ក្រសួងអប់រំសម្រេចរៀបចំការប្រឡងសិស្សពូកែទូទាំងប្រទេសឡើងវិញសម្រាប់ឆ្នាំសិក្សា ២០២៤-២០២៥

ភ្នំពេញ៖ ក្រសួងអប់រំ យុវជន និងកីឡា នៅព្រឹកថ្ងៃទី៣ ខែកុម្ភៈ ឆ្នាំ២០២៥នេះ បានចេញលិខិតជម្រាបទៅកាន់ប្រធានមន្ទីរអប់រំ យុវជន និងកីឡា រាជធានី ខេត្ត ស្ដីពីការរៀបចំការប្រឡងជ្រើសរើសសិស្សពូកែទូទាំងប្រទេសសម្រាប់ឆ្នាំសិក្សា ២០២៤-២០២៥។

ក្រសួងអប់រំបានបញ្ជាក់ក្នុងលិខិតថាថា៖«នៅឆ្នាំសិក្សា ២០២៤-២០២៥ ក្រសួងអប់រំ យុវជន និងកីឡានឹងបន្តរៀបចំការប្រឡងជ្រើសរើសសិស្សពូកែទូទាំងប្រទេស ដោយរៀបចំដូចលំនាំនៃការប្រឡងនៅឆ្នាំសិក្សា ២០២៣-២០២៤»។

ក្រសួងបញ្ជាក់ថា ក្រសួងនឹងចេញសេចក្តីណែនាំបច្ចេកទេស សម្រាប់ការប្រឡងជ្រើសរើសសិស្សពូកែប្រចាំរាជធានី ខេត្ត និងទូទាំងប្រទេសសម្រាប់ឆ្នាំសិក្សា ២០២៤-២០២៥។

សូមជម្រាបថា ការចេញលិខិតរបស់ក្រសួងអប់រំអំពីការសម្រេចរៀបចំការប្រឡងសិស្សពូកែទូទាំងប្រទេសឡើងវិញ បន្ទាប់ពីក្រសួងបានចេញលិខិតមួយកាលពីថ្ងៃទី២៧ ខែមករា ឆ្នាំ២០២៥នេះ សម្រេចផ្អាកការរៀបចំការប្រឡងជ្រើសរើសសិស្សពូកែទូទាំងប្រទេស សម្រាប់ឆ្នាំសិក្សា ២០២៤-២០២៥ ប៉ុន្តែក្រសួងលើកទឹកចិត្តឱ្យបណ្តារាជធានី-ខេត្ត ម្ចាស់ការក្នុងការរៀបចំការប្រឡងជ្រើសរើសសិស្សពូកែ ប្រចាំរាជធានី-ខេត្ត ដោយខ្លួនឯង។ បន្ទាប់ពីចេញលិខិតនេះ សាធារណៈជន ជាពិសេសសិស្សានុសិស្សបង្ហាញការសោកស្ដាយដែលក្រសួងបានសម្រេចផ្អាកការប្រឡងនេះ៕