កម្ពុជា-អូស្ត្រាលីកំពុងរៀបចំផែនការជំរុញអ្នកវិនិយោគទៅអូស្ត្រាលី ដើម្បីឈ្វេងយល់ពីសក្តានុពលផ្សេងៗ

កម្ពុជា-អូស្ត្រាលី ពិភាក្សាអំពីលទ្ធភាពនៃការរៀបចំបេសកកម្មជំរុញ និងទាក់ទាញវិនិយោគ ទៅកាន់ប្រទេសអូស្ត្រាលី ដែល ជាផ្នែកមួយនៃយុទ្ធនាការទាក់ម៉ូយ និងក៏ជាការបញ្ជ្រាបការឈ្វេងយល់អំពីសក្តានុពល និងបរិយាកាសវិនិយោគរបស់កម្ពុជា។

ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានដឹកនាំសហការីទទួលជួបពិភាក្សាការងារ ជាមួយ លោកស្រី Carolyn Bagster លេខាទី១ នៃស្ថានទូតអូស្ត្រាលីប្រចាំកម្ពុជា ក្នុងគោលបំណងពិភាក្សាអំពីលទ្ធភាព នៃការរៀបចំ បេសកកម្មជំរុញ និងទាក់ទាញវិនិយោគទៅកាន់ប្រទេសអូស្ត្រាលី ជូនថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា, តំណាងក្រសួង ស្ថាប័ន ពាក់ព័ន្ធ, និងវិស័យឯកជន។

ក្នុងជំនួបនេះ, អង្គប្រជុំបានពិភាក្សាប្រកបដោយផ្លែផ្កា លើទិដ្ឋភាពនៃការរៀបចំ និងការប្រព្រឹត្តទៅនៃបេសកកម្មដ៏មានសារៈ សំខាន់ខាងលើ។ ជាមួយគ្នានេះ អង្គប្រជុំក៏បានផ្លាស់ប្តូរមតិយោបល់អំពីឧត្តមានុវត្តន៍ និងទស្សនទាននៃការរៀបចំ ដើម្បីសម្របជាមួយ នឹងស្ថានភាព និងនិន្នាការរបស់សហគមន៍ធុរកិច្ចអូស្ត្រាលី។ អង្គប្រជុំបានបង្ហាញនូវសុទិដ្ឋិនិយមថា គម្រោងនៃការរៀបចំបេសកកម្ម ខាងលើ នឹងប្រែក្លាយទៅជាសមិទ្ធផលរូបីសម្រាប់ប្រទេសទាំងពីរ នាឱកាសខួបគម្រប់ ៧៣ ឆ្នាំ នៃទំនាក់ទំនងការទូតកម្ពុជា និង អូស្ត្រាលីជាក់ជាពុំខាន។

សូមបញ្ជាក់ផងដែរថា បេសកកម្មជំរុញ និងទាក់ទាញវិនិយោគ គឺជាផ្នែកមួយ នៃយុទ្ធនាការ​ទាក់ម៉ូយ ដែលបានដាក់ចេញឱ្យ ប្រតិបត្តិដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សំដៅលើកកម្ពស់កិត្យានុភាព និងបញ្ជ្រាបការឈ្វេងយល់អំពីសក្តានុពល និងបរិយាកាសវិនិយោគរបស់កម្ពុជាលើឆាកតំបន់ និងអន្តរជាតិ៕ អត្ថបទ៖ សុន រ៉ាឌី