ពលរដ្ឋអរគុណរដ្ឋបាលរាជធានីភ្នំពេញបានបង្កើតផ្លូវថ្មើរជើងសម្រាប់ដើរកម្សាន្ត និងបញ្ចូលវប្បធម៌ ប្រពៃណីខ្មែរ

ភ្នំពេញ ៖ បងប្អូនប្រជាពលរដ្ឋ រស់នៅរាជធានីភ្នំពេញ និងមកពីតាមបណ្តាខេត្ត បានអញ្ជើញមកកម្សាន្តតាមបណ្តោយផ្លូវថ្មើរជើង នាល្ងាចថ្ងៃទី៨ ខែមីនា ឆ្នាំ២០២៥ បានថ្លែងអំណរគុណដល់រដ្ឋបាលរាជធានីភ្នំពេញ ដែលបង្កើតគម្រោងផ្លូវថ្មើរជើង មានបញ្ចូលនូវវប្បធម៌ ប្រពៃណី និងស្តង់ម្ហូបអាហារ នំ និងស្តង់លក់ផលិតផលសិប្បកម្មខ្មែរ។

​លោក ចន ប៊ុនវឌ្ឍន៍ ប្រធានការិយាល័យសិល្បៈទស្សនីយភាព នៃមន្ទីរវប្បធម៌ និងវិចិត្រសិល្បៈរាជធានីភ្នំពេញ បានប្រាប់BTV ព័ត៌មានថា ថ្ងៃនេះក្រុមសិល្បករ សិល្បការិនី បានមកចូលរួមសម្តែងនូវទម្រង់សិល្បៈផ្សេងៗ ដូចជា៖ ការប្រគុំតន្រី្តប្រពៃណី និងសម្តែងរបាំប្រពៃណី (របាំនេសាទ និងរបាំច្រូតស្រូវ) ជូនភ្ញៀវទេសចរជាតិ និងអន្តរជាតិ សកម្មភាពទាំងអស់នេះ ប្រារព្ធឡើងដើម្បីផ្សព្វផ្សាយពីទម្រង់សិល្បៈវប្បធម៌ និងលើកស្ទួយទំនៀមទម្លាប់ប្រពៃណីពីស្នាដៃរបស់បុព្វបុរសយើងដែលបានបន្សល់ទុកឲ្យកូនចៅយើងមកដល់ពេលនេះ។

ទន្ទឹមគ្នានោះដែរ លោក ថុន ថៃ និសិ្សតនៃសាកលវិទ្យាល័យភ្នំពេញ កញ្ញា លីន អាជីវករ និងលោក រ៉ាវីដ រស់នៅខេត្តពោធិ៍សាត់ បានលើកឡើងស្រដៀងគ្នាថា ពួកគាត់មកកម្សាន្តនៅផ្លូវថ្មើរជើង ពិតជាមានអារម្មណ៍សប្បាយរីករាយ និងសង្កេតឃើញថាមានបងប្អូនប្រជាពលរដ្ឋ និងភ្ញៀវទេសចរអន្តរជាតិ មកកម្សាន្តយ៉ាងច្រើន។ ជាពិសេសនៅពេលរដ្ឋបាលរាជធានីភ្នំពេញ បានបិទផ្លូវ ដែលធ្វើឡើងនៅរៀងរាល់ថ្ងៃសៅរ៍ និងថ្ងៃអាទិត្យ ដោយចាប់ពីម៉ោង ១៨:០០នាទី រហូតដល់ម៉ោង ២៣:០០នាទីយប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ស្ថិតនៅក្នុងខណ្ឌដូនពេញ រាជធានីភ្នំពេញ ដើម្បីឱ្យដំណើរការផ្លូវថ្មើរជើង (Walk Street) ពិតជាល្អ ព្រមទាំងបង្កើតព្រឹតិ្តការណ៍កម្សាន្តតាមបែបវប្បធម៌ ប្រពៃណី បានចូលរួមបំផុសឡើងវិញនូវតម្លៃសិល្បៈ វប្បធម៌ ជូនប្រជាជន និងភ្ញៀវទេសចរបរទេស បានស្គាល់។

សូមបញ្ជាក់ផងដែរថា បើតាមរដ្ឋបាលរាជធានីភ្នំពេញ បានឲ្យដឹងថា ផ្លូវថ្មើរជើង (Walk Street) នៅរាជធានីភ្នំពេញ សម្រាប់សប្តាហ៍នេះ ថ្ងៃទី០៨-០៩ ខែមីនា ឆ្នាំ២០២៥ មានការសម្ដែង របាំប្រពៃណី (របាំនេសាទ របាំច្រូតស្រូវ) របាំបុរាណ(របាំភួងនារី), រាំវង់, សៀករហ័សកម្ម, ចាប៉ីសហគមន៍, បណ្ណាល័យចល័ត និងកំប្លែង នាយក្រឹមផងដែរ៕

អត្ថបទ រដ្ឋា