លោកTrump និងលោកPutin អាចជួបគ្នានៅប្រទេសអារ៉ាប៊ីសាអ៊ូឌីត ឬអារ៉ាប់រួម ដែលមិនមែនជាសមាជិកICC

រុស្ស៊ីកំពុងពិចារណាជម្រើសលើប្រទេសអារ៉ាប៊ីសាអ៊ូឌីត និងអារ៉ាប់រួម ជាទីតាំងដែលអាចធ្វើទៅបានសម្រាប់កិច្ចចរចារវាងលោក Donald Trump និងលោក Vladimir Putin។

យោងតាមប្រភពមិនបញ្ជាក់របស់រុស្ស៊ី ក្រុមមន្ត្រីជាន់ខ្ពស់ទីក្រុងមូស្គូ បានបំពេញទស្សនកិច្ចប្រទេសទាំងពីរក្នុងប៉ុន្មានសប្តាហ៍ថ្មីៗនេះ។ ក្រុមអ្នកការទូត និងមន្ត្រីចារកម្មរុស្ស៊ីមួយចំនួន បានជំទាស់នឹងគំនិតនេះ ដោយបានចង្អុលទៅទំនាក់ទំនងយោធា និងសន្តិសុខជិតស្និទ្ធ ដែលទាំងអារ៉ាប៊ីសាអ៊ូឌីត ទាំងអារ៉ាប់រួម មានជាមួយសហរដ្ឋអាមេរិក។ ទោះយ៉ាងណាក៏ដោយ ទាំងលោក Trump ទាំងលោក Putin មានទំនាក់ទំនងមិត្តភាពល្អជាមួយក្រុមមេដឹកនាំអារ៉ាប់។

នៅដំណាក់កាលនេះ ប្រភពពីសារព័ត៌មាន Reuters កំពុងច្រានចោលលទ្ធភាពនៃការរៀបចំព្រឹត្តិការណ៍នេះនៅក្នុងប្រទេសទួរគី។ ប្រធានាធិបតីអាមេរិកបាននិយាយកាលពីថ្ងៃមុនថា រដ្ឋបាលរបស់លោកបានរៀបចំផែនការកិច្ចប្រជុំ និងការពិភាក្សាជាមួយភាគីនានា រួមទាំងអ៊ុយក្រែន និងរុស្ស៊ី។ អ្នកនាំពាក្យវិមានក្រឹមឡាំង លោក Dmitriy Peskov បានឆ្លើយតបថា ការប្រាស្រ័យទាក់ទង ត្រូវបាន គ្រោងទុកជាក់ស្តែង។

រាជទាយាទអារ៉ាប៊ីសាអ៊ូឌីត Mohammed bin Salman និងប្រធានាធិបតីអារ៉ាប់រួម លោកMohammed bin Zayed Al Nahyan កំពុងរក្សាអព្យាក្រឹតភាពក្នុងសង្គ្រាមនៅអ៊ុយក្រែន។ ប្រទេសទាំងពីរ ពុំចូលរួមក្នុងការដាក់ទណ្ឌកម្មរបស់លោកខាងលិចប្រឆាំងនឹងទីក្រុងមូស្គូទេ ប៉ុន្តែរក្សាទំនាក់ទំនងជាមួយមេដឹកនាំអ៊ុយក្រែន លោក Volodymyr Zelensky ។

លើសពីនេះ គ្មានប្រទេសណាមួយបានចុះហត្ថលេខាលើលក្ខន្តិកៈទីក្រុងរ៉ូម នៃតុលាការឧក្រិដ្ឋកម្មអន្តរជាតិICC ដែលបានចេញដីកាចាប់ខ្លួនលោក Putin ដោយហាមប្រាមរូបលោកមិនឱ្យចូលប្រទេសមួយចំនួនឡើយ៕