ក្រុមអាជីវករខេត្តបាត់ដំបងបង្ហាញក្តីរីករាយក្រោយទទួល​ព័ត៌មាននិងចំណេះដឹងថ្មីៗក្នុងវិស័យកសិកម្ម

ភ្នំពេញ៖​ ក្រុមការងារក្រសួងកសិកម្ម រុក្ខាប្រមាញ់ និង​នេសាទ ដឹកនាំដោយឯកឧត្តមរដ្ឋលេខាធិការ គង់ ច័ន្ទវាសនា​ និងមានការចូលរួមពីតំណាងរដ្ឋបាលខេត្ត​ អគ្គនាយកដ្ឋានកសិកម្ម​ និងមន្ទីរកសិកម្មខេត្ត នៅថ្ងៃទី២៣​ មករា ឆ្នាំ២០២៥ បានជួបសំណេះសំណាលជាមួយអាជីវករជី និងថ្នាំកសិកម្មចំនួនជាង២០០នាក់ នៅខេត្តបាត់ដំបង ដេីម្បីផ្សព្វផ្សាយអំពីគោលនយោបាយ​ និងកិច្ចខិតខំប្រឹងប្រែង​របស់រាជរដ្ឋាភិបាល ក្នុងការជំរុញអភិវឌ្ឍវិស័យកសិកម្ម​។

ឯកឧត្តមរដ្ឋលេខាធិការបានលេីកឡេីងពី​សមិទ្ធផលថ្មីៗដែលក្រសួងកសិកម្ម​ រុក្ខាប្រមាញ់​ និងនេសាទសម្រេចបានក្នុងឆ្នាំ២០២៤កន្លងទៅ​ ក្នុងការអនុវត្តគោល​នយោបាយអាទិភាពទី៥​ និងទី៦របស់រាជរដ្ឋាភិបាល​ រួមមានការជួយរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប។ ឯកឧត្តមក៏បានជម្រាបជូនអាជីវករអំពីកិច្ចខិតខំប្រឹងប្រែងរបស់ក្រសួងក្នុងការចុះដោះស្រាយបញ្ហាប្រឈមរបស់បងប្អូនប្រជាកសិករជាបន្តបន្ទាប់ផងដែរ។

្នុងនាមជាដៃគូ និងអ្នកនៅជាប់ជាមួយកសិករ​ តាមរយៈការផ្តល់បច្ចេកទេស និងការផ្គត់ផ្គង់ធាតុចូលកសិកម្ម ឯកឧត្តមបានស្នើឱ្យអាជីវករជី និងថ្នាំកសិកម្មទាំងអស់ចូលរួមជាមួយរាជរដ្ឋាភិបាល និងក្រសួងកសិកម្ម​ រុក្ខាប្រមាញ់​ និងនេសាទ​ ក្នុងការចែករំលែកព័ត៌មានល្អៗ និងវិជ្ជមាន​ ដេីម្បីជួយដល់កសិករ​ និងជៀសវាងផ្សព្វផ្សាយព័ត៌មានដែលបង្កចលាចល​ និងអសន្តិសុខសង្គម​ ដែលផ្តល់ផលអវិជ្ជមានដល់កសិករ និងវិស័យកសិកម្មទាំងមូល។

បន្ថែមលើនេះ ឯកឧត្តមរដ្ឋលេខាធិការ បានស្នើឱ្យបងប្អូនអាជីវករចែកចាយតែផលិតផលដែលស្របច្បាប់ ដែលមានការត្រួតពិនិត្យគុណភាព​ និងការចុះបញ្ជិកាត្រឹមត្រូវដោយក្រសួង​ និងបានស្នើឱ្យរដ្ឋបាលខេត្តបន្តកិច្ចសហការទប់ស្កាត់ចរាចរណ៍ផលិតផលខុសច្បាប់ និងចាត់វិធានការលេីការលក់ផលិតផលខុសច្បាប់​ តាមបណ្តាញសង្គម។

ក្រុមអាជីវករចូលរួម​ បានបង្ហាញក្តីរីករាយដែល​បានទទួលព័ត៌មាន និងចំណេះដឹងថ្មីៗពាក់ព័ន្ធនឹងវិស័យកសិកម្ម ហើយប្តេជ្ញាចូលរួមគាំទ្រ និងជួយផ្សព្វផ្សាយគោលនយោបាយរបស់រាជរដ្ឋាភិបាល និងព័ត៌មានវិជ្ជមាននានាក្នុងវិស័យកសិកម្មជាប្រយោជន៍កសិករ និងចូលរួមចំណែកអភិវឌ្ឍវិស័យកសិកម្ម៕