អន្តរក្រសួងបន្តប្រជុំដើម្បីឈានទៅបើកសាច់ប្រាក់ជូនស្ត្រីមានផ្ទៃពោះ ជាប់ពន្ធនាគារដែល​គ្រោងអនុវត្ត​ឆ្នាំនេះ

រាជរដ្ឋាភិបាលកម្ពុជា កំពុងពង្រីកវិសាលភាព ការគាំពារសង្គមជារួមទៅកាន់ប្រជាពលរដ្ឋក្រីក្រ និង​ងាយរងហានិភ័យ ក៏ដូចជា ប្រជាពលរដ្ឋក្នុងលក្ខណ្ឌពិសេស។ ជាក់ស្ដែង​អន្តរ​ក្រសួង​កំពុង​បន្ត​ធ្វើ​ការ​រួមគ្នា ដើម្បីសម្រេចឱ្យបានការអនុវត្ត ការឧបត្ថម្ភសាច់ប្រាក់ជូនស្ត្រីមានផ្ទៃពោះ និង​កុមារ​អាយុ​ក្រោមពីរឆ្នាំ ដែលជាប់នៅក្នុងពន្ធនាគារ។ កត្តាសំខាន់នាពេលនេះ គឺត្រូវសិក្សា​លម្អិត​គ្រប់​ចំណុច ព្រោះក្រុមគោលដៅថ្មីនេះ ស្ថិតក្រោមការឃុំឃាំងពុំអាចចេញមកខាងក្រៅ ដូច​ពលរដ្ឋ​ទូទៅនោះទេ។

នារសៀល ថ្ងៃទី១៣ ខែមករា ម្សិលម៉ិញនេះ ឯកឧត្តម ចន ណារិទ្ធ ជាអគ្គលេខាធិការ​ក្រុមប្រឹក្សា​ជាតិ​គាំពារសង្គម បានដឹកនាំកិច្ចប្រជុំអន្តរក្រសួងស្តីពីការគិតគូរផ្តល់អត្ថប្រយោជន៍ នៃ​កម្ម​វិធី​ឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ដល់ជនជាប់​ឃុំ​ជា​ស្ត្រី​ក្នុងព​ន្ធនាគារ។

កិច្ចប្រជុំនេះ ជាការប្រមូលធាតុចូលបន្ថែម ពីគ្រប់ភាគីពាក់ព័ន្ធ ដែលរួមមាន តំណាងមកពី ក្រសួង​សង្គមកិច្ច អតីតយុទ្ធជន និងយុវនីតិសម្បទា, មូលនិធិជាតិជំនួយសង្គម, ក្រសួងមហាផ្ទៃ, ក្រសួងយុត្តិធម៌, ក្រសួងការងារ និងបណ្ដុះបណ្ដាលវិជ្ជាជីវៈ, បេឡាជាតិសន្តិសុខសង្គម, ក្រសួង​សុខាភិបាល, ក្រសួងកិច្ចការនារី និងអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ។

កិច្ចប្រ​ជុំនេះបានផ្តោតការពិភាក្សាលើ យន្តការក្នុងការអនុវត្តកម្មវិធី ក្នុងន័យពិនិត្យគ្រប់ទិដ្ឋភាព និង​ទទួល​ធាតុចូលបន្ថែមពីក្រសួង-ស្ថាប័នពាក់ព័ន្ធ ដើម្បីឱ្យការ​គិតគូរ​នេះ​មាន​លក្ខណៈ​គ្រប់​ជ្រុង​ជ្រោយ។

ស្ត្រីមានផ្ទៃពោះ និងកុមារអាយុក្រោមពីរឆ្នាំ ដែលជាប់នៅក្នុងពន្ធនាគារ ជាក្រុមគោលដៅថ្មី ដែល​រាជ​រដ្ឋាភិបាលបានដៅកំណត់ ដើម្បីផ្ដល់ការគាំពារផ្ដល់ជាអត្ថប្រយោជន៍សម្រាប់ឆ្នាំ ២០២៥​នេះ។

កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោមពីរឆ្នាំ ជាកម្មវិធីអចិន្ត្រៃយ៍ ដែល​រាជរដ្ឋាភិបាល បានដាក់ឱ្យអនុវត្ត។ បច្ចុប្បន្នកម្មវិធីនេះ កំពុង​អនុវត្ត​លើ​ក្រុម​គោលដៅ​ស្ត្រី​មាន​ផ្ទៃពោះ និងកុមារអាយុក្រោមពីរឆ្នាំ ដែលរស់នៅក្នុងគ្រួសារក្រីក្រ មានបណ្ណសមធម៌ ក៏ដូចជា​កម្មការិនី​ដែលមានបណ្ណ បេឡាជាតិរបបសន្តិសុខសង្គមផងដែរ។

ការអនុវត្ត​កម្ម​វិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំនេះ គឺអនុវត្ត​ទៅ​តាម​លក្ខណ្ឌ។ លក្ខណ្ឌគឺសំដៅ ការទទួលបានថវិកាឧបត្ថម្ភចំនួន ៤ដង ពេលទៅពិនិត្យផ្ទៃពោះ ការទទួលបានសាច់ប្រាក់ ១ដងនៅពេលសម្រាល និងទទួលបានសាច់ប្រាក់ចំនួន ១០​ក្រោយ​សម្រាល ដែលសំដៅលើពេលជូនកូនទៅចាក់វ៉ាក់សាំង រហូតដល់កូនអាយុ ២ឆ្នាំ។ ការ​ទទួល​បាន​គឺ​នៅ​ពេលក្រុមគោលដៅ ទៅទទួលសេវានៅមន្ទីរពេទ្យរដ្ឋ៕ អត្ថបទ៖ គឹម ហុក