ពលរដ្ឋជាច្រើនទៅសែនកាត់ឆុង និងសែនសុំពរសុំជ័យ នៅវត្តភ្នំមុនចូលឆ្នាំចិនមកដល់

ជារៀងរាល់ឆ្នាំ ទៅតាមជំនឿរបស់ប្រជាពលរដ្ឋ ពិសេសពលរដ្ឋខ្មែរកាត់សែស្រឡាយចិន តែងនាំគ្នាទៅសែនកាត់ឆុង និងសែនសុំពរសុំជ័យលាភសំណាង នាឱកាសមុនពិធីបុណ្យសែនចូលឆ្នាំចិនចូលមកដល់។ ការសែនកាត់ឆុង និងសែនសុំពរសុំជ័យលាភសំណាងនេះ ភាគច្រើនពលរដ្ឋនៅរាជធានភ្នំពេញ ទៅធ្វើពិធីនេះនៅទីតាំងលោកតាព្រះចៅ ដែលស្ថិតនៅរមណីយដ្ឋានប្រវត្តិសាស្ត្រវត្តភ្នំ។

ការសែនកាត់ឆុង និងសែនសុំពរសុំជ័យលាភសំណាង បានធ្វើឱ្យសកម្មភាពនៅទីតាំងរមណីយដ្ឋានប្រវត្តិសាស្ត្រ វត្តភ្នំ ពិសេសនៅទីតាំងលោកតាព្រះចៅ មានភាពមមាញឹកជាខ្លាំង។ ជារៀងរាល់ថ្ងៃ ពិសេសនៅថ្ងៃសៅរ៍ និងថ្ងៃអាទិត្យ មនុស្សម្នាកកកុញចេញចូលនៅទីតាំងលោកតាព្រះចៅ ដោយម្នាក់មានភ្ជាប់ជាមួយរណ្ដាប់សែន មានទាំងផ្លែឈើ សាច់ជ្រូកបីជាន់ ពងទា និងមានទាំងអ្នកខ្លះនាំយកទាំងជ្រូកខ្វៃទៀតផង ដើម្បីធ្វើការសែនសុំពរសុំជ័យ និងសែនកាត់ឆុង កាត់ចោលភាពចង្រៃ នាំមកវិញនូវលាភសំណាង នៅពេលឆ្នាំកំណើតរបស់ខ្លួន ឆុងជាមួយទេវតាឆ្នាំថ្មី។

ជាជំនឿរបស់ពលរដ្ឋខ្មែរកាត់សែស្រឡាយចិន ឆ្នាំដែលឆុងជាមួយឆ្នាំម្សាញ់ ២០២៥នេះ មានចំនួន ៤ ឆ្នាំ រួមមាន ឆ្នាំកុរឆុង ១០០ភាគរយ ឆ្នាំម្សាញ់ជាន់ឆ្នាំ ឆុង៧៥ភាគរយ ឆ្នាំវកឆុង ៥០ភាគរយ និងឆ្នាំខាលុង ៥ភាគរយ។ ជាទិ្ឋភាពនៅព្រឹកថ្ងៃចន្ទនេះ ទោះបីជាថ្ងៃបំពេញការងារក្ដី ក៏នៅតែមានពលរដ្ឋជាច្រើន ខ្លះទៅជាមួយក្រុមគ្រួសារ ខ្លះទៅជាមួយមិត្ត ដើម្បីទៅសែនសុំពរសុំជ័យ និងសែនកាត់ឆុងនៅទីតាំងលោកតាព្រះចៅ។

តាមការសាកសួរ អ្នកខ្លះមកសែននៅទីតាំងលោកតាព្រះចៅនេះ ជាលើកទី ១ រីឯអ្នកខ្លះទៀត មកសែននៅទីតាំងលោកតាព្រះចៅជារៀងរាល់ឆ្នាំ ទោះឆ្នាំកំណើតរបស់ខ្លួនមិនឆុងយ៉ាងណាក្ដី។ ការមកធ្វើពិធីនេះ ដោយភ្ជាប់ជាមួយជំនឿជឿជាក់ដែរថា ក្រោយសែនរួចរាល់ ខ្លួននឹងមានលាភសំណាង រកស៊ីកាក់កប ទ្រព្យធនហូរចូល និងមានភាពសុខសប្បាយក្នុងក្រុមគ្រួសារ។

ផ្តោតសំខាន់លើការកាត់ឆុង សម្រាប់អ្នកកើតឆ្នាំកំណើតទាំងបួន គឺឆ្នាំ ម្សាញ់ ឆ្នាំកុរ ឆ្នាំវក និងឆ្នាំខាល ត្រូវមានជាចាំបាច់ពងទា សាច់ជ្រូកបីជាន់ឆៅ ដើម្បីធ្វើពិធីកាត់ឆុង។ ក្រុមការងារជាច្រើននៅទីតាំងលោកតាព្រះចៅ នឹងជួយរៀបចំណែនាំពីដំណាក់កាលមួយ ទៅដំណាក់កាលមួយ។ ចុងក្រោយគឺដាក់សាច់ជ្រូកចូលមាត់ខ្លា និងបោកពងទា។ នេះជាការលើកឡើងរបស់ លោកតា យឹម ម៉ាឡា ជាអ្នកប្រចាំការនៅកន្លែងកាត់ឆុង។

តាមក្រដាសបិទផ្សាយនៅទីតាំងលោកតាព្រះចៅបង្ហាញថា ចាប់ពីថ្ងៃទី០១ ខែកុម្ភៈ រហូតដល់ថ្ងៃទី ១៥ ខែកុម្ភៈ អ្នកដែលឆុងឆ្នាំត្រូវមកជាវនំសូដាទិព្វយកទៅថ្វាយជំនាងផ្ទះ ឬម្ចាស់់ទឹកម្ចាស់ដី របស់ខ្លួន ដើម្បីសុំសេចក្ដីសុខ សេចក្ដីចម្រើន។ ចំពោះការមកសែនខ្លាឆ្នាំថ្មី ដើម្បីរំដោះគ្រោះគឺចាប់ពីថ្ងៃទី ៦ ខែមីនា ឆ្នាំ ២០២៥តទៅ៕ អត្ថបទ៖គឹមហុក