ឯកឧត្តមរដ្ឋមន្រ្ដី ឆាយ ឫទ្ធិសែន អញ្ជើញចុះពិនិត្យវឌ្ឍនភាពការងារសាងសង់ ស្ពានព្រៃក្តី ក្នុងស្រុកកណ្តៀង

ពោធិ៍សាត់៖ នារសៀលថ្ងៃទី១៩ ខែមករា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្រ្ដី​ក្រសួង​អភិវឌ្ឍន៍​ជនបទ អមដំណើរដោយប្រតិភូក្រសួងអភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្ត បាន​អញ្ជើញចុះពិនិត្យដំណើរការសាងសង់ស្ពានព្រៃក្តី ដែលជាស្ពានបេតុងប្រវែង៧៥ម៉ែត្រ កាត់​ស្ទឹង​ពោធិ៍សាត់ តភ្ជាប់ពីភូមិក្បាលរមាស ឃុំអន្លង់វិល មកកាន់ភូមិព្រៃក្តីកណ្តាល ឃុំកណ្តៀង ដោយ​បច្ចុប្បន្ន​សម្រេចបានប្រមាណ៤០ភាគរយ ។

ក្នុងឱកាសនោះ ឯកឧត្តម ឆាយ ឫទ្ធិសែន សូមឱ្យគ្រប់ភាគីពាក់ពន្ធ័បន្តសហការគ្នា ដើម្បី​ជំរុញ​ឱ្យ​ដំណើរ​ការ​សាងសង់ស្ពានបេតុងនេះមានភាពរលូនប្រកបដោយគុណភាព និងសម្រេច​បាន​តាម​ផែនការ​គ្រោង​ទុកសាងសង់ឱ្យរួចមុខពិធីបុណ្យចូលឆ្នាំខ្មែរខាងមុខនេះ ព្រោះស្ពានព្រៃក្តី​នេះមាន​តួនាទី​យ៉ាង​សំខាន់សម្រាប់ប្រជាពលរដ្ឋតភ្ជាប់ចរាចរណ៍ដឹកកសិផល មកមណ្ឌលសុខភាព សិស្សា​នុសិស្សមកសាលារៀន និងមកទីប្រជុំជនស្រុកកណ្តៀងជាដើម ។

បើតាមលោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានឱ្យដឹងថា ស្ពាន​ព្រៃ​ក្តី​នេះ​​ដើមឡើយជាស្ពានដែលមានគ្រោងជាដែក និងក្រាលដោយឈើ មានប្រវែង​ប្រមាណ ៨០​ម៉ែត្រ ​ត្រូវបានបាក់ខូចខាតផ្នែកកណ្តាលទាំងស្រុង ដោយទឹកជំនន់នៅយប់ថ្ងៃទី៣០ ខែកញ្ញា ឆ្នាំ​២០២៣ ដោយពុំអាចធ្វើចរាចរណ៍ឆ្លងកាត់បាន ក្រោយហេតុការណ៍បាក់ស្ពាននេះ ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានដឹកនាំមន្ត្រីជំនាញ ចុះពិនិត្យ​ស្ថាន​ភាព​ជាក់​ស្តែង​ស្ពាន​ព្រៃ​ក្តីនេះដោយផ្ទាល់ ។ បន្ទាប់ពីធ្វើការសិក្សាវាយតំលៃរួចមក ក្រសួងអភិវឌ្ឍន៍​ជន​បទ​បាន​សម្រេច​សាងសង់​ស្ពាន​ថ្មី​ជាស្ពាន​បេតុង​រឹង​មាំ​ជំនួស​ឱ្យ​ឈើ​ស្ពាន​ចាស់​ក្រោយ​ទទួល​បាន​គោល​ការណ៍​ពីសម្តេចបរវធិបតី ហ៊ុន ម៉ាណែត នាយរដ្ឋមន្ត្រីនៃព្រះរាជាណាចក្រកម្ពុជា ។ ហើ​យ​ស្ពាន​បេតុងថ្មីនេះត្រូវបានបើកការដ្ឋានសាងសង់នៅថ្ងៃទី១៣ ខែឧសភា ឆ្នាំ២០២៤ ដែលមាន​ប្រវែង​៧៥​ម៉ែត្រ ទទឹង៨ម៉ែត្រ រួមនិងផ្លូវបេតុងសាងខាងក្បាលស្ពានប្រវែងសរុប ២២៩ម៉ែត្រ ដោយ​ចំណាយថវិការបស់រាជរដ្ឋាភិបាលកម្ពុជាក្នុងការសាងសង់ តាមរយៈក្រសួង​អភិវឌ្ឍន៍​ជន​បទ និងអនុវត្តន៍គម្រោងដោយ កងវិស្វកម្មលេខ១៨១ ស្ពាន-ថ្នល់ ៕ អត្ថបទ៖ ភិរុណ ពៅ