អភិបាលខេត្តតាកែវ ដឹកនាំកម្លាំង ចុះកាប់បំផ្លាញដំណាំកញ្ឆាខុសច្បាប់ចំនួន៧ទីតាំង នៅស្រុកគីរីវង់

តាកែវ៖ អភិបាលខេត្តតាកែវឯកឧត្តម វ៉ី សំណាង នៅថ្ងៃទី២ ខែកុម្ភៈ ឆ្នាំ ២០២៥នេះ បានដឹកនាំកម្លាំងចម្រុះរួមមាន៖ កម្លាំងនគបាល ទាហាន និងកងរាជអាវុធហត្ថ ចុះបង្រ្កាប និងកាប់ដុតបំផ្លាញដំណាំកញ្ឆាខុស ដែលក្រុមជនខិលខូច បានធ្វើការលួចដាំខុសច្បាប់ នៅតាមជំរាលភ្នំបាយ៉ងកោ ដែលស្ថិតនៅក្នុងឃុំព្រះបាទជាន់ជុំ ស្រុកគីរីវង់ ខេត្តតាកែវ ។នៅក្នុងការដឹកនាំកម្លាំងចុះបង្រ្កាប និងកាប់បំផ្លាញដំណាំកញ្ឆាខុសច្បាប់នេះពី​សំណាក់​ឯកឧត្តម វ៉ី សំណាង ​អភិបាលខេត្តតាកែវ កម្លាំងចម្រុះ​បានធ្វើការកាប់និងដុតបំផ្លាញទីតាំងដាំដំណាំ​កញ្ឆាខុសច្បាប់​ចំនួន៧ទីតាំង ​ដែលមានដើមកញ្ឆាជាង៣ពាន់ដើម នៅលើផ្ទៃដីប្រមាណជាង ១ពាន់ម៉ែត្រការ៉េ ព្រមទាំងបានបំផ្លាញអាងទឹកសម្រាប់ស្រោចស្រព​ដំណាំកញ្ឆា​ចំនួន៦អាង ទឹកថែមទៀតផង។

លោកក្នុងឱកាសនោះ ឯកឧត្តម វ៉ី សំណាង បានណែនាំដល់សមត្ថកិច្ច ជាពិសេសសមត្ថកិច្ច​នៅមូលដ្ឋាន​ធ្វើការតាមដានឃ្លាំមើលអោយបានញឹកញាប់ និងបន្តចុះពិនិត្យ​មើលដល់ទីតាំង​ដើម្បីធ្វើយ៉ាងណាបង្រ្កាប​អោយអស់នៅការលួចដាំដំណាំកញ្ឆាខុសច្បាប់​នេះ​ នៅតាមជំរាលភ្នំបាយ៉ង់កោ ក្នុងស្រុកគីរីវង់។

ឯកឧត្តមអភិបាលខេត្តតាកែវ បានណែនាំដល់កម្លាំងចម្រុះទាំងអស់​ត្រូវចុះបង្រ្កាប​ការលួចដាំដំណាំ​កញ្ឆាខុសច្បាប់​នៅតាមជួភ្នំបាយ៉ងកោ ក្នុងស្រុកគីរីវង់ រៀងរាល់៣ខែម្ដង ​និងត្រូវធ្វើដូចភ្លៀងរលឹម សំដៅធ្វើយ៉ាងណាទប់ស្កាត់ អោយបាននៅការលួចដាំដំណាំកញ្ឆាខុសច្បាប់នេះ​អោយអស់៕