លោក Trump អបអរ “ការយកមកវិញ” នៃព្រែកជីកប៉ាណាម៉ា ប៉ុន្តែរងការរិះគន់យ៉ាងរហ័ស

ប្រធានាធិបតីអាមេរិក លោក Donald Trump បានអបអរសាទរ “ការទាមទារយកមកវិញ” នៃព្រែកជីកប៉ាណាម៉ា ជុំវិញកិច្ចព្រមព្រៀងដែលដឹកនាំដោយក្រុមហ៊ុនអាមេរិក BlackRock ក្នុងការទិញភាគហ៊ុន ៩០% នៃអាជីវកម្មកំពង់ផែតម្លៃ ២២,៨ពាន់លានដុល្លារ ពីក្រុមហ៊ុនហុងកុង CK Hutchison រួមទាំងទ្រព្យសម្បត្តិដែលខ្លួនកាន់កាប់តាមព្រែកជីកដ៏សំខាន់នេះ ប៉ុន្តែមេដឹកនាំប៉ាណាម៉ា បានរិះគន់យ៉ាងរហ័សថានោះជារឿង “កុហក”។

កិច្ចព្រមព្រៀងនេះនឹងឱ្យសម្ព័ន្ធក្រុមហ៊ុនអាមេរិកជាអ្នកគ្រប់គ្រងកំពង់ផែព្រែកជីកប៉ាណាម៉ាសំខាន់ៗ ស្របពេលសេតវិមានអំពាវនាវឱ្យដកចេញនូវអ្វីដែលខ្លួនចោទថាជាកម្មសិទ្ធិរបស់ចិន។ ប៉ុន្តែជំហាននេះក៏ប្រថុយនឹងការបង្កើនភាពតានតឹងកាន់តែជ្រៅឡើងរវាងអាមេរិក និងប៉ាណាម៉ា ដែលបានប៉ះទង្គិចសម្ដីគ្នាយ៉ាងខ្លាំងរួចទៅហើយ ជុំវិញការអះអាងរបស់លោក Trump អំពីព្រែកជីកនេះ។

លោក Trump បានប្រាប់សភាអាមេរិកកាលពីយប់ថ្ងៃអង្គារ (០៤ មីនា) ថា “រដ្ឋបាលលោកនឹងទាមទារយកព្រែកជីកប៉ាណាម៉ាមកវិញ ហើយបានចាប់ផ្តើមធ្វើរឿងនេះរួចទៅហើយ”។

ប្រធានាធិបតីប៉ាណាម៉ា លោក Jose Raul Mulino បានឆ្លើយតបនៅថ្ងៃពុធ (០៥ មីនា) ថា លោក Trump “បានកុហកម្តងទៀតហើយ” ដោយបញ្ជាក់ថា “ព្រែកជីកប៉ាណាម៉ា មិនស្ថិតក្នុងដំណើរការទាមទារមកវិញអ្វីនោះទេ ហើយព្រែកជីកនេះនឹងបន្តជាកម្មសិទ្ធិរបស់ប្រជាជនប៉ាណាម៉ា”៕