យុវជនជាច្រើនចាប់អារម្មណ៍ និងស្វែងយល់ព័ត៌មានតាមរយៈបញ្ជរសេវាសាធារណៈចល័ត

ក្រោយប្រកាសដាក់ឲ្យប្រើប្រាស់ជាផ្លូវការបញ្ជរសេវាសាធារណៈចល័ត និងប្រគល់ជូនដល់សាកលវិទ្យាល័យ វិទ្យាស្ថាន គ្រឹះស្ថានបណ្តុះបណ្តាល ផ្សារទំនើប ហាងកាហ្វេ និងក្រុមហ៊ុនឯកជន បានមើលឃើញថា មានការចាប់អារម្មណ៍ខ្លាំងពីក្រុមយុវជន សិស្ស និស្សិត ដែលចូលរួមប្រើប្រាស់និងស្វែងយល់ព័ត៌មាននានា ដែលបង្កើតឡើងដោយក្រសួងការងារ និងបណ្តុះបណ្តាលវិជ្ជាជីវៈ។

ឯកឧត្តម ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) ក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី៣១ ខែមករានេះ បានមានប្រសាសន៍ឲ្យដឹងថា បញ្ជរសេវាសាធារណៈចល័តនេះ វិទ្យាស្ថានលោកទទួលបានចំនួន១គ្រឿង ដើម្បីបង្ខិតការផ្តល់សេវាសាធារណៈឲ្យកាន់តែខិតជិតមូលដ្ឋាន សំដៅលើកកម្ពស់ការកសាងពលរដ្ឋឌីជីថល និងការផ្តល់សេវាកម្ម និងព័ត៌មានសំខាន់ៗផ្លូវការ អាចទុកចិត្តបានដល់សិស្សនិស្សិត ក៏ដូចជាសាធារណជនទូទៅបានដឹង បានយល់ បានជ្រាប បានត្រៀមខ្លួន និងចាប់យកឱកាសភ្លាមៗ ពាក់ព័ន្ធនឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ។

ឯកឧត្តម បានកត់សម្គាល់ឃើញថា មានការសប្បាយទាំងបុគ្គលិក មន្រ្តីរាជការ ក៏ដូចជាសិស្សនិស្សិត ដោយសារពួកគាត់ងាយស្រួលក្នុងការស្វែងរកការងារធ្វើ ហើយគាត់អាចចុះឈ្មោះក្នុងប្រអប់ទូរបញ្ជរនេះ ដោយចំណេញទាំងពេលវេលា និងមិនគិតថ្លៃអ្វីទាំងអស់។

កំពុងពិនិត្យមើលព័ត៌មាននានារបស់បញ្ជរសេវាសាធារណៈចល័តនេះ ក្រុមនិស្សិតឆ្នាំទី១ រៀនជំនាញផ្នែកមេកានិចឧស្សាហកម្ម ដូចគ្នា នៅក្នុងវិទ្យាស្ថានបច្ចេកទេសឧស្សាហកម្ម បាននិយាយស្រដៀងគ្នាថា សេវាសាធារណៈចល័តនេះ គឺជាការធ្វើទំនើបកម្ម លើសេវាសាធារណៈថ្មីមួយទៀត និងពិតជាមានសារៈសំខាន់ខ្លាំងណាស់សម្រាប់ពួកគាត់ជានិស្សិត ក៏ដូចជាសម្រាប់ប្រជាពលរដ្ឋដទៃផ្សេងទៀត ក្នុងការទទួលបាននូវព័ត៌មានសំខាន់ៗ ហើយច្បាស់លាស់ពិតប្រាកដ ជាពិសេសផ្តល់ភាពងាយស្រួលលើការផ្តល់សេវាសាធារណៈបានពេញលេញ និងនៅគ្រប់ទីកន្លែង។

កាលពីថ្ងៃទី២៣ ខែមករា ឆ្នាំ២០២៥កន្លងទៅ ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ឱ្យដំណើរការជាផ្លូវការ បញ្ជរសេវាសាធារណៈចល័តចំនួន ១០០គ្រឿង សម្រាប់សាធារណជនប្រើប្រាស់ជាជំហានទី១ នៅតាមទីតាំងសាធារណៈនានា ខណៈនៅខែមេសាខាងមុខ ក្រសួងការងារ គ្រោងនឹងដាក់ឲ្យប្រើប្រាស់បញ្ជរនេះចំនួន ១០០គ្រឿងបន្ថែមទៀត នៅតាមទីសាធារណៈ។ សូមបញ្ជាក់ទៀតថា បញ្ជរសេវាសាធារណៈនេះ មានមុខងារសំខាន់ៗចំនួន១០ មានដូចជា៖ សេវាចុះឈ្មោះស្វែងរកការងារ, សេវាចុះឈ្មោះស្វែងរកបុគ្គលិក, សេវាចុះឈ្មោះសិក្សាជំនាញវិជ្ជាជីវៈ , សេវាចុះឈ្មោះស្វែងរកការងារក្រៅប្រទេស , សេវាចុះឈ្មោះសមាជិក ប.ស.ស. , បណ្ណ/សៀភៅការងារកម្មករនិយោជិតខ្មែរ, ការផ្តល់ទិដ្ឋាការប្រើប្រាស់កម្មករនិយោជិតវ័យក្មេង, សេវាតាមដានសេវាសាធារណៈក្រសួងការងារ, ប្រអប់បណ្តឹងអនាមិក និងសេវាផ្សេងៗ៕ អត្ថបទដោយ ឈិត បូរ៉ាវី