RUA សម្ពោធដាក់ឱ្យដំណើរការ មជ្ឈមណ្ឌលឧត្តមភាពវិទ្យាសាស្ត្រជលផល និងវារិជាត ដើម្បីនិរន្តរភាព

សាកលវិទ្យាល័យភូមិន្ទកសិកម្ម នាព្រឹកទី១៧ មករា ឆ្នាំ២០២៥នេះ បានសម្ពោធ​ដាក់​ឱ្យ​ដំណើរ​ការ​ជា​ផ្លូវ​ការមជ្ឈមណ្ឌលឧត្តមភាពវិទ្យាសាស្ត្រជលផល និងវារិជាតដើម្បីនិរន្តរភាព (មជ្ឈ​មណ្ឌល​ឧត្តមភាព ស៊ីហ្វាស់) ក្រោមកិច្ចសហប្រតិបត្តិការ និងការអភិវឌ្ឍជាច្រើនឆ្នាំ រវាងអ្នក​វិទ្យាសាស្រ្ត និងនិស្សិតសាកលវិទ្យាល័យភូមិន្ទកសិកម្ម និងគម្រោង​អច្ឆរិយភាព នៃ​ទន្លេ​មេគង្គ​ក្រោម​ជំនួយ​ឧបត្ថម្ភពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។

នៅក្នុងកម្មវិធីនេះ ឯកឧត្តមសាស្រ្តាចារ្យបណ្ឌិត ង៉ោ ប៊ុនថាន សាកល​វិទ្យាធិការ នៃ​សាកល​វិទ្យាល័យ​ភូមិន្ទកសិកម្ម បានមានប្រសាសន៍ថា មជ្ឈមណ្ឌលឧត្តមភាព ស៊ីហ្វាស់ បង្កើតឡើង​ក្នុង​គោល​បំណង​ដើរតួជាថ្នាក់បណ្តុះបណ្តាលសម្រាប់ការងារសិក្សាស្រាវជ្រាវ ការអប់រំ និងកសាង​សមត្ថភាព​ដោយលើកឡើងពីបញ្ហាប្រឈមក្នុងការគ្រប់គ្រងធនធាន​វារិជាត​ប្រកប​ដោយ​និរន្តរភាព​ក្នុង​ប្រទេសកម្ពុជា ក៏ដូចជាតំបន់ទន្លេមេគង្គផងដែរ។ ការងារ់ជ្ឈមណ្ឌលនេះ គ​រួម​មាន​ឈានមុខគេក្នុងការងារសិក្សាស្រាវជ្រាវប្រព័ន្ធអេកូឡូស៊ីរបស់វារិជាត ផ្តល់នៅ​អនុសាសន៍​គោល​នយោបាយតាមបែបវិទ្យាសាស្រ្ត ព្រមទាំងកសាង​សមត្ថភាព​អ្នក​វិទ្យាសាស្រ្ត និង​អ្នក​ដឹកនាំ​ជំនាន់​ក្រោយ​ពោរពេញទៅដោយចំណេះដឹង និងវិធីសាស្រ្តក្នុងការ​ថែ​រក្សា​ការពារ​ការ​ចូល​រួម​ចំណែក​របស់អេកូឡូស៊ីនិងសេដ្ឋកិច្ចរបស់ទន្លេមេគង្គឱ្យមាននិរន្តរភាព។

លោកបណ្ឌិត ង៉ោ ប៉េងប៊ុន ដែលជាព្រឹទ្ធបុរសនៃមហាវិទ្យាល័យជលផលនិងវារីវប្បកម្ម បានលើក​ឡើង​ថា មជ្ឈមណ្ឌលឧត្តមភាព ស៊ីហ្វាស់ ដើរតួយ៉ាងសំខាន់​ក្នុង​ការ​ឈាន​មុខ​គេ​ក្នុង​ការកសាង​សមត្ថភាព​ក្នុង​ប្រទេសកម្ពុជា ដើម្បីស្វែងយល់ពីបញ្ហាចម្បងៗ ដូចជាការប្រែប្រួលអាកាសធាតុ ការ​បាត់បង់ទីជម្រក និងការនេសាទលើសលុប។

ជាមួយគ្នានេះលោកបណ្ឌិត ហ្សេប ហូហ្គេន នាយកគម្រោងអច្ឆរិយភាពនៃទន្លេមេគង្គ និង​តំណាង​ឱ្យ​សាកលវិទ្យាល័យណេវ៉ាណា រីណូ បានមានប្រសាសន៍ថា គម្រោងអច្ឆរិយភាព នៃ​ទន្លេ​មេគង្គ​ក្រោម​ជំនួយឧបត្ថម្ភពីទីភ្នាក់ងារ USAID មានមោទនភាពជាពន់​ពេក​ក្នុង​ការ​គាំទ្រ​ក្នុង​ការ​បង្កើត​មជ្ឈមណ្ឌលឧត្តមភាព ស៊ីហ្វាស់ ដែលជាផ្នែកមួយ​នៃ​ការ​ធ្វើ​ការ​ប្តេជ្ញា​រួម​គ្នាក្នុ​ង​ការ​ថែ​រក្សា​ទន្លេ​មេគង្គដែលជាបេតិកភណ្ឌធម្មជាតិ ”។ លោកជឿជាក់ថា មជ្ឈមណ្ឌលឧត្តមភាព ស៊ីហ្វាស់ នឹង​ជំរុញ​ដំណោះស្រាយប្រកបដោយនវានុវត្ត និងភាពជាដៃគូយូរអង្វែង ដើម្បីជាប្រយោជន៍​ដល់​មនុស្ស​ជំនាន់​ក្រោយ។

គោលដៅយុទ្ធសាស្រ្តរបស់មជ្ឈមណ្ឌលឧត្តមភាព ស៊ីហ្វាស់ រួមមានការធ្វើការ​សិក្សា​ទំនើបក​ម្ម​លើ​ប្រ​ព័ន្ធ អេកូឡូស៊ីជលផលនិងជីវៈចម្រុះក្នុងអាងទន្លេមេគង្គ បង្កើត​យុទ្ធសាស្ត្រ​ផ្អែក​លើ​វិទ្យាសាស្ត្រ​ដើម្បី​លើក​កម្ពស់ការនេសាទប្រកបដោយនិរន្តរភាព វារីវប្បកម្ម និងការគ្រប់គ្រងធនធានទឹក បណ្តុះ​បណ្តាលនិស្សិតនិងអ្នកជំនាញឱ្យក្លាយជាអ្នកដឹកនាំក្នុងការគ្រប់គ្រងបរិស្ថាន និងជំរុញ​ភាព​ជាដៃ​គូ​ក្នុងចំណោមសាកលវិទ្យាល័យ រាជរដ្ឋាភិបាល អង្គការក្រៅរដ្ឋាភិបាល និងសហគមន៍​មូល​ដ្ឋាន​ដើម្បីបង្កើតវិធីសាស្រ្តរួមឆ្ពោះទៅរកនិរន្តរភាព៕ អត្ថបទ៖ ឈិត បូរ៉ាវី