រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យស្វែង​យល់​អំពី​ស្ថាន​ភាព​ភូមិ​សាស្ត្រ និងការរស់នៅ​របស់ពលរដ្ឋក្នុងភូមិចំនួន២ ខេត្តពោធិ៍សាត់ដែលគ្រោងរៀបចំឱ្យក្លាយជាភូមិគំរូ

ពោធិ៍សាត់៖ ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ អមដំណើរ​ដោយ​ប្រតិភូ​ក្រសួង​អភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្ត បានធ្វើការចុះពិនិត្យ និងស្វែង​យល់​អំពី​ស្ថាន​ភាព​ភូមិ​សាស្ត្រ និងការរស់នៅរបស់ប្រជាពលរដ្ឋក្នុងភូមិចំនួន០២ ក្នុងស្រុកបាកាន ខេត្តពោធិ៍សាត់ ដែលក្រសួងអភិវឌ្ឍន៍ជនបទ រួមនិងមន្ទីរអភិវឌ្ឍន៍ជនបទខេត្ត គ្រោងរៀបចំដាក់បញ្ចូលជាភូមិគំរូ ។

ក្នុងឱកាសនោះ ឯកឧត្តមរដ្ឋមន្រ្ដី ឆាយ ឫទ្ធិសែន មានប្រសាសន៍លើកឡើងថា រាជរដ្ឋាភិបាលកម្ពុជាអាណត្តិទី៧នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត មានការយកចិត្តទុកដាក់ខ្ពស់ក្នុងការបង្កើតសមិទ្ធផលសម្រាប់ជាតិ និងប្រជាជន តាមរយៈការផ្តល់សេវាសាធារណៈ ការបង្កើតសហគមន៍រួមគ្នា ការរៀបចំរចនាសម្ព័ន្ធ និងផែនការអនុវត្តរួមគ្នា ដើម្បីធានានូវប្រសិទ្ធព និងប្រសិទ្ធផលខ្ពស់ៃការងារ ក្រោមអភិក្រមជីវភាពនៃប្រព័ន្ធតួអង្គតែមួយ ដូចនេះហើយសម្តេចធិបតី ហ៊ុន ម៉ាណែត បានណែនាំឱ្យក្រសួងចំនួន៣រួមមាន ក្រសួងអភិវឌ្ឍន៍ជនបទ ក្រសួងកសិកម្ម រុក្ខាប្រមាញ់និងនេសាទ និងក្រសួងធនធានទឹកនិងឧតុនិយម ត្រូវពួតដៃគ្នាជំរុញសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ ដោយត្រូវជម្រុញការងារនេះឱ្យចេញជារូបរាងពិតប្រាកដ ឆាប់រហ័ស មានលទ្ធផលល្អ ជាគំរូដល់សហគមន៍នានា ទទួលបាននូវភោគផលសេដ្ឋកិច្ច និងសេដ្ឋកិច្ចមាត្រដ្ឋានខ្ពស់ ដែលស្របនឹងគោលនយោបាយជាតិ កម្ពុជាឆ្ពោះទៅជាប្រទេសមានចំណូលខ្ពស់នៅឆ្នាំ ២០៥០ ។

បើតាមលោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានបញ្ជាក់ឱ្យដឹងបន្ថែមថា ក្រសួងភិវឌ្ឍន៍ជនបទបានរៀបចំដាក់បញ្ចូលការរៀបចំភូមិគំរូ ទៅក្នុងផែនការយុទ្ធសាស្ដ្រ ឆ្នាំ២០២៥ និងក្នុងគោលនយោបាយជាតិអភិវឌ្ឍន៍ជនបទឆ្នាំ២០២៥ -២០៣៥ ដូចនេះមន្ទីរអភិវឌ្ឍន៍ជបទខេត្តពោធិ៍សាត់ មានសហការជាមួយអាជ្ញាធរមូលដ្ឋាន និងភាគីពាក់ព័ន្ធបានយកចិត្តទុកដាក់ក្នុងចលនាភូមិគំរូ ដែលមានសក្កានុពលសមស្រប និងក្ខណៈសម្បត្តិតាមគោលការណ៍ ដោយធ្វើការជ្រើសរើសភូមិចំនួន០២ រួមមានភូមិស្រៃល្វា ក្នុងឃុំត្រពាំងជង ស្រុកបាកាន និងភូមិកំពង់ក្តី ក្នុងឃុំរំលេច ស្រុកបាកាន ត្រៀមរៀបចំបង្កើតទៅជាភូមិគំរូទូទាំងប្រទេស ដោយភូមិគំរូដែលគ្រោងនឹងបង្កើតនោះគឺជា “សហគមន៍ដែលមានសន្ដិសុខ សុវត្ថិភាព ហេដ្ឋារចនាសម្ព័ន្ធ កម្រិតជីវភាពសមរម្យ អ្នកភូមិមានការចូលរួមសកម្មភាពអភិវឌ្ឍន៍ក្នុងភាពជាម្ចាស់ គិតពីផលប្រយោជន៍រួម ក្នុងការឆ្ពោះទៅរកគោលដៅរួមរបស់សហគមន៍ និងមានការអភិវឌ្ឍប្រកបដោយចីរភាព” ដើម្បីលើកកម្ពស់គុណភាព និងគុណតម្លៃនៃជីវិតរស់នៅឱ្យប្រសើរឡើង ប្រកបដោយបរិយាបន្ន ទាំងផ្នែកសេដ្ឋកិច្ច សង្គម និងវប្បធម៌ ដោយត្រូវបានកំណត់ដោយលក្ខណៈវិនិច្ឆ័យចំនួន៥ចំណុច រួមមាន៖ទី១សេដ្ឋកិច្ច ,ទី២សង្គមវប្បធម៌ , ទី៣សុខភាពនិងបរិស្ថានរស់នៅ ,ទី៤ហេដ្ឋារចនាសម្ព័ន្ធ និងទី៥អភិបាលកិច្ច ៕ អត្ថបទ រូបភាព ៖ ភិរុណ ពៅ