ពិតជាលះបង់ខ្លាំង! ម៉ឺន ឯកសុភារិទ្ធ របួសមុខពេលថតប្លង់ផ្ទុះគ្រាប់បែកក្នុងរឿងសម័យប៉ុលពត

តារាសម្ដែងល្បីឈ្មោះ លោក ម៉ឺន ឯកសុភារិទ្ធ បានកំពុងចេញថតខ្សែរឿងជីវិតថ្មីឱ្យផលិតកម្មសាស្ត្រា (Sastra Film) ដែលមានចំណងជើងថា «កាំជណ្ដើរទី៣» ស្ថិតក្នុងសម័យកាលមួយដ៏សាហាវយង់ខ្នង​នៃរបបប៉ុលពត​ គុកឥតជញ្ជាំង​(៣ឆ្នាំ ៨ខែ ​២០ថ្ងៃ)។ ខណៈថតប្លង់រត់កាត់គ្រាប់បែក លោកត្រូវសម្ដែងរត់ជួយសង្គ្រោះ និងរត់ឱបកូនគេចគ្រាប់បែក តែភ្លាមៗក៏ត្រូវភ្លាត់ស្នៀត រហូតដល់លោករបួសមុខឃើញស្នាមមួយចំហៀងមុខ។

តាមការបញ្ជាក់ប្រាប់ពីលោក ម៉ឺន ឯកសុភារិទ្ធ ប្រាប់សារព័ត៌មានសិល្បៈញូស៍(Selapak News) បានឱ្យដឹងថា« របួសមុខនេះ គឺកើតឡើងនៅពេលដែលថតប្លង់ផ្ទុះគ្រាប់បែក ហើយខ្ញុំត្រូវបីកូនរបស់តួស្រី រត់កាត់គ្រាប់បែក។ ប៉ុន្ដែរបួសនេះមិនមែនដោយសារខុសបច្ចេកទេសនៃការបំផ្ទុះ​គ្រាប់បែកនោះទេ តែដោយសារភ្លាត់ស្នៀតត្រូវក្រចកដៃតួកូនស្រីឆូតលើមុខមួយឆ្នូតវែង​​»។ លោកបានបន្ដថា «បន្ទាប់ពីកើតហេតុនោះហើយ ខ្ញុំបានទៅរកពេទ្យដើម្បីលាងរបួសស្នាម និងពិគ្រោះជាមួយគ្រូពេទ្យថា ស្នាមរបួសនេះអាចព្យាបាលជាសះស្បើយឆាប់ដែរទេ ព្រោះ​ខ្ញុំ​ចង់​ប្រញាប់​មក​ថតរឿង​បន្តទៀត»។

បើតាមការអះអាងរបស់លោក ម៉ឺន ឯកសុភារិទ្ធ ក៏បានឱ្យដឹងបន្ថែមថា ទោះបីជាលោកត្រូវរបួសស្នាមមុខក៏ដោយ ក៏ប៉ុន្ដែលោកនៅតែបន្ដថតរឿងមួយនេះដល់ចប់ផងដែរ។ នេះអាចបង្ហាញឱ្យឃើញពីការតស៊ូ និងការលះបង់របស់តារាសម្ដែងប្រុសរូបនេះ ចំពោះការសម្ដែងភាពយន្ដខ្មែរមួយនេះ។ លោក ម៉ឺន ឯកសុភារិទ្ធ បានបន្ដប្រាប់ថា «ក្រោយកើតហេតុការណ៍ភ្លាមៗនេះ ក្រុមការងាររបស់ផលិតកម្មសាស្ត្រា(Sastra Film) បានយកចិត្តទុកដាក់ និងព្រួយបារម្ភចំពោះរូបខ្ញុំខ្លាំងមែនទែន។ មានអ្នកខ្លះរត់ទៅទិញថ្នាំលាងរបួស រត់ទៅរកសំឡីជូតមុខរបួស ទាំងមិនខ្វល់ពីភាពនឿយហត់របស់ខ្លួនឯងឡើយ។ ហើយក៏មានអ្នកខ្លះប្រាប់ពីវិធី និងឈ្មោះថ្នាំព្យាបាលកុំឱ្យមានស្នាមសន្លាកលើផ្ទៃមុខទៀតផង»។ លោកនិយាយទៀតថា រឿងនេះគឺលោកពិបាកសម្ដែងសម្រាប់ទៅហើយ ជាពិសេសក៏មានប្លង់ខ្លះត្រូវលះបង់ខ្លាំងផងដែរ ក៏ប៉ុន្ដែលោករំពឹងទុកថា តាមរយៈខ្សែភាពយន្ដរឿង«កាំជណ្ដើរទី៣»នេះ នឹងធ្វើឱ្យហ្វេនៗ ក៏ដូចជា​មហាជនទាំងអស់ បានទស្សនានិងជ្រាបកាន់តែច្បាស់​ពីជ្រុងមួយទៀតនៃ​សម័យកាលមួយដ៏សាហាវយង់ខ្នង​នៃរបបប៉ុលពត​ គុកឥតជញ្ជាំង​ ថាតើលំបាកកម្រិតណា? គ្មានការ​ហូបចុកសុខស្រួល និងមិនបានសម្រាកគ្រប់គ្រាន់ទេ។

សូមជម្រាបផងដែរថា រឿង«កាំជណ្ដើរទី៣»នេះ ត្រូវបានផលិតឡើងដោយផលិតកម្ម (Sastra Film) មានការចូលរួមពីសំណាក់តារាសម្តែងល្បីឈ្មោះ​បីរូប គឺ​កញ្ញា នី មុនីនាថ លោក អ៊ុន សិទ្ធា និងលោក ម៉ឺន ឯកសុភារិទ្ធ ដែលមានការផ្តួចផ្តើមគំនិត និងទីប្រឹក្សាផលិតពីព្រឹទ្ធាចារ្យខាងភាព​យន្ត ​មានឈ្មោះល្បីល្បាញមួយរូប និងមានការចូលរួមគ្រប់គ្រងប្លង់ថតអ្នកជំនាញជើងចាស់​លោក សុខ សំអាត។ រឿងនេះត្រូវបានរំពឹងទុកថា នឹងក្លាយជាភាពយន្ដដ៏ល្បីកក្រើក​ បន្ទាប់ពីការចាក់បញ្ចាំង​នៅលើកញ្ចក់​ទូរទស្សន៍បាយ័ន នៅដើមខែមករា ឆ្នាំ ២០២១ ដោយមានការ Live លើ Facebook និង Youtube Sastra Film ផងដែរ៕

អត្ថបទ៖ វិសិដ្ឋ អេបិល

ប្រភពពី៖ The Selapak News