បីថ្ងៃនៃពិធីបុណ្យចូលឆ្នាំថ្មី នៅខេត្ដព្រះសីហនុ ទទួលបានភ្ញៀវជាង៤០ម៉ឺននាក់

ព្រះសីហនុ៖ ប្រធានមន្ទីរទេសចរណ៍ ខេត្ដព្រះសីហនុ ប្រាប់ឱ្យដឹងថា រយៈពេលបីថ្ងៃ ចាប់ពីថ្ងៃទី ១៤ ដល់ ១៦ ខែមេសា ឆ្នាំ២០២៥ ខេត្ដព្រះសីហនុ ទទួលបានភ្ញៀវទេសចរ ដែលចូលមកលេងកម្សាន្ដ និងស្នាក់នៅលម្ហែ អបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ នៅតាមរម្មនីយដ្ឋានទេសចរណ៍នានា មានចំនួនសរុប ៤២៩.៤៥២នាក់ ថយចុះ ៣០% ។

លោក តាំង សុចិត្ដគ្រឹស្នា បន្ដថា ភ្ញៀវទេសចរ ដែលបានចូលមកខេត្តព្រះសីហនុ រយៈពេលបីថ្ងៃ មានភ្ញៀវទេសចរផ្ទៃក្នុងសរុបចំនួន ៤២៩.៤៥២នាក់ ថយចុះ ៣០% ក្នុងនោះ ភ្ញៀវជាតិមានចំនួន ៤១៦.៦៦៣នាក់ ថយចុះ៣០% ភ្ញៀវបរទេសសរុប ១២.៧៨៩នាក់ កើនឡើង ៧% ។

ភ្ញៀវតាមបណ្តាឆ្នេរ និងរមណីយដ្ឋាននានា សរុបចំនួន ៤២៦.២៧៤នាក់ ថយចុះ៣០% ក្នុងនោះ ភ្ញៀវជាតិ មានចំនួន ៤១៥.១៨៤នាក់ ថយចុះ ៣០% ភ្ញៀវបរទេស មានចំនួន ១១.០៩០នាក់ កើនឡើង ៩% ។ ភ្ញៀវចូលតាមព្រលានយន្តហោះអន្តរជាតិ ចំនួន ០៨ជើង កើនឡើង ០២ធៀបនឹងឆ្នាំមុន មានភ្ញៀវសរុបចំនួន ៦៣៩នាក់ កើនឡើង ១២២% ក្នុងនោះ ភ្ញៀវជាតិ ១៣នាក់ កើនឡើង ៤៤% ភ្ញៀវអន្តរជាតិ មានចំនួន ៦២៦នាក់ កើនឡើង ១២៥% ។ ភ្ញៀវទេសចរទៅកម្សាន្តតាមបណ្តាកោះនានា សរុបចំនួន ២.៥៣៩នាក់ ថយចុះ៣៦% ក្នុងនោះ ភ្ញៀវជាតិ មានចំនួន ១.៤៦៦នាក់ ថយចុះ ៣៩% ភ្ញៀវបរទេស មានចំនួន ១.០៧៣នាក់ ថយចុះ ៣២% ។

លោក បន្ថែមថា ខេត្ដព្រះសីហនុ បានរៀបចំសង្ក្រាន្ដ អបអរសាទរពិធីបុណ្យចូលឆ្នាំថ្មី ប្រពៃណីជាតិ​ខ្មែរ ជាច្រើនកន្លែង ទាំងនៅលើដីគោក និងនៅលើដីកោះ ជូនបងប្អូនប្រជាពលរដ្ឋកម្សាន្ដសប្បាយ ដោយមានការយាមកាមល្បាតរសក្សាសុវត្ថិភាពជូនប្រជាពលរដ្ឋលេងសប្បាយរីករាយដោយគ្មានក្ដីបារម្ភ។ ការថយចុះភ្ញៀវទេសចរនេះ គឺបណ្ដាលមកពីប្រទេសកម្ពុជា សម្បូរទៅដោយតំបន់រមណីយ​ដ្ឋាន​ទេសចរណ៍ ពិសេសប្រព័ន្ធគមនាគមន៍ល្អ និងសុខសន្ដិភាព ដែលផ្ដល់សេរីភាពពេញលេញ​ជូនប្រជាពលរដ្ឋដើរហើរកម្សាន្ដគ្រប់ ទិសទី។

ម្យ៉ាងវិញទៀត ប្រជាពលរដ្ឋមួយចំនួនទៅស្រុកកំណើតជួបជុំឪពុកម្ដាយ បងប្អូន ញាតិសណ្ដាន និងមួយចំ នួនទៅលេងខេត្ដសៀមរាប ព្រោះនៅទីនោះមានរៀបចំមហាសង្ក្រាន្ដ​អង្គរយ៉ាងអធិកអធម ៕