យុវជនបោះជំរំ ស្លៀកពាក់ឈុតប្រពៃណី សម្តែងសិល្បៈ រាត្រីវប្បធម៌ ក្រោមដំបូលសុខ​សន្តិភាពភាព

កាលពីរាត្រីថ្ងៃទី១៨ធ្នូ គណៈប្រតិភូបោះជំរំយុវជនជាសកលលើកទី១០ឆ្នាំ២០២៤ បាននាំគ្នា ស្លៀកពាក់ឈុតប្រពៃណី សម្តែងសិល្បៈ រាត្រីវប្បធម៌ ក្រោមដំបូលសុខសន្តិភាព និងដើម្បី​ឱ្យ​យុវជន​បាន​ស្វែងយល់ពីវប្បធម៌ប្រពៃណីខ្មែរ ហើយវប្បធម៌ប្រពៃណីអាចចាក់ឫស្សរាំងមាំបាន ដោយ​សារប្រទេសជាតិ មានសុខសន្តិភាព។

បញ្ជាក់ប្រាប់ BTV ខណៈសម្តែងសិល្បៈរាត្រីវប្បធម៌ តំណាងយុវជនបោះជំរំបានប្រាប់ថា ពួកគេ ពិត​ជា​សប្បាយរីករាយណាស់ ដែលបានចូលរួមបោះជំរំ និងមាន​ឱកាស​បាន​សម្តែង​សិល្បៈ​រាត្រី​វប្បធម៌ ប្រកបដោយភាពសប្បាយរីករាយ។ យុវជនបន្តថា ការបង្កើត​គំនិត​ជ្រើសរើស​ឈុត​ឆាក​ប្រពៃណី​ខ្មែរមកសម្តែង ក្នុងកម្មវិធីប្រកួតសម្តែងរាត្រីវប្បធម៌នេះ មានពេលវេលារៀបចំខ្លីណាស់ ប៉ុន្តែពួកគេនៅតែអាចធ្វើបានយ៉ាងល្អ ហើយអ្វីៗទាំងអស់នេះ កើតឡើងដោយ​សារ​ប្រទេស​ជាតិ​មានសុខ​សន្តិភាព ក្នុងនេះពួកគេបានថ្លែងអំណរគុណដល់សម្តេចតេជោ អតីតនាយករដ្ឋមន្ត្រី ដែល​បានធ្វើឱ្យប្រទេសជាតិ មានសុខសន្តិភាព រហូតបានធ្វើឱ្យពួកគេ នកាសគ្រប់បែបយ៉ាង ហើយ​ពួកគេ នឹងប្តេជ្ញាខិតខំរៀនសូត្រ ដើម្បីចូលរួម អភិវឌ្ឍន៍​ប្រទេស​ជាតិ​នៅ​ថ្ងៃ​ខាង​មុខ។

ចំណែកលោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជនក្រសួងអប់រំយុវជន និង កីឡា បានប្រាប់បន្ថែមថា ការសម្តែងសិល្បៈ រាត្រីវប្បធម៌នេះ ចង់ឱ្យយុវជន​បាន​ស្គាល់​ខ្លួន​ឯង​ឱ្យ​បាន​ច្បាស់​ ត្រូវស្គាល់ពីវប្បធម៌ប្រពៃណីខ្មែរ កុំភ្លេចខ្លួន ត្រូវស្គាល់ពីអត្តសញ្ញាណអរិយធម៌ វប្បធម៌​ប្រពៃណី​ខ្មែរ ពិសេសគឺតម្លៃនៃសិល្បៈវប្បធម៌ខ្មែរតែម្តង៕ អត្ថបទ៖ គង់ រ៉េន