លោក Pep សោកស្ដាយការរបូតពិន្ទុពីប្រកួតមុន នាំឲ្យព្រះខ័នរាជ អស់ឱកាសប្រជែង​កៅអីវគ្គបន្ដ

លោក Pep Munoz គ្រូបង្វឹកក្រុមព្រះខ័នរាជស្វាយរៀង ហាក់មានការសោកស្ដាយ ចំពោះ​ការ​ខក​ខាន​ដណ្ដើម​ពិន្ទុពីការប្រកួតមុនៗ ពិសេសការប្រកួតក្នុងដី ជាមួយក្រុមឥណ្ឌូនេស៊ី PSM Makasar ដែលនាំឲ្យក្រុមខ្លួន ពិបាកក្នុងការប្រជែងកៅអីវគ្គបន្ដ រហូតអស់ឱកាស​ក្នុង​ការ​ប្រកួត​ជើង​ឯកក្លិបបាល់ទាត់អាស៊ីអាគ្នេយ៍ ឆ្នាំ២០២៤/២៥ ។

នេះបើតាមការលើកឡើង ក្រោយក្រុមជើងឯកលីគកំពូលកម្ពុជា បានត្រឹមប្រកួត​ស្មើ​ក្រុម​ម្ចាស់​ផ្ទះ Dong A Thanh Hoa របស់វៀតណាម ០-០ កាលពីរាត្រីថ្ងៃពុធ សម្រាប់ការប្រកួតទី៤ ក្នុង​ពូលA នៃព្រឹត្តិការណ៍បាល់ទាត់ជើងឯកក្លិបប្រចាំតំបន់ ដែលនាំឲ្យក្រុមព្រះខ័នរាជស្វាយរៀង បាន​អស់​ឱកាសជាផ្លូវការ ក្នុងការប្រជែងកៅអីវគ្គ ៤ក្រុមចុងក្រោយ ។

គ្រូបង្វឹកជនជាតិអេស្ប៉ាញដដែលបន្ដថា ការប្រកួតជាមួយក្រុមខ្លាំង Thanh Hoa កូន្រុមខ្លួនពិតជាធ្វើបានល្អ ទោះបីមិនអាចលេងតាមការរៀបចំ ១០០% ដោយសារបញ្ហាទីលានក៏ដោយ ។ តែសោកស្ដាយ ដែលក្រុមខ្លួន មិនអាចទាត់បញ្ចប់ទីបាន ហើយផ្គួបជាមួយការប្រកួតពីមុនមួយចំនួន ក្រុមខកខានទទួលបានពិន្ទុផង នាំឲ្យក្រុមអស់ឱកាសប្រជែងកៅអីវគ្គបន្ដតែម្ដង ។

គួរដឹងថា ក្រោយទទួល ១ពិន្ទុពីក្រុមខ្លាំងវៀតណាម Dong A Thanh Hoa នាំឲ្យព្រះខ័នរាជស្វាយរៀង បន្ដឈរលេខ៥ ដោយរកបាន ៤ពិន្ទុ តាមពីក្រោយក្រុម Dong A Thanh Hoa ដែលឈរលេខ៤ រកបាន ៦ពិន្ទុ ព្រមទាំងក្រុម Terengganu FC របស់ម៉ាឡេស៊ី និងក្រុម PSM Makasar របស់ឥណ្ឌូនេស៊ី ដែលឈរលេខ២ និងលេខ៣ រកបាន ៧ពិន្ទុស្មើគ្នា គ្រាដែលក្រុម BG Pathum United របស់ថៃ ឈរកំពូលតារាង រកបាន ៨ពិន្ទុ ។

ដោយសារក្រុមនីមួយៗ នៅសល់ ១ប្រកួតក្នុងដៃ ធ្វើឲ្យព្រះខ័នរាជស្វាយរៀង អស់ឱកាសក្នុងការប្រជែងកៅអីវគ្គបន្ដ ទោះបីអាចយកឈ្នះការប្រកួតចុងក្រោយក៏ដោយ ។ សម្រាប់ជំនួបបញ្ចប់ពូល ក្រុមកំពុងឈរលេខ២ នៃលីគកំពូលកម្ពុជា នឹងត្រូវជួបក្រុម Shan United របស់មីយ៉ាន់ម៉ា នាថ្ងៃទី០៥ ខែកុម្ភៈ ឆ្នាំ២០២៥ ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ៕ អត្ថបទ លី ឈុនឡា