កម្ពុជា ប្រារព្ធទិវាជាតិសុខភាពមាតា ទារក និងកុមារ និងទិវាសុខភាពពិភពលោក

ក្រសួងសុខាភិបាល នៃព្រះរាជាណាចក្រកម្ពុជា នាព្រឹកថ្ងៃទី២១ ខែកុម្ភៈ ឆ្នាំ២០២៥នេះ បាន​ប្រារព្ធ​ទិវាជាតិសុខភាពមាតា ទារក និងកុមារ និងទិវាសុខភាពពិភពលោក ក្រោមប្រ​ធាន​បទ​ «ពង្រឹងភាពជាដៃគូរវាងសេវាសាធារណៈ និងឯកជនដើម្បីលើកកម្ពស់គុណភាពនៃការ ថែ​ទាំ​សុខ​ភាពមាតា ទារក កុមារ និងយុវវ័យ»។

ទិវាជាតិសុខភាពមាតា ទារក និងកុមារ និងទិវាសុខភាពពិភពលោក ប្រារព្ធ​ឡើង​ក្នុង​គោល​បំណង ដើម្បី​អបអរសាទរទិវាជាតិសុខភាពមាតា ទារក និងកុមារ និងទិវាសុខភាពពិភពលោក, បង្កើន​ការ​យល់​ដឹង និងកៀរគរការគាំទ្រការផ្តល់សេវាសុខភាពបន្តពូជ សុខភាពមាតា ទារក កុមារ និង​យុវវ័យ​, ពង្រឹងគុណភាពនៃការផ្តល់សេវាសារវន្ត សេវាសង្គ្រោះបន្ទាន់ផ្នែកសម្ភព និងថែ​ទាំ​ទារក​ទើប​កើត ជាពិសេសការ ថែទាំផ្ទៃពោះមុនសម្រាល និងពេលសម្រាលទាំងសេវាសាធារណៈ និង​ឯកជន​រួម​ទាំងប្រព័ន្ធបញ្ជូនប្រកបដោយ ប្រសិទ្ធពល កៀរគរការគាំទ្រ ដើម្បីបន្ត​កាត់​បន្ថយ​មរណ​ភាព​មាតា ទារក កុមារ និងពង្រឹងការសហការគ្រប់វិស័យពាក់ព័ន្ធ និងភាព​ជាដៃគូ​រវាង​សេវា​សាធារណៈ និងឯកជន ដើម្បីជម្រុញការផ្តល់ និងការទទួលសេវាសុខភាពបន្តពូជ សុខភាពមាតា ទារក កុមារ និងយុវវ័យ ជាពិសេស​ក្រុម​ងាយ​រង​គ្រោះ​ឱ្យ​បាន​គ្រប់​ជ្រុង​ជ្រោយ​ប្រកប​ដោយ​គុណភាព និងសមធម៌។

នាឱកាសនោះឯកឧត្តម សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែង​សារ​លិខិត​សម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជន​ឆ្នើម​ថ្នាក់​ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និង​កុមារ ក្នុងឱកាសទិវាជាតិ សុខភាពមាតា ទារក និងកុមារ ថាប្រាកដណាស់ប្រធានបទនេះ គឺត្រូវ​ពេល​វេលា និងឆ្លុះបញ្ចាំងពីការ ប្តេជ្ញាចិត្តរបស់ក្រសួង​សុខាភិបាល​ក្នុង​ការ​អនុវត្ត​វិធាន​ការ​គន្លឹះ​នានា ស្របតាមយុទ្ធសាស្ត្របញ្ចកោណរបស់ រាជរដ្ឋាភិបាលនីតិកាលទី៧ នៃរដ្ឋសភា។

ឯកឧត្តមបន្តថា ក្នុងឆ្នាំ២០២៤កន្លងទៅនេះកម្ពុជាសម្រេចបានសមិទ្ធផលធំៗជាច្រើន ដោយសារ​ប្រទេសជាតិមានសន្តិភាពពេញលេញ ស្ថិរភាពនយោបាយ សន្តិសុខ សណ្តាប់​ធ្នាប់​សាធារណៈ និងសុវត្ថិភាព មានស្ថិរភាពម៉ាក្រូសេដ្ឋកិច្ច ធ្វើឱ្យប្រជា​ពលរដ្ឋ​អាច​ប្រកប​របរ​ជំរុញ​ជីវភាព​គ្រួសារ និងសង្គម បានប្រសើរជាងមុន។ ខណៈដែលរាជរដ្ឋាភិបាលកម្ពុជា បាន​ពង្រីក​វិសាល​ភាព​នៃការគ្របដណ្តប់សេវា សុខាភិបាលជាសកលនៅកម្ពុជា។

ឯកឧត្តមបន្ថែមថា ការបន្តធ្វើកំណែទម្រង់​រដ្ឋបាល​សាធារណៈកា​រ​ពង្រឹង និង​បន្ត​អភិវឌ្ឍ​ប្រព័ន្ធ​សុខាភិបាល ព្រមទាំងការបន្តវិនិយោគលើធនធានមនុស្សក្នុងវិស័យសុខាភិបាល និងបច្ចេកវិទ្យា វេជ្ជ​សាស្ត្រទំនើប ជាគន្លឹះចាំបាច់ក្នុងការ ធ្វើឱ្យប្រជាពលរដ្ឋគ្រប់រូបទទួលបានសេវាថែទាំសុខភាព ការ​ព្យាបាលប្រកបដោយគុណភាព និងមានប្រសិទ្ធភាព ខ្ពស់។ ជាមួយនឹងការពង្រឹង និង​កែ​លម្អ​សេវា​សុខាភិបាលសាធារណៈនៅមណ្ឌលសុខភាព មន្ទីរពេទ្យបង្អែកស្រុកមន្ទីរពេទ្យខេត្ត និងមន្ទីរ​ពេទ្យ​ជាតិ ការចូលរួមជាដៃគូពីសេវាសុខាភិបាលឯកជនក្នុងប្រព័ន្ធសុខាភិបាល យើងបាន​ផ្តល់នូ​វ​កា​រ​ទទួលបានសេវាវេជ្ជសាស្ត្រដែលមានគុណភាពកាន់តែប្រសើរ ជាពិសេសក្នុងការថែទាំ សុខ​ភាព​មាតា ទារក កុមារ និងយុវវ័យនៅកម្ពុជា៕ អត្ថបទ៖រដ្ឋា