប្រជាជនពិតប្រាកដរបស់កោះ Mayotte។ ខណៈពេលដែលស្ថិតិផ្លូវការបង្ហាញថា ប្រជាជនសរុបមាន ៣២១.០០០នាក់ អាជ្ញាធរជឿថាតួលេខអាចខ្ពស់ជាងនេះ ដោយសារតែជនអន្តោប្រវេសន៍គ្មានឯកសារ ដែលភាគច្រើនមកពីប្រទេសកូម័រ និងម៉ាដាហ្កាស្ការ៕