សន្និបាតបូកសរុបការងារក្រសួងទេសចរណ៍ដាក់បញ្ហាប្រឈម១៥ រួមគ្នាដោះស្រាយ​ជំរុញ​កំណើន​ទេសចរណ៍

នៅថ្ងៃទី២៦ ខែកុម្ភៈនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បាន​បើក​សន្និបាត​បូក​សរុប​លទ្ធផល​ការងារប្រចាំឆ្នាំ២០២៤ និងលើកទិសដៅអនុវត្តបន្តឆ្នាំ២០២៥ នៅOCIC ហើយ​នៅ​ក្នុង​សន្និបាតនេះ រដ្ឋមន្ត្រីទេសចរណ៍ បានលើកឡើងបញ្ហាប្រឈមចំនួន១៥ចំណុច ជំរុញ​គ្រប់​ភាគី​ពាក់ព័ន្ធ រួមគ្នាពិភាក្សាដោះស្រាយ ដើម្បីប្រែក្លាយបញ្ហាប្រឈម ទៅជាឱកាស​ការងារ​ដ៏​ល្អ​សម្រាប់​ជំរុញ​កំណើនទេសចរណ៍នៅឆ្នាំ២០២៥។

ឯកឧត្តម រដ្ឋមន្ត្រី ហួត ហាក់ ថ្លែងថា នៅក្នុងឆាំ្ន២០២៤ កម្ពុជាសម្រេច​គោលដៅ​ទាក់​ទាញ​ទេសចរ​អន្តរជាតិ មកទស្សនាកម្ពុជាបានប្រមាណ៦លាន៧សែននាក់ កើន២៣% ផ្តល់ប្រភ​ព​ចំណូល​ប្រមាណ ៣៦៣៧លានដុល្លាអាមេរិច កើន១៨% ប្រៀបធៀបឆ្នាំ២០២៣ ហើយនៅ​ក្នុង​ឆ្នាំ​២០២៥ ក្រសួងបានបង្ហាញក្តីរំពឹងថា ទេសចរអន្តរជាតិ នឹងមកទស្សនាកម្ពុជាកើនរហូត ៧​លាន​២​សែននាក់ ទៅ៧លាន៥សែននាក់ ។

ឯកឧត្តម រដ្ឋមន្ត្រី ហួត ហាក់ ថ្លែងថា ជាក់ស្តែងវិស័យទេសចរណ៍បច្ចុប្បន្ន នៅមានបញ្ហា​ប្រឈម​ច្រើន​ ក្នុងនោះបញ្ហាប្រឈមធំៗ និងជាយុទ្ធសាស្ត្រ ចំនួន១៥ចំណុច ដែលរួមមាន៖ បញ្ហា​ផ្សព្វ​ផ្សាយ​ព័ត៌មានមិនពិត Fake News ទាក់ទងទេសចរណ៍ពីកម្ពុជានៅក្រៅប្រទេស ការពង្រឹង​សណ្តាប់​ធ្នាប់​សន្តិសុខទេសចរណ៍ ការសម្របសម្រួលធ្វើដំណើរទេសចរអន្តរជាតិ គុណភាព​កញ្ចប់​សេវា​ទេសចរណ៍ ការជំរុញតភ្ជាប់ជើងហោះហើរត្រង់ និងការពង្រឹងមូល​ធនមនុស្ស​ក្នុង​វិស័យ​ទេសចរណ៍ជាដើម។

ឯកឧត្តម រដ្ឋមន្ត្រី ហួត ហាក់ ថ្លែងថា បច្ចុប្បន្នប្រមុខថ្នាក់ដឹកនាំរាជរដ្ឋាភិបាលកម្ពុជា ផ្តល់​សម្រួល​បញ្ចុះ​តម្លៃ​ e-visa សម្រាប់ការស្នាក់នៅកម្ពុជាជូនភ្ញៀវអន្តរជាតិ អនុវត្តថា្នល​ឌីជីថល​លក់​សំបុត្រ​ចូល​ទស្សនាអង្គរ ការសម្រួលចាយវាយក្រដាសប្រាក់ដុល្លាចាស់ៗរបស់ភ្ញៀវបរទេស និងបន្ត​អនុវត្ត​យុទ្ធនាការឆ្នាំផ្លាស់ប្តូរប្រជាជន កម្ពុជា ចិន និងកម្ពុជា ឥណ្ឌាឆ្នាំ២០២៥ ជាដើម ដើម្បី​ជំរុញ​ផ្សព្វ​ផ្សាយ និងលើកទឹកចិត្តទេសចរអន្តរជាតិមកទស្សនាឲ្យកាន់តែច្រើនថែមទៀត។

ដើម្បី​សម្រេចគោលដៅអភិវឌ្ឍន៍វិស័យទេសចរណ៍ ឯកឧត្តម ហួត ហាក់ បានដាក់​ចេញ​គោល​ដៅ​កិច្ច​សហការ និងសហប្រតិបត្តិកាដែលមានរសរសរស្តម្ភចំនួន៦ រួមមាន៖ពង្រឹងកិច្ចសហការ និង​សហ​ប្រតិបត្តិការជាមួយបណ្តាស្ថានប័នថ្នាក់ជាតិ ថ្នាក់ក្រោមជាតិ វិស័យឯកជនជាតិអន្តរជាតិ សារ​ព័ត៌មានជាតិអន្តរជាតិ បណ្តាស្ថានទូត និងប្រទេសដៃគូទាំងអស់ រួមទាំងមនុស្សម្នាក់ៗ ផ្សព្វ​ផ្សាយ​ទេសចរណ៍កម្ពុជាផងដែរ៕ អត្ថបទ ស៊ុម សុខជា