រដ្ឋមន្ត្រីក្រសួងព័ត៌មាន អំពាវនាវដល់អ្នកសារព័ត៌មានក្នុងខេត្តកំពង់ឆ្នាំង គោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈសារព័ត៌មាន

កំពង់ឆ្នាំង៖ ក្នុងពេលចុះសួរសុខទុក្ខ និងសំណេះសំណាលជាមួយមន្ត្រីមន្ទីរព័ត៌មាន និងអ្នកសារព័ត៌មានខេត្តកំពង់ឆ្នាំងនាព្រឹកថ្ងៃទី១៣ ខែមករា ឆ្នាំ២០២៥នេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានជំរុញដល់អ្នកសារព័ត៌មានក្នុងខេត្តកំពង់ឆ្នាំងទាំងអស់ ត្រូវគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈសារព័ត៌មានក្នុងការផលិតព័ត៌មាន និងយកព័ត៌មាន ដោយមិនត្រូវគិតត្រឹមតែការទាក់ទាញយកចំនួន Likes ; Shares, views ដើម្បីបានថវិកានោះឡើយ។

ឯកឧត្តរដ្ឋមន្ត្រីបានមានប្រសាសន៍បន្តថា៖ អ្នកសារព័ត៌មានគ្រប់រូប ត្រូវឈរលើមូលដ្ឋានក្រមសីលធម៌វិជ្ជាជីវៈ ការគោរពនូវសិទ្ធិឯកជនរបស់បុគ្គល និងជៀសវាងការផ្សព្វផ្សាយព័ត៌មានមិនពិត ដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សារធារណៈ និងការបង្កចលាចល និងភាពវឹកវរដោយសារតែការចង់បានការចាប់អារម្មណ៍ពីអ្នកប្រើប្រាស់ប្តាសង្គមហ្វេសប៊ុក ឬតិកតុក របស់ខ្លួន។ អ្នកសារព័ត៌មាន ត្រូវចូលរួមប្រើប្រាស់ភាពច្នៃប្រឌិត និងទស្សនៈ សុទិដ្ឋិនិយមរបស់ខ្លួន ដើម្បីបង្ហាញពីភាពស្រស់ស្អាត និងការពិតរបស់ប្រទេសកម្ពុជាទៅកាន់ពិភពលោកអោយបានដឹង និងអោយបានត្រឹមត្រូវ និងមានប្រសិទ្ធភាព។ ការផ្សព្វផ្សាយព័ត៌មាន មិនត្រឹមតែធ្វើឱ្យប្រជាជនកម្ពុជា ក៏ដូចជាសាធារណជនទូទៅ ទទួលបានព័ត៌មានពិតឆាប់ រហ័សអំពីប្រទេសកម្ពុជា ប៉ុណ្ណោះទេថែមទាំង ជំរុញលើកកម្ពស់ការយល់ដឹងរបស់ប្រជាពលរដ្ឋ និងរួមចំណែកដល់ការអភិវឌ្ឍន៍ប្រទេសជាតិផងដែរ។ បច្ចុប្បន្ននេះ ប្រព័ន្ធផ្សព្វផ្សាយទាំងបុរាណ និងទំនើបនៅកម្ពុជាមានចំនួនជាង ៥ ០០០ ដែលបានចុះបញ្ជីស្របតាមច្បាប់នៅក្រសួងព័ត៌មាន និងអ្នកសារព័ត៌មានប្រមាណជាង១ម៉ឺននាក់ កំពុងតែដើរតួនាទីសំខាន់នៅក្នុងការផលិតខ្លឹមសារផ្សេងៗ និងផ្សព្វផ្សាយជូនដល់សាធារណជន។

ឯកឧត្តម ជឿជាក់ថា អ្នកសារព័ត៌មាននៅក្នុងខេត្តកំពង់ឆ្នាំង នឹងបង្កលក្ខណៈកាន់តែទូលំទូលាយដល់ការចែករំលែកព័ត៌មានពិតអំពីការងាររបស់រាជរដ្ឋាភិបាលកម្ពុជា ទៅកាន់សាធារណជនជាជនជាតិខ្មែរ ជនបរទេសដទៃ និងប្រកាន់ខ្ជាប់នូវក្រមសីលធម៌ វិជ្ជាជីវៈសារព័ត៌មាន ដោយផ្សព្វផ្សាយតែព័ត៌មានពិត និងត្រឹមត្រូវ ពីព្រោះប្រព័ន្ធផ្សព្វផ្សាយជាភ្លើងបំភ្លឺសង្គម ពន្លឺរបស់វាអាចបំភ្លឺការពិត និងចូលរួមថែរក្សាសុខសន្តិភាព ការរួបរួមសាមគ្គីភាព និងការអភិវឌ្ឍន៍ជាតិ តាមរយៈការផ្សព្វផ្សាយព័ត៌មានពិត មានក្រមសីលធម៌វិជ្ជាជីវៈ និងប្រកបដោយការទទួលខុសត្រូវ និងមានប្រយោជន៍សម្រាប់ប្រជាពលរដ្ឋ និងសង្គមជាតិ ៕ កាំង ហុងវាស្នា